Jambyl oblysynyń Qordaı aýdanynda "ultaralyq alaýyzdyq týdyrdy" dep aıyptalǵan bloger Ermek Taıshybekovtiń sotynda kýágerlerden jaýap alý jalǵasty. Bul týraly «Qamshy» portaly Azattyqqa silteme jasap habarlaıdy.
Ulttyq qaýipsizdik komıteti (UQK) qyzmetkeri ózinen jaýap alý kezegi kelgende E. Taıshybekovtiń baýyryn, jýrnalıser men sotqa qatysyp otyrǵan basqa da adamdardy sot zalynan shyǵarýdy surady. Bul jaıly Azattyqqa sotqa qatysyp jatqan Adam quqyǵy jónindegi qazaqstandyq búro ókili Andreı Svırıdov habarlady.
- Sýdıa UQK qyzmetkeriniń ótinishin maquldap, odan jabyq túrde jaýap aldy. Jaýap alýǵa proseske tike qatysýshylar ǵana, ıaǵnı E. Taıshybekov, onyń advokaty men prokýror qatysty. Qalǵan adamdardy sottan shyǵaryp jiberdi, - dedi Svırıdov.
Sotta E. Taıshybekovtiń áleýmettik jelilerdegi jazbalaryn "ultaralyq alaýyzdyqty qozdyrý belgileri bar" dep tapqan sot sarapshylarynan jaýap alý da josparlanǵan edi. Biraq, sot sarapshylary sotqa kelmedi. Sýdıa Qaırat Belgishev sarapshylar 17 qarashaǵa belgilengen kelesi sot otyrysynda jaýap beretinin aıtty.
Qordaı aýdanynyń 37 jastaǵy turǵyny Ermek Taıshybekov Facebook jáne «VKontakte» áleýmettik jelilerinde reseıshil baǵyttaǵy, Qazaqstan men Reseıdiń saıası qarym-qatynasyn tereńdetýge úndegen saryndaǵy pikirlerimen tanylǵan. Oǵan qarsy is 30 maýsymda qozǵalǵan.
E. Taıshybekov tamyz-qyrkúıek aılarynda Almatydaǵy psıhıatrıa, psıhoterapıa jáne narkologıa ǵylymı-praktıkalyq ortalyǵyna jatyp shyqqan edi. Ortalyq zertteýleri E. Taıshybekov densaýlyǵynda eshqandaı psıhıkalyq kemistikter joqtyǵyn anyqtady.
