Búkil qazaqtan «Aq sarbas» aıtyp súıinshi suraıtyn kúnniń aýyly da alys emes. Súıinshilep bastamaı qaıtemiz, qazaqtyń kóshi qaıta jandanaıyn dep jatqanda!
Búgin Parlament Senaty «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylap, qujatty qabyldady. Bul týraly «Qamshy» portaly QazAqparatqa silteme jasap habarlaıdy. Uly kóshtiń qaıta jandanýyna sebepker bolatyn zań jobasy endi Elbasynyń qol qoıýyna joldanady.
Bul zań jobasy boıynsha qandastarymyzǵa elimizdiń kez-kelgen óńirinen oralman mártebesin alý, sheteldik azamattarǵa qaraǵanda tólem qabiletin rastaýsyz ýaqytsha turý yqtıarhatyn alý múmkindigi beriledi. Al, Úkimet belgilegen óńirlerge qonystanǵan jaǵdaıda qandastarymyzǵa jeńildikter qarastyralady. Atap aıtqanda, belgilengen óńirlerge barǵan etnıkalyq qazaqtardyń kólik shyǵyndaryn ótep, qyzmettik baspana nemese jataqhanadan bólme berýdi quraıtyn áleýmettik kómekter kórsetiledi. Bundaı áleýmettik kómekter elimizdiń bir óńirinen úkimet aıqyndaǵan ekinshi óńirine qonystanǵan qandastarymyzǵa da beriledi. Qandastarymyz Qazaqstan Respýblıkasynyń azamattyǵna turaqty turý yqtıarhatyn alǵannan keıin bir jyl ishinde ótinish bere alady.
Bul zań jobasyna qatysty baıandama jasaǵan senator Lázzat Qıynov osy zańda elimizdiń joǵarǵy oqý oryndarynda oqyp jatqan qandastarymyzdyń azamattyq alý tártibi jeńildetiletinin, Soltústik óńirlerden bilim alǵysy keletin jastarǵa arnaıy granttar engizletinin, Qazaqstan aýmaǵynda turatyn qandastar elden shyqpaı vızany sozdyrý máseleleri de sheshiletinin aıtyp ótti.
Paralamenttyń bir jyl boıy talqylap, qabyldaǵan zańy el úmitin aqtaıdy degen úmittemiz. Kópten kútken uly toı degendeı, kópten kútken zańnyń da iske asýyna shamaly ýaqyt qaldy. Qazaqtyń myna uly dalasy qazaqqa tolmaı, babalar ańsaǵan tolyqqandy azattyqqa jetpesimiz anyq. Ańsap jetken azattyqty saqtap qalý álemniń qaı jerinde júrs de boıynda qazaqtyń qany bar ár azamattyń mindeti. Elimizdiń geografıalyq jáne saıası aqýalyna qarar bolsaq ár qazaq azattyqty saqtaýdy óz mindetine alýy kerek. Sol sebepti, endi ár qazaq erte bastan óz otanyn taýyp, onyń ishinde belgilengen óńirlerge at basyn tiregeni jón. Elimizdiń soltústik óńirlerinde qazaqtardyń úles salmaǵanyń áli kúnge 40 paıyzǵa jetpeıtindigin eskersek, Soltústik óńirlerge kóshti baǵytyn burý kezek kúttirmeıtin másele.
Esterińizde bolsa, 2013 jylǵy «Kóshi-qony týarly» zańnyń ózgeristerinen keıin qazaq kóshi toqtap qala jazdap edi. Endi bul zań jobasy qabyldansa eki jaqqa da tımdi bolar edi. Óıtkeni, qazaqsyz Qazaqstannyń, Qazaqstansyz qazaqtyń kúni qarań. Sheteldegi qazaqtar asımılásıalanyp ketpeýi úshin, elge kelip elimizdiń qazaq ulty az shoǵyrlanǵan oryndaryn qazaqtarmen toltyrýy kerektigi eki jaqty qajettilik. Bul qajettiliktiń ornyn toltyrý úshin tek Elbasynyń zań jobasyna qol qoıýy ǵana qaldy.
Elime jetip ultan bolýǵa da daıynmyn degen qazaq, qamdana ber. Kóp uzamaı Elbasy bul zańǵa da qol qoıyp qalar. Sol kezde taǵy bir súıinshileımiz.
Turdybek Qurmethan
