QR premer-mınıstriniń orynbasary D. N. Nazarbaeva ál-Farabı atyndaǵy Qazaq ulttyq ýnıversıtetine arnaıy saparmen kelip, onyń ınfraqurylymymen tanysyp, joǵary oqý ornynyń belsendi stýdentterimen kezdesti. Sapar barysynda Qazaqstan Respýblıkasyndaǵy ǵylym men bilim salasynyń damýy men básekege qabilettiligin arttyrý máseleleri talqylandy, - dep habarlaıdy «Qamshy» portaly ýnıversıtet baspasóz qyzmetine silteme jasap.
Vıse-premer ál-Farabı murajaıyn, ýnıversıtettiń ǵylymı kitaphanasyn jáne óndiriske engizýge daıyn ǵylymı jobalar qamtylǵan QazUÝ-dyń jetistikter kórmesin aralady.
Darıǵa Nazarbaeva ınovasıalyq nysandarmen tanysyp bolǵannan keıin: «ál-Farabı atyndaǵy Qazaq ulttyq ýnıversıteti – bul Qazaqstandaǵy nomer birinshi ýnıversıtet jáne bizdiń ulttyq maqtanyshymyz»,- dep atap ótti. «Búgin biz úkimette 2016-2019 jyldarǵa arnalǵan bilim men ǵylym damýynyń memlekettik baǵdarlamasyn talqylaýdamyz. Osy oraıda sizder qandaı negizgi máselelerdi atap aıtar edińizder jáne memlekettik baǵdarlama daıyndaýda nege basymdylyq berý kerek?» – dedi vıse-premer.
Áńgime barysynda bilim berý baǵdarlamalaryn táýelsiz halyqaralyq akredıtasıalaý men mamandardy sertıfıkattaý, sonymen qatar JOO qaýymdastyǵynyń kásibı standarttar men mektep oqýlyqtaryn daıyndaýǵa qatysý máseleleri sóz boldy. QazUÝ rektory Ǵalym Mutanov óz sózinde Qazaqstandaǵy joǵary bilimniń eksporttyq áleýeti men básekege qabilettiligin arttyrý, ýnıversıtetterdi naryqtyq ekonomıkanyń naqty sýbektisine aınaldyrý men ǵylym-bilim-óndiris modeliniń birigý máselelerin kóterdi. Sondyqtan, Nazarbaev Ýnıversıteti tájirıbesi negizinde eldegi jetekshi ýnıversıtetterdi halyqaralyq deńgeıdegi zertteý ýnıversıtetine aınaldyrý úshin arnaıy baǵdarlama ázirlep, ony júzege asyrý kerek, - dedi QazUÝ rektory Ǵ.Mutanov.
Qazaqstan premer-mınıstriniń orynbasary «bir tereze» qaǵıdasy boıynsha jumys jasaıtyn «Keremet» stýdentterge qyzmet kórsetý ortalyǵynyń qyzmetimen tanysty. QazUÝ-ǵa engizilip jatqan bul model stýdentterdiń jaıly turmys jaǵdaıyn qamtamasyz etýdi maqsat etken qazaqstandyq joǵary oqý oryndaryna úlgi.
Ońtústik Koreıadaǵy úzdik ýnıversıtetterdiń úshtigine kiretin, Azıa men álemniń jetekshi joǵary oqý oryndarynyń biri Seýl ulttyq ýnıversıtetimen jáne Ónse ýnıversıtetimen jasalǵan jemisti áriptestik negizinde ashylǵan dıagnostıkalyq ortalyqqa qonaqtar erekshe qyzyǵýshylyq tanytty. Dıagnostıkalyq ortalyq aldyńǵy qatarly óndirýshilerdiń sońǵy medısınalyq jabdyqtarymen jabdyqtalǵan. Munda «Kangnam Severans» klınıkasy dıagnoz anyqtaý men jetekshi mamandarynyń qatysýymen telemedısına tehnologıasyn paıdalaný arqyly naýqastarǵa qashyqtyqtan keńes berý júıeleri engizilgen. Dıagnostıkalyq ortalyqpen qatar ashylǵan Qoǵamdyq densaýlyq saqtaý joǵary mektebi álemdik tájirıbege súıene otyryp qurylǵan QazUÝmedıko-bıologıalyq klasteriniń negizgi quramdas bóligi.
Kezdesý sońynda premer-mınıstrdiń orynbasary bilim berý jáne ǵylymı baǵdarlamalardy ary qaraı damytý úshin birqatar tapsyrmalar berip, otandyq joǵary oqý oryndaryn joǵary jáne JOO-nan keıingi bilim berý salasyna bıznesti belsendi tartýǵa shaqyrdy.
