Jambyl oblysy Qordaı aýdandyq sotynda isi qaralyp jatqan E. Taıshybekov Qazaqstan bıligin kúshpen basyp alýǵa shaqyrǵanyn moıyndady. Bul týraly «Qamshy» portaly habarlaıdy.
Sot otyrysynda tórt kýágerden jaýap alyndy. Olar – Astana qalasynan kelgen Meıram Qanapıanov, Almat Shalgarın, tarazdyq Omarbek Beısalıev jáne almatylyq Botagóz Isaeva. Olardyń barlyǵy E. Taıshybekovtiń separatıstik pıǵyldaǵy jazbalaryn kórgenderin rastady. Jaýap alý kezinde aıyptalýshy Ermek Taıshybekov óziniń áleýmettik jelide jarıalaǵan separatıstik mazmundaǵy jazbalaryna baılanysty túsinik berdi. Atap aıtqanda, ol «Qazaqstanda bılikti barlyq múmkindikti paıdalanyp, qajet bolsa kúshpen basyp alyp, Reseıge berý kerek!», «Meniń atam, ákemniń ákesi 1937 jyly Kreml saıasatyna qarsy shyqqan qazaq separatısterin atqan bolatyn. Men de 2016 jyly nemese 2019 jyly Máskeýge qarsy qolyna qarý alǵan qazaqtardyń kózin joıýǵa qatysýym múmkin» degen posttar jazǵanyn moıyndady. Ol bul jazbalardy qazaqtardyń Reseı prezıdenti Pýtınge baǵyttalǵan nazary men jekkórinishin tek ózine aýdarý maqsatynda jarıalaǵanyn aıtty.
Sonymen qatar, sot otyrysynda E. Taıshybekov «Nur Otan» partıasynyń músheligi arqyly Senatqa depýtat bolýdy josparlaǵanyn, biraq partıalastary onyń bastamasyn qoldamaǵandyqtan partıa qatarynan shyǵyp ketkenin aıtty.
Sottaǵy negizgi kýáger Botagóz Zarqynqyzy sot barysynda E. Taıshybekovke qoldaý bildirgenderdiń bolǵanyn aıtady. Zańger Andreı Svırıdov pen Almaty oblysy Úshqońyr aýylyndaǵy shirkeýdiń popy Qaırat Baıgereev sotqa kelip, aıyptalýshy men onyń baýyry Marlen Taıshybekovke qoldaý bildirip, quqyqtyq keńesterimen bólisken. Tipti, olar sot barysynda Botagóz Zarqynqyzyn sheteldik uıymdardyń qarjylandyrýymen osyndaı daýǵa aralasýda, teginnen-tegin kez-kelgen adam sotqa shaǵymdanyp, mundaı bastama kótermeıdi dep aıyptaýǵa deıin barǵan.
Sondaı-aq, sot barysynda kýágerler E. Taıshybekovtiń áleýmettik jeli arqyly ózderiniń otbasy múshelerine qoqan-loqqy kórsetkenin aıtyp shaǵymdandy. Kýáger O. Beısalıev E. Taıshybekov ulyn óltirem dep qorqytqanyn aıtyp, sotqa qosymsha aryz túsirdi.
Botagóz Isaeva da sot otyrysynda ózine qarsy Ermek Taıshybekovtiń baýyry Marlen Taıshybekovtiń qoqan-loqqy kórsetýine baılanysty Qordaı aýdandyq İİB-ge aryzdanǵanyn, birshama ýaqyt ótken soń sol polısıaǵa ótkizilgen aryzdyń fotosýretterin M. Taıshybekov ózine jibergenin jetkizdi. Sýdıa Qaırat Belgishev osy máselege baılanysty jeke anyqtama shyǵaryp, kýágerge prokýratýraǵa shaǵymdanýǵa keńes berdi.
Botagóz Zarqynqyzy Taıshybekovtiń qoldaýshylary tarapynan da ózine qarsy aqparattyq shabýyldyń kúsheıgenin aıtyp otyr.
E. Taıshybekovke qatysty kelesi sot otyrysy erteń, ıaǵnı 11 qarashada ótetin boldy.
Darhan Muqan
