Qostanaı oblysynan buryn-sońdy kezdespegen maqulyq tabyldy, - dep habarlaıdy «Qamshy» portaly Kostanaytany.kz-ke silteme jasap.

Basylymnyń jazýynsha, janýar Áýlıekól aýdanynyń Baǵanaly aýylynan tabylǵan. Ótken jyly qazan aıynda aýylǵa birneshe tonna kómir túsiriledi. Birer kún buryn mektep jumysshylary sol kómirlerdiń arasynan kólemi bólke nandaı bolatyn túsiniksiz maqulyqty taýyp alǵan.

"Syrtqy qabaty jelim sıaqty jabysqaq. Jumyrtqaǵa múlde uqsamaıdy. İshinen 20 santımetrdeı bolatyn qurtqa uqsas jándik shyqty. Qatty tańyrqaǵan jumysshylar jándikti mekteptegi eńbek kabınetine ákelip, túr-sıpatyn anyqtap kórý úshin sý quıǵan. Sol kezde maqulyqtyń quıryq jaǵy úrlenip, azdap qımyldaı bastaıdy. Keıin jándiktiń túsi kók bolyp ózgergen", - delingen basylymda. Sonymen qatar, jándiktiń tisi bary anyqtalǵan.

Aýyl turǵyndary osy jaǵdaıǵa baılanysty aýyl ákimimen baılanysady. Ol turǵyndarǵa Qostanaıdaǵy ǵylymı-zertteý ortalyǵyna habarlasýǵa keńes beripti. "Turǵyndar ǵalymdarǵa habar bergen. Qazir bul jándiktiń 30 gradýs aıazda qalaı ólip qalmaǵany anyqtalyp jatyr. Jándiktiń syrtqy kelbeti jylanǵa da, basqa tirshilik ıelerine de uqsamaıdy", - dep habarlady jergilikti basylym.

Aıta keteıik, beımálim tirshilik ıesin aýyl turǵyndarynyń biri úıine áketken.