iPhone 7 smartfonynyń qulaqqap qosatyn ádettegi jalǵaǵyshy bolmaıdy, - dep habarlaıdy «Qamshy» portaly tengrinews.kz-ke silteme jasap.

Taralyp jatqan qaýesetterge senetin bolsaq, Apple kompanıasynyń jańa óniminiń 3,5 mıllımetr bolatyn qulaqqap jalǵaǵyshy bolmaıdy eken. Osylaısha osyǵan deıin shyqqan qurylǵylardyń qulaqqaptary jańa gadjetke jaramsyz bolyp qalatyn kórinedi. 

Boljam boıynsha, onyń ornyna Apple Lightning dep atalatyn jalǵaǵyshty paıdalanbaqshy. Qazirgi ýaqytta qulaqqaptardyń osyndaı qyzmetti usynýǵa múmkindik beretin Philips Fidelio M2L sekildi modelderi bar. Biraq olardyń qymbat ekeni aıtylady. 

Apple kompanıasynyń iPhone 7 smartfonyn qalypty konnektordan bas tartatyny jaıly japonnyń Mac Otakara degen blogy óz derekkózderine silteme jasaı otyryp habarlady. Bul arqyly jańa smartfon 1 mıllımetrge deıin juqa bolady eken, sonymen qatar, korpýsynyń ishindegi keńistik bosaıdy.

Eske salaıyq, osyǵan deıin 2016 jyly shyǵatyn iPhone 7 Apple kompanıasynyń 6 mıllımetrlik eń juqa smartfony bolatyny habarlanǵan edi.