Mamyrdyń 31-i QazTAG aqparat agenttigi Almaty oblysyndaǵy «Gornyı» shekara zastavasynda 15 áskerı qyzmetkerdiń máıitteri tabylǵanyn habarlady. Agenttik shekara kúzetindegi qyzmetkerlerdi bireýlerdiń óltirip ketkenin aıtady.

Óz derekkózderine silteme jasaǵan QazTAG "Óltirilgenderdiń arasynda 1 ofıser, kelisimshart boıynsha 3 jaýynger jáne 11 sarbaz bar" dep habarlaıdy. Mamyrdyń 31-i taraǵan aqparattar boıynsha, mobıldi post emdik shópterdi zańsyz jınaýdyń aldyn alý úshin jazǵy ýaqytta qoıylady. Munyń aldynda Qytaı azamattary shekaranyń osy tusynan birneshe ret ustalǵan eken. 15 shekarashynyń máıitinen bólek, zastavaǵa jaqyn mańdaǵy qoryqshynyń úıinen onyń jansyz denesi tabylǵan. "Er adam osydan 2 kún buryn óltirilgen" dep habarlaıdy Qazaqstan aqparat quraldary.

QazTAG agenttigi qaýipsizdik qyzmetteri "Shekara beketine shabýyl jasaldy nemese jarǵydan tys qarym-qatynastar boldy dep boljam jasap otyr" dep habarlaıdy. Aqparattar boıynsha, shekaradaǵy "Gornyı" mobıldi beketimen mamyrdyń 30-y baılanys úzilip qalǵan. Postty tekserýge kelgender jaýyngerlerdiń máıitterin bireýlerdiń bir jerge jınap ketkenin kórgen. Al, Interfaks-Kazaqstan agenttiginiń málimeti boıynsha, zastavada órt bolǵan, segiz áskerı qyzmetkerdiń máıiti tabylǵan. Rastalmaǵan derekter boıynsha, olardyń qolyndaǵy qarýlary joǵalyp ketken.

«Azattyq» radıosynyń saıtynan alyndy. Taqyryp ózgertildi.