Jalpyulttyq sosıal-demokratıalyq partıa quramynda taǵy da bir shý shyǵatyn sekildi. Táýelsiz basylym «Trıbýna» gazetinde partıanyń Qyzylorda qalasynda turatyn Abdýlla Shahanov esimdi múshesiniń JSDP jetekshisin synǵa alǵan úndeýi jarıalandy, - dep habarlaıdy «Qamshy» portaly.
Partıa múshesi úndeýinde qalalyq fılıal basshylyǵy partıanyń jarǵysyna saı áreket etpeı otyr dep shaǵymdanady. Onyń aıtýynsha, fılıal jetekshileri partıa sezine delegattardy ashyq jáne ádil jolmen saılamaǵan kórinedi.
«Bul partıanyń saılaýǵa qatyspaq oıy bar ekeninen habardar bolarsyzdar. Ony aldaǵy bolar sıeze sheshemiz degendi bildirgisi keledi halyqqa. Jarǵy boıynsha solaı ǵoı jáne ol sezge delegattar oblystyq konferensıada saılanýǵa tıis bolatyn. Aldaý da osy jerde kórinis tapty. Konferensıanyń shaqyrylǵany jóninde fılıaldyń basshylyǵy bolyp sanalatyn Keńes múshelerine, ne bolmasa, Tóralqaǵa habarlanbaı, jasyryn jáne jalǵan ótkizbekshi bolǵany áshkere boldy. Qańtardyń 24-i kúni, sol jalǵandyqtyń ústinen tústik. Alty aıdan beri ashylmaǵan, fılıaldyń keńsesi bolýy múmkin degen, bir kafege jalǵa berilgen JSDP Qyzylorda oblystyq fılıaly tóraǵasynyń mindetin atqarýshy T.Rahımovtyń jeke-menshik ǵımaratynyń esigi ashyq turǵanyn kórip, bas suqqanbyz. Sondaǵy kórgenimiz – kópshiligi bizge tanys emes, bas-aıaǵy onǵa tolmaıtyn kisiler otyr eken. Shynynda da jınalys ótkizbekshi sıyqtaryn kórip, shyǵyp kettik. Bir aýdannan úsh kisi qatysyp otyr, taǵy bir aýdannan – bir kisi, qalǵan bes aýdannan eshkim joq. Úsh kisi qatysatyn aýdan – tóraǵanyń mindetin atqarýshy kisiniń týǵan ólkesi. Ol kisiniń taǵy eki týysyn kórdik. Sonda óziniń onshaqty týys-tamyrlarymen partıanyń oblystyq konferensıasyn ótkizdim dep kimdi aldamaqshy? Partıanyń belsendileri, baıyrǵy músheleri, basshy quramy, aýdan, qala ókilderi qaıda? Olardan bastyq nege jasyrynady? Bul óz aldyna áńgime. Búgingi aıtpaǵymyz, álgi týystary men “tamyrlary” “bastyqty” týǵan qudashasymen ekeýin sezge delegat etip jiberdi. Bul kisiler sonyń ózimen-aq ózderi turmaq, partıanyń sezin de jalǵanǵa shyǵarǵan joq pa? Endeshe, buǵan jol bermeıik», - degen úndeý ıesi mundaı quıtyrqylyqqa partıa jetekshisi Jarmahan Tuıaqbaıdyń da qatysy bar degen kúdigin aıtady.
«Biz bul habarlamany Jarmahan Tuıaqbaı myrzanyń ózine tikeleı jiberýimizge de bolar edi, biraq olaı etpedik. Sebebi, munyń aldynda, osy tárizdes, partıanyń Jarǵysyna saı emes jónsizdikter týraly jazǵan birneshe hattarymyz ol kisimen qaraýsyz qaldyrylǵan bolatyn. Bul joly da solaı bola ma degen qaýippen, qalyń kópshilik arqyly jetkizýdi jón kórdik. Bir jaǵynan, osy jónsizdikterdiń basynda Jarmahan Tuıaqbaı myrzanyń ózi otyr dep sanaımyz. Mundaı basshylarmen saılaýǵa túsip ne bereke bolmaq? Sondyqtan, men partıalas áriptesterimdi saılaýǵa Jarmahan Tuıaqbaısyz barýǵa shaqyramyn. Ol úshin osy aldaǵy sıeze osy máseleni kóterip, sheship alý kerek. Odan bergi jerde esh nátıje bolmaıdy. Bolǵan kúnde de qoldan búldiriledi. Men muny ótken kúnderdiń tájirıbesine súıenip aıtamyn», - deıdi Abdýlla Shahanov.
