تۇندە استانا قالاسىندا سالىنىپ جاتقان «ابۋ-دابي پلازا» مۇناراسىندا ءورت بولىپ، ونى ءسوندىرۋ جۇمىستارىنا كومەك كورسەتۋ ءۇشىن كوككە تىكۇشاق كوتەرىلگەن، - دەپ حابارلايدى «قامشى» پورتالى Tengrinews.kz-كە سىلتەمە جاساپ.

قۇرىلىسى 2010 جىلى باستالعان، 2017 جىلى پايدالانۋعا بەرىلۋى ءتيىس نىساننىڭ قۇرىلىس ورنىندا تۇندە ءورت شىعىپ، ول تۋرالى حابار ءورت ءسوندىرۋ قىزمەتىنە ساعات 04.40-تا تۇسكەن. ون مينۋت ىشىندە وقيعا ورنىنا جەتكەن ءورت سوندىرۋشىلەر الاپات ورتكە تاپ كەلگەن. ءورت مۇنارانىڭ 11-25 قاباتتارىنىڭ ارالىعىن شارپىعان.

ءورتتى سوندىرۋگە بارلىعى 78 ءورت ءسوندىرۋشى مەن قۇتقارۋشى، 27 ءورت ءسوندىرۋ-قۇتقارۋ تەحنيكاسى، باسقا دا 12 تەحنيكا مەن استانا قالاسى ءىىد جەكە قۇرامىنان 24 ادام جۇمىلدىرىلعان. سونداي-اق، ءورت اۋقىمىن ناقتى باعالاۋ ءۇشىن «قازاۆياقۇتقارۋ» قىزمەتىنىڭ «ەۋروكوپتەر-145» تىكۇشاعى اۋەگە كوتەرىلگەن.