“Melomen” tobynyń ánshileri jol apatyna ushyrady, – dep habarlaıdy Baistars.kz tilshisi. Toptyń múshesi Jiger Aýypbaev aýrýhanada jatyr.

Saıt tilshileriniń málimetinshe, ánshiler 7 aqpanda tańǵy saǵat 04.00 shamasynda Almaty qalasynda ál-Farabı dańǵylynyń boıymen Lexus kóligimen Alma-arasan shatqalyna kóterilip bara jatyp, jol-kólik apatyna ushyraǵan. Tizginde Jiger Aýypbaev bolǵan. Ol ruqsat etilgen jerden solǵa qaraı burylys jasaǵan sátte art jaqtan qatty jyldamdyqpen Nissan markaly jol talǵamaıtyn kólik soqqan. Qatty soqqydan Jiger Aýypbaev júrgizip kele jatqan kólik bir aýnap, shetke ushyp túsken. Abyroı bolǵanda, toptaǵy úsh jigitke zaqym kelmedi. Al tizginde otyrǵan Jiger ornynan qozǵala almaı qalǵan.

Oqıǵa ornyna jetken jedel járdem qyzmetkerleri Jigerdi qalalyq №12 aýrýhanaǵa alyp ketti. Qazirgi tańda Jiger em qabyldap jatyr. Aıta keteıik, 10 aqpan kúni “Melomen” toby jáne Jiger Aýypbaev ózi basty roldi somdaǵan “72 saǵatta úılený” fılminiń tusaýkeserine qatysý kerek bolǵan.