Shymkent syra zaýytynyń qyzmetkeri 30 qańtar kúni zaýyt aımaǵynda ótken arnaıy operasıa týraly aıtyp berdi, - dep habarlaıdy «Qamshy» portaly TVK-ǵa silteme jasap.

Zaýyt jumysshysynyń biriniń aıtýynsha kásiporyn aýmaǵynda 30 qańtar kúni polısıa, áskerıler men arnaıy jasaq jaýyngerleri tintý júrgizgen.

«Túske taman zaýyt aýmaǵyna eki «Kamaz» kóligi kirdi. Onda arnaıy jasaq jaýyngerleri boldy jáne olar zaýyt aınalasyn qorshap tastady. Biz basynda jaı ǵana jattyǵý eken dedik. Keıin jattyǵý emes, mańyzdy birdeńe bolǵaly jatqanyn túsindik. Polıseıler orderdi kórsetti de kásiporyndy tekserýge kiristi. Zaýytta bolǵan jumysshylardy bir ǵımaratqa oqshaýlap tastady», - deıdi zaýyt jumysshysy

Sondaı-aq, Shymkent qalasynyń taǵy bir turǵyny oqıǵaǵa kezdeısoq kýáger bolǵan. Onyń aıtýynsha, azamat sol ýaqytta kásiporyn janynan ótip bara jatqan. Ony azamattyq kıimdegi bir kisi toqtatyp, ózin İİM-niń Ortalyq apparaty qyzmetkerimin dep tanystyryp, kýáger bolýǵa shaqyrǵan. Polıseı sonymen qatar odan zaýyt basshysy tutqyndalǵany týraly habardarlyǵyn suraǵan. Kýágerdi zaýyt aýmaǵynan kirgizgen. Biraz ýaqyttan soń polıseıler onyń kerek emestigin aıtyp shyǵaryp salǵan.

«Polısıa biz kirgende kabınetterdi tekserip jatty. Zaýyt aýmaǵyna kirgennen soń biraz ýaqyttan keıin meni kerek emessiz dep jibere saldy», - deıdi kýáger.

Esterińizge salsaq, keshe Shymkent qalasynda arnaıy operasıa barysynda Shymkent syra zaýytynyń qojaıyny, tanymal kásipker Toqtar Tóleshov pen onyń birneshe serikteri ustalǵan bolatyn. Ustaý operasıay zaýytpen qatar, «Rıksos Hadısha Shymkent» qonaq úıi men jeke sektorddaǵy turǵyn úılerdiń birinde de ótken bolatyn.