Astanada kóktaıǵaqqa baılanysty dabyldy eskertý jarıalandy. Qalalyq komýnaldyq qyzmetter joldardy qatyp qalǵan muzdan tazartýda. Osy kúnge deıin qala boıynsha 305 m3 qum-tuz qospasy tóselgen. Bul týraly "Qamshy" portaly astana.gov.kz-ke silteme jasaı otyryp habarlaıdy.

Qazirgi kezde qala boıynsha qar jınaý jumystaryna 2260 jumysshy, onyń ishinde «Almaty» aýdanynda - 1171, «Esil» aýdanynda - 491 jáne «Saryarqa» aýdanynda - 598 jumysshy tartyldy. Qala boıynsha 37 qum sebetin, 87 trotýar jınaýǵa arnalǵan mashına, jalpy kóshelerdi jınaýǵa 700 komýnaldyq tehnıka birligi jumyldyryldy. 

Astana qalasy Densaýlyq saqtaý basqarmasynyń málimetteri boıynsha, táýlik ishinde 252 adam dárigerlerdiń kómegine júgingen, sonyń ishinde 126-sy kóshede qulap, jaraqat alǵan. Turmystyq jaraqat alǵandar sany - 44, aıaq-qoly synyp, shyǵyp, býyn taıyp ketkenderdiń jáne t.b. sany - 65.

Elordalyq medısınalyq mekemeler zardap shekkenderdi qabyldaýdy jalǵastyrýda. Dárigerler qala turǵyndaryn abaı bolýǵa jáne jol júrý erejesin saqtaýǵa shaqyrady.

- Jaraqat alý jaǵdaılar sany aıtarlyqtaı ósken joq. Barlyǵy qalypty norma sheginde. Eń aldymen, adamdar jaıly aıaq kıim kıýi tıis, boıjetkenderdiń bıik óksheli aıaq kıimderden bas tartqany abzal. Jaıaý júrginshiler joldan ótkende jol júrý erejesin buzbaýy kerek, óıtkeni kóktaıǵaqta mashınalardyń tejegishteri birden iske qosyla bermeıdi. Jaraqattyń, aıaq-qoldyń synýy, shyǵyp ketýi baıqalǵan sátte birden travmotologıalyq pýnktterge barý qajet,- deıdi Densaýlyq saqtaý basqarmasy basshysynyń emdeý-profılaktıkalyq jumystary jónindegi orynbasary Ivan Lı.