Biriniń júregi aýyryp, ekinshisiniń júregi dirildep júrgen úmitkerlerge Halyq artısi Maqpal Júnisovanyń óz aıtary bar. Halyqtyń erkesi Maqpal Júnisovaǵa da kezinde depýtat bolýǵa birneshe ret usynys túsipti. Alaıda, osy bir syńǵyrlaǵan kúlkisi bárine kedergi keltiripti. Oǵan qosa ánshi sahnada án aıtpasa, basynyń saqınasy ustap qalady eken, - dep habarlaıdy 31-arna «Juldyzdar jarqyraıdy» habarynda.
Al, byltyr tanymaldylyǵy jaǵynan talantty ánshilerdiń ózin basyp ozǵan MS Saılaýbektiń baǵy ashyldy. Túsiniksiz tilde án shyrqap ǵalamtordy dúr silkindirgen reperdi musylmandar odaǵy depýtat minberinen kórgisi keletinin ashyq bildirgen bolatyn.
Alaıda, biraz óner ıeleri tapsyrystar joq dep shetelde kósilip demalyp jatqanda reperdiń jumysy qaýyrt. Múldem bos ýaqyty joq. Degenmen, ol el qalaýlysy bolǵysy keledi. Biraq, ol úshin tanymaldylyǵymdy odan saıyn arttyrýym kerek degen reper bar kúshin salyp jatyr.
Sonymen qatar MS Saılaýbek saılaýǵa bıyl qatyspaǵanymen, bolashaqta baǵyn synaýǵa dámeli. Reper búginde sol mandatqa saı bolý úshin sheshendik óner dáristerine qatysyp júr.
Saılaýǵa qatysý úshin, partıa tizimine ilikken Qaırat Nurtas pen Janar Duǵalova ózge áriptesterine qaraǵanda kóp synaldy. Bul jáıtqa beı-jáı qaraı almaǵan Qaırattyń anasy ári prodúseri Gúlzıra Aıdarbekova óziniń pikirin baspasóz betterinde ashyq jarıalaýǵa kóshken. Osy máselege baılanysty suhbat alý úshin biz de habarlasqan edik, emdelip jatqanyn aıtyp, tek telefon arqyly jaýap berdi.
Tipti, túrli áleýmettik jelilerde Qaıratty kelemejdeıtin sýretterdi kórgen Gúlzıra hanym olardy bireýler qasaqana jasap otyr degen pikirde. Al Qaırattyń ózi depýtattyq úshin ónerden de bas tartýǵa daıyn eken. Al, Qaırattyń aldyndaǵy býynnyń saılaýǵa qatysty pikiri ár túrli.
Al, ánshi Janar Duǵalovanyń eks-prodúseri Baıan Esentaeva onyń depýtattyqqa usynylyp jatqanyn estigende:
«Duǵalova depýtat bolatyndaı eshteńe bitirgen joq» dep birden oıyndaǵysyn aıta salǵanyn jasyrmaıdy. Keıin aqylǵa salyp, óz pikirin ózgertken.
Degenmen, májilis depýtaty mandatyna shoý-bıznes ókilderi men sport maıtalmandaryn tartý ıdeıasy tańsyq dúnıe emes. Alaıda, shetelde olardy saılaý naýqanyna atsalysý úshin ǵana tartatyn kórinedi. Al, dodada kimniń atqa shaýyp, kimniń bosqa shapqany bir jarym aıda-aq anyqtalady.
Pikir qaldyrý