«Qazaq eli» anımasıalyq fılminde ánderdi oryndaýǵa Nurlan Abdýllın, Sáken Maıǵazıev syndy tanymal ánshiler tartyldy. Bul týraly búgin Ortalyq komýnıkasıalar qyzmetindegi baspasóz máslıhatynda fılmniń bas prodússeri Sábıt Ábdiqalyqov málim etti, - dep habarlaıdy "Qamshy" portaly QazAqparatqa silteme jasap.
«Qazir prokattyń aldynda orys tilinde dybystaý sharalary júrgizilýde. Negizi qazaq tilindegi nusqasy tolyq daıyn»,-dedi bas prodússer.
Onyń sózine qaraǵanda, jalpy dybystaý jumystaryna Ǵabıt Músirepov atyndaǵy balalar jáne jasóspirimder teatrynyń akterleri atsalysty. «İshinde ánderdi oryndaýǵa Nurlan Abdýllın, Sáken Maıǵazıev sıaqty ánshiler tartyldy»,-dedi Sábıt Ábdiqalyqov.
Anımasıalyq fılmniń elimizdiń kınoteatrlaryndaǵy resmı prokaty naýryz aıyna josparlanǵan. «Saq» kınostýdıasy fılmniń hronometrajy 75 mınýttyq tolyqmetrajdy nusqasyn daıyndady. Aıta keteıik, Qazaqstan anımatorlary sapaly anımasıalyq lentany shetel múltfılmderine qaraǵanda 60 ese arzan búdjetpen jasap shyǵardy. Fılmniń dırektory Nýrıddın Patteevtiń aıtýynsha, kartınanyń búdjeti 375 mln. teńgeni qurady.
Fılmniń tarıhı keńesshisi - tarıh ǵalymdarynyń doktory, profesor Jambyl Artyqbaı. Fılmniń ádebı keńesshi - Dýlat Isabekov, rejıseri - Batyrhan Dáýrenbekov, senarısi - Saǵadildá Úsibálıev, Baqytjan Quljabaı, kompozıtory - Rýslan Shynyqulov, qoıýshy sýretshisi - Azamat Ernazarov, fılmniń dırektory - Nýrıddın Patteev, bas prodússeri - Sábıt Ábdiqalyqov.
Fılmdegi oqıǵa jelisi Kereı men Jánibektiń bala kezderinen bastap eseıip, erjetip, el basqaryp, Qazaq handyǵyn qurǵanǵa deıingi aralyqty qamtıdy. Fılmniń maqsaty balalardyń óz tarıhyn túsinýine, Kereı men Jánibekteı batyrlardyń qazaq handyǵyn qalaı qurǵanyn bilip, solarǵa elikteýge, óz eliniń patrıoty bolyp ósýlerine jol ashý bolyp tabylady.
