Almatyda QR Tuńǵysh Prezıdenti kúni qarsańynda Memlekettik kúzet qyzmetiniń «Kúz-2015» maýsymy boıynsha áskerı boryshyn óteýge shaqyrylǵan, Respýblıkamyzdyń ár óńirinen iriktelip alynǵan sarbazdardyń saltanatty ant berý rásimi ótti, - dep habarlaıdy «Qamshy» portaly QazAqparatqa silteme jasap.
«Sizder búgin QR Tuńǵysh Prezıdenti kúni qarsańynda ómirlerińizde úlken qadam basyp otyrsyzdar. El aldynda, jurt aldynda ant qabyldap jatsyzdar. Búgingi kún erekshe este qalatyn tarıhı kún bop qalady. Sizder búgin er degen, el qorǵaýshy degen ataqqa ıe bolyp jatyrsyzdar. Halyq aldynda ata-ana senimin adal, qyzmetterińizdi minsiz oryndaıdy dep senemin. Dúnıejúzilik jaǵdaıdyń kúrdeli ekendigin bilesizder. Lańkesterdiń áreketteri kesirinen halyq tynyshtyǵy buzylyp jatyr. Alǵan joldaryńyzdan taımaı, Prezıdent qaýipsizdigin qamtamasyz etip aldaǵy 1 jyldy abyroımen atqarasyzdar degen senimdemin», - dedi QR Memlekettik kúzet qyzmetiniń bastyǵy, general maıor Kúreńbaev Amantaı.
Saltanatty sharaǵa qatysqan Almaty qalasynyń ákimi Baýyrjan Baıbek jas sarbazdardyń Otan qorǵaýda alǵa qoıylǵan mindeti týraly aıtyp ótti.
«Biz búgin óz taǵdyryn Otan qorǵaýmen baılanystyrǵan azamattardyń memlekettik kúzet qataryna alynýyna baılanysty jınalyp turmyz. Endi sarbazdar Otan aldyndaǵy konstıtýsıalyq boryshyn óteý úshin ant qabyldap, elıtalyq qorǵaý qyzmetine kirisetin bolady. Búgingi shara aıryqsha mán men maǵynaǵa ıe. Memlekettik táýelsizdikke qol jetkeli beri Elbasy saıasaty arqasynda qaýipsizdik kúshteri nyǵaıtylý ústinde. Azamattardyń áskerı mindetin oryndaýyna barynsha jaǵdaı jasalǵan. Olardy áleýmettik qamsyzdandyrýǵa, baspanamen qamtyp, eńbekaqy, zeınetaqyny kóterý máselesi oń sheshimin tabýda. QR Qarýly Kúshteri zamanaýı tehnıkamen qarý-jaraqpen qamtylyp, joǵary materıaldyq-tehnıkalyq bazasy qalyptasty. Memleket basshysy Nursultan Nazarbaev atap ótkendeı, armıa árdaıym saqadaı saı bolýy tıis. Bul - memleket qoıyp otyrǵan mindet. Sarbazdar laıyqty otan qorǵaýshylar bolady dep senemin», - dedi qala ákimi Baýyrjan Baıbek.
Aıta ketý kerek, ant qabyldaǵannan keıin sarbazdar QR Memlekettik kúzet qyzmetiniń áskerı bólimderine taratylady. Olar QR Prezıdentiniń, basqa da kúzetiletin adamdar men nysandardyń qaýipsizdigin qamtamasyz etý boıynsha erekshe tapsyrmalardy, dástúrli rásimderdi oryndaıdy, memlekettik tý men Eltańba etalondaryn kúzetedi.
Jınalǵan qaýym nazaryna Prezıdenttik orkestr men «Aıbyn» prezıdenttik polki qurmet qaraýyl rotasynyń áskerı qyzmetshileri arnaıy plas-konsertin usyndy. Osy baǵdarlamamen QR Memlekettik kúzet qyzmetiniń áskerı qyzmetshileri 2015 jylǵy qyrkúıekte Máskeý qalasynda ótken «Spassk munarasy» halyqaralyq áskerı-mýzykalyq festıvalinde óner kórsetken bolatyn.
