Mas kúıdegi qazaqstandyq Maltada 6 adamǵa pyshaq ala júgirgen. Oǵan sot 116 eýro aıyppul salyp, 10 aıǵa túrmege japty, - dep jazady brıtandyq Independent gazeti.

23 jasar Aıbek Manapov 20 sm pyshaqpen 6 adamǵa shabýyl jasaǵanyn moıyndaǵan.

Mámileger sýdıa Donatella Frendo Dımek beısenbi kúni tańerteń Aıbek Manapovqa 3 jyl shartty jáne 10 aı túrmege qamaý jazasyn kesti. Oǵan 116 eýro aıyppul salynǵan.

Sotta aıǵaq retinde beınebaqylaý kamerasynyń jazbasy, pyshaq jáne qazaqstandyqtyń jeke kýáligi usynyldy.

Jigit bir kelinshekti jeńil jaraqattap, 5 adamǵa shabýyl jasap, qoǵamdyq tártipti buzǵan. Sonymen qatar, ruqsatsyz sýyq qarý alyp júrgeni úshin aıyptalyp otyr.

Qazir A.Manapov Malta aýmaǵynda, ol onda 2015 jyldyń qazan aıynan beri aǵylshyn tilin úırenýde. Til kýrsy 2016 jyldyń mamyr aıynda aıaqtalýy tıis. Alaıda sot basqa stýdentterge qaýip tóndiretindikten ony múmkinshilik týa qalǵan jaǵdaıda el aýmaǵynan shyǵaryp salý kerek degen sheshim qabyldady. 
Aıyptalýshynyń qorǵaýshysy Djozef Mıssı A.Manapov atynan zardap shegýshilerden keshirim surady.

Derekkóz: QazAqparat