Bul týraly keshe Aqordada EKSPO-2017 kórmesin ótkizýge daıyndyqty pysyqtaǵan jıynda Elbasy N. Nazarbaev málimdedi.
«Kórmeniń bastalýyna bir jarym jyldaı ýaqyt qaldy. Barlyq qurylys jumystary keler jyldyń kúzine deıin aıaqtalýy tıis. Ekonomıkalyq qıyndyqtarǵa qaramaı osy is-sharaǵa qajet qarjyny bólip jatyrmyz» degen Elbasy kórmeni ótkizýge daıyndyqta eshqandaı túsiniksiz másele joq ekenine mán berdi. Sondaı-aq, ol kórmeni belgilengen taqyrypqa saı toltyrý máselesine nazar aýdartty.
Elbasy kórmeni ótkizýge daıyndyq jumysyna otandyqk ompanıalardyń qatysý úlesiniń azdyǵyna kóńili tolmaıtynyn da jetkizdi.
«Ulttyq jáne transulttyq kompanıalardyń potensıaly múlde paıdalynylmaı otyr. Bul jalpyqazaqstandyq shara bolǵan soń, olar da qatysýy kerek. Qazaqstandaǵy barlyq jer qyrtysyn paıdalanýshy kompanıalardy jumyldyrý kerek. Osyndaı barlyǵy 39 kompanıanyń búginde tek ekeýimen ǵana áriptestik týraly memorandým, bireýimen demeýshilik týraly kelisim-shart jasalǵan. Bul jetkiliksiz» dedi Prezıdent N. Nazarbaev.
Sonymen qatar, Memleket basshysy iri jer qyrtysyn paıdalanýshylardyń bedelin Siemens, Samsung, Toyota, taǵy basqa ozyq tehnologıalarǵa ıe álemdik kompanıalardy EKSPO-2017 kórmesine shaqyrýǵa paıdalaný kerektigin de usyndy.
«Bizdegi jer qyrtysyn paıdalanýshylar olardan iri kólemde qurylǵylar men jańa tehnologıalar satyp alady. Osy baılanystardy tıimdi paıdalaný kerekpiz. Árbir otandyq kásiporyn álemdik brendtermen óz jańalyqtarynyń tusaýkeserlerin bizdiń eldegi kórmede uıymdastyrýy týraly kelisiıge kelýleri qajet. Bul máselemen aınalysýdy Premer-mınıstrdiń birinshi orynbasary Baqytjan Saǵyntaevqa júkteımin» degen naqty tapsyrma qoıǵan Prezıdent kórmege balama tehnologıalarǵa ıe jetekshi elderdiń qatysýyna qol jetkizý kerektigine basa nazar aýdartty.
