Qanat Islam týǵan Qytaıdyń Altaı aımaǵy Qaba aýdanynan taǵy bir qazaq batyry shyqty. Ol birden kásipqoı boksta baǵyn synap, Fılıppın, Taıland, Qytaı elderiniń sańlaqtaryn san soqtyryp, mılıardtardyń nazaryn ózine aýdara bastady. Bul týraly «Qamshy» portaly QazAqparatqa silteme jasap habarlaıdy.

Bul qazaq batyrynyń esimi Beısenbi Násıollauly. 1994 jyly Qaba aýdanynda dúnıege kelgen, dep habarlady QazAqparat tilshisi.

Ol bıyl Qytaıdyń ishki qalalarynda uıymdastyrylǵan azıalyq kásipqoı jarystarǵa bes ret qatysyp, barlyǵynda jeńiske qol jetkizdi. Onyń bireýinde ǵana (6 raýnd) upaı sanymen basym tússe, qalǵan tórteýinde jarysty merziminen buryn aıaqtaǵan.

Beısenbi sońǵy jekpe-jegin osydan 5 kún buryn, ıaǵnı qarashanyń 4 kúni ótkizdi. Tuńǵysh ret 8 raýndtyq básekede qarsylasyn 1 mınýt 20 sekýndta sulatyp tastady.

Beısenbi qazir qytaıdyń ishki qalalarynyń birindegi «Joń-Veı» kompanıasymen kelisimshartqa otyryp, Lıabyń Duń esimdi fılıppındik bapkerdiń qol astynda jattyǵyp, sheberligin shyńdap júr. Salmaǵy - 147,4 fýnt (66,8 keli),  boıy 180 santımetr. Qazir ol jalpy reıtıńte osy salmaq dárejesinde dúnıejúzi boıynsha 467 orynda bolsa, Qytaı eli boıynsha 2 orynda tur.

Biz ata-jurtynan alysta júrse de, Alashtyń abyroıyn asyryp júrgen qandasymyzǵa tek sáttilik joldas bolsyn deımiz. Osy qarqynynan taımaı, álemdik dodalarda asyǵy alshysynan túse berýine tilektespiz.