«Turǵyn úı qurylys jınaq banki» salymshylarynan ótemaqy tóleýge baılanysty qosymsha kelisimder qabyldaýdy bastaıdy. «Qazaqstannyń Turǵyn úı qurylys jınaq banki» AQ 467 myńnan asa shart ıelerine, onyń ishinde salymynda 1 mıllıon teńgeden joǵary qarjysy bar salymshylaryna ótemaqy tóleıdi. Ótemaqy tólenetin salymdardyń jalpy somasy búginde 171,9 mıllıard tengeni qurap otyr, - dep habarlaıdy «Qamshy» portaly Zakon.kz -ke silteme jasap.

Baǵam aıyrmashylyǵy búdjet qarajaty esebinen jáne banktiń menshikti qarajatynan tólenedi. QTQJB baspasóz qyzmetiniń habarlaýy boıynsha, salym somasyna eshqandaı shekteýler qoıylmaǵan. «Turǵyn úı qurylys jınaq bankinde» 2015 jyldyń 18 tamyzyna deıin ashylǵan depozıtterdegi salymdarǵa ǵana ótemaqy tólenedi. Al, mynandaı jaǵdaılarda TQJ salymyna ótemaqy tólenbeıdi: «Salym 2015 jyldyń 18 tamyzyna deıin berilgen turǵyn úı, aldyn ala turǵyn úı jáne aralyq turǵyn úı zaemdary boıynsha qamtamasyz etýde turǵan bolsa; Aqsha salý kúnine baspanany satyp alý-satý sharttary nemese Qazaqstan Respýblıkasy Prezıdentiniń 2007 jylǵy 20 tamyzdaǵy №383 Jarlyǵymen bekitilgen Qazaqstan Respýblıkasyndaǵy turǵyn úı qurylysynyń 2008-2010 jyldarǵa arnalǵan Memlekettik baǵdarlamasy aıasynda keıinnen satyp alýmen jalǵa alý sharty, Qazaqstan Respýblıkasy Úkimetiniń 2014 jylǵy 28 maýsymdaǵy №728 qaýlysymen bekitilgen «Óńirlerdi damytýdyń 2020 jylǵa» deıingi baǵdarlamasy, óńirlik turǵyn úı baǵdarlamalary aıasynda jasalǵan bolsa; Banktiń ishki qujattarynda kózdelgen jaǵdaılardy qospaǵanda, belgilengen merzim aıasynda qosymsha kelisimge qol qoıylmaǵan jaǵdaıda», - delingen habarlamada.

Turǵyn úı qurylys jınaq sharttaryna jasalatyn qosymsha kelisimge qol qoıý 2016 jyldyń 8 aqpanynan bastalyp, 1 maýsymyna deıin jalǵasady (sońǵy qabyldaý kúni - 2016 jyldyń 31 mamyry). Ótemaqy alý úshin QTQJB-men jasalǵan kelisimge www.egov.kz portalynda nemese Banktiń www.hcsbk.kz resmı saıtynda elektrondyq-sıfrlyq qoltańba arqyly qol qoıý kerek.

Eske sala keteıik, ulttyq valúta baǵamy ózgeriske ushyraǵannan keıin Memleket basshysy Úkimetke QTQBJ salymshylarynyń jınaǵyn saqtaý boıynsha derbes mehanızm qarastyrýdy tapsyrǵan bolatyn. Ótken jyldyń sońynda «Báıterek» basqarýshy holdıńi QR Qarjy mınıstrligimen, Ulttyq ekonomıka mınıstrligimen, Investısıa jáne damý mınıstrligimen ári Ulttyq Bankpen birige otyryp, ótemaqy tóleýdiń ońtaıly tetigin ázirlegen edi. Jalǵyz aksıoner bekitken jyldyq qarjylyq eseptilik jáne qarjy bólý týraly Úkimet Qaýlysyn qabyldaǵan sátten bastap kúshine enetin barlyq qajetti qujattar banktiń www.hcsbk.kz resmı saıtynda ornalastyrylǵan jáne olarmen tanysýǵa bolady.