Jaqyn arada el búdjeti qaıta qaralýy múmkin. Bul týraly «Qamshy» portaly KTK-ǵa silteme jasap habarlaıdy.
Dollar baǵamynyń kúrt kóterilýi respýblıkalyq búdjetti qaıta qaraýǵa ákep soǵýy múmkin ekenin ulttyq ekonomıka mınıstri Erbolat Dosaev málimdedi. Úkimet búdjet shyǵyndaryn muqıat zerttep, ondaǵy qysqartýǵa bolatyn baǵyttardy anyqtamaq.
Jyl basynda búdjetke Elbasy tapsyrmasy boıynsha ózgerister engizilip, shyǵyndar 700 mıllıard teńgege qysqarǵan bolatyn. Ol ózgeristerge saı Almatyda ótetin Ýnıversıada, Astanadaǵy EKSPO-2017 kórmesi jáne basqa merekelik is-sharalardyń smetasy tómendetildi. Bul ózgerister ol kezde munaı men metal baǵasynyń quldyraýymen túsindirildi.
Valúta naryǵyndaǵy sońǵy qubylystar 2016-2018 jylǵa arnalǵan búdjetti taǵy da naqtylaýǵa ákep soǵyp otyr. Esterińizge salsaq, bul búdjette munaı barreliniń baǵasy qyryq dollar dep belgilenip, AQSH dollarynyń baǵamy 250 teńgeden aspaıdy dep josparlanǵan bolatyn. Munaı baǵasy qazirgi tańda oıdaǵydaı bolǵanmen, valúta baǵamy Úkimet múshelerin biraz áýreleıtin sıaqty.
«Bul máselede atap óterlik birneshe faktorlar bar. Ulttyq banktiń jańa basshylyǵy qajetti sharalardy qoldanady dep senemin. Úkimetke Ulttyq banktiń teńestirilgen, anyq aqsha-valútalyq saıasat júrgizgeni kerek. Óıtkeni, bql bizdiń aldymyzǵa qoıylǵan mindetterdi sátti oryndaýdyń negizgi bolyp tabylady», - deıdi Ulttyq ekonomıka mınıstri Erbolat Dosaev.
