Ál-Farabı atyndaǵy Qazaq ulttyq ýnıversıtetinde dástúrli 46-shy ǵylymı-ádistemelik konferensıa men oqý-ádistemelik birlestiginiń otyrysy ótti. Konferensıada jergilikti JOO ókilderi ónerkásip sektorlarynyń sarapshylarymen maman daıyndaý júıesine baılanysty QR «Bilim týraly» Zańyna engen birqatar ózgeristerdi talqylady, - dep habarlaıdy «Qamshy» portaly ýnıversıtet baspasóz qyzmetine silteme jasap.
Konferensıada kadr daıyndaý sapasyn qamtamasyz etý úshin bilim berý baǵdarlamalaryn jańǵyrtý máseleleri, ınovasıalyq oqytý: tehnologıalary men ádisteri sóz boldy. QR Bilim jáne ǵylym mınıstrliginiń joǵary oqý ornynan keıingi bilim berý men halyqaralyq yntymaqtastyq departament dırektory Serik Ómirbaev óziniń baıandamasynda QR Bilim jáne ǵylym mınıstrligi qabyldaǵan birqatar ózgeristerge basa nazar aýdardy. Atap aıtqanda, JOO oqý josparyn ózderi anyqtaýǵa, dıplomdyq jumys pen memlekettik emtıhandar arasynda tańdaý jasaýǵa múmkindik alady. «Osylaısha, JOO qorytyndy attestasıa túrin ózderi tańdaıtyn bolady», - dedi Serik Ómirbaev. Doktorantýraǵa da ózgerister endi. Endi PhD dárejesi jumys berýshiniń nemese basqa da ınvestısıalardyń esebinen, ıaǵnı jeke bastamalarmen de biliktilikti arttyrýǵa bolady. «Qurylymnyń teorıalyq jaǵy 20%-ǵa azaıyp, ǵylymı-zertteý jumysy 85 kredıtke deıin artady», - dep sarapshy ǵylymǵa kóbirek kóńil bólinetinin aıtty.
Qalyptasyp jatqan kásibı standarttar júıesi qyzmetkerlerdiń biliktiligin rastaý úshin kásibı emtıhan engizedi. Bul mehanızm táýelsiz sertıfıkattaý ortalyqtarynyń jelisin qalyptastyrý arqyly júzege asady. Belgili ortalyqta berilgen baǵa jumysqa úmitkerlerdiń kásibı qabiletin dáleldeıtin qujat retinde júredi. Jańashyl úderisti retteýge respýblıkalyq komısıa qurý máselesi de kóterilgendigin aıta ketý kerek.
«Atameken» QR ulttyq kásipkerler palatasynyń sarapshysy Marat Isabekov «kásibı kartochkalardyń» tıimdiligi týraly baıandama jasady. «Kásibı kartochka» maman daıyndaıtyn JOO men soǵan mamandanǵan sala qyzmetkerleri daıyndaǵan kásıbı standarttar jıyntyǵy. «Kazenergy» munaı-gaz jáne energetıka kesheniniń adamı kapıtaldy damytý departamenti dırektory Lázzat Ahmýrzına bilim berý baǵdarlamalarynyń ózektiligin munaı-gaz sektory qajettilikterine saı qoldaý men akademıalyq úrdisti naqty óndiris oshaǵymen tyǵyz qarym-qatynas ornatýdy usyndy.
«Eger, bir mamandyq birneshe salada qatar paıdalanylatyn bolsa, máselen, burǵylaý jáne barlaý jumystary, onda mamandyqtardyń sanyn jasandy túrde kóbeıtpeý úshin qyzmettiń bul túrin bir ǵana mamandyqqa tıesili dep esepteý kerek. «Kazenergy» sarapshylarynyń mamandyqty jikteýge baılanysty júrgizgen analız qorytyndysy boıynsha jumysshylardyń qyzmeti men kásibiniń 45 jańa túri anyqtaldy»,- deıdi Lázzat Ahmýrzına
Áýe operasıalarynyń qaýipsizdigine alańdaǵan ál-Farabı atyndaǵy QazUÝ geografıa jáne tabıǵatty paıdalaný fakúltetiniń dekany Vıtalıı Salnıkov azamattyq avıasıa komıtetimen birlesip avıasıalyq meteorologıalyq standarttardy aıaqtaý kerektigin aıtty.
Konferensıa qorytyndysyna negizdelip, bilim berý baǵdarlamalaryn jańǵyrtý, akredıtasıa jáne kadrlar daıyndaý sapasynyń kepilin qalyptastyrý men bilim berý qyzmetiniń sapasyn arttyrý úshin QazUÝ-ǵa kelesideı mindetter qoıyldy:
- Kásibı qaýymdastyqpen birge bilim berý baǵdarlamalarynyń sapasyn kelesi baǵyttar boıynsha anyqtaý: quzirettilik, kútiletin nátıjeler, oqý kýrstarynyń mazmuny, oqytý ádisteri, baǵalaý ádisteri, bilim alýshylardyń ǵylymı qyzmeti, kadrlyq quram, jumysqa ornalasý múmkindikteri;
- Bilim berý baǵdarlamalaryn sertıfıkattaý tetigin kásibı qaýymdastyqtarmen jáne birlestiktermen birigip ázirleý;
- Bilim berý baǵdarlamalaryna syrtqy saraptaýdy uıymdastyrý;
- Bilim berý baǵdarlamalaryn qalyptastyrý men baqylaý barysynda akredıtteý agenttikteriniń eskertýlerin esepke alý mehanızmin ázirleý;
- Fakúltettiń bilim berý úderisinde stýdentke baǵyttalǵan ókildik taldaý uıymdastyrý;
- Tájirıbe almasý men biliktilikti arttyrý maqsatynda jetekshi oqytýshy-professorlar quramyn shaqyrý arqyly ýnıversıtettiń oqytýshy-professorlyq quramyna oqytý semınarlaryn ótkizý;
- Pánniń jáne mamandyqtyń erekshelikterin eskere otyryp, oqý nátıjesinde kútiletin baǵalaý formasyn jasaýǵa ádistemelik nusqaýlyq ázirleý;
- Kásiporyn asosıasıalarymen jáne «Atameken» QR UKP-men birlesip, ár mamandyqqa saı kásibı standarttardy daıyndaýǵa bastamashylyq jasaý.
Otyrys sońynda qabyldanǵan sheshimder bilim men ǵylymnyń damýynda strategıalyq maqsatqa qol jetkizýge kómektesetin bolady(kómekshi qural bolady).
Ózekti máselelerdi talqylaýǵa 500-den asa oqytýshy-professorlyq quram, QR Bilim jáne ǵylym mınıstrligi, «Ǵylym Ordasy» men QR ulttyq kásipkerler palatasy ókilderi qatysty.
