ۋكراينا اسكەرى قىرىم ايماعىنا اتتاندى. ارينە، ءوز تەري تورياسىن قورعاۋ – ولاردىڭ مىندەتى. ۋكراين بيلىگىنىڭ بۇل قادامىن بارلىق ۋكراين جۇرتى قوس قولداپ قۇپتاپ وتىر. ويتكەنى ىرگەسىنە كەلگەن جاۋ ەرتەڭ تورىندە وتىراتىنىن ءبىلدى ولار. ءسويتىپ، ميلليونداعان ۋكرايندى، ميلليونداعان قازاقتى قىرعان كەشەگى سوۆەت وداعىنىڭ مۇراگەرى رەسەي ەلى ءالى دە يمپەريالىق پيعىلىنان ايىعا الماي وتىر. ءتىپتى باسا كوكتەپ كورشى ەلدىردىڭ شەكاراسىنان اتتاپ ءوتۋدى ادەتكە اينالدىردى.
ايتپاقشى، ەلباسى نۇرسۇلتان نازاربايەۆتىڭ رەسەي ساپارىنان كەيىن شۇعىل جينالىس اشىپ، قورعانىسىمىزدى كۇشەيتۋ جونىندە بەرگەن تاپسىرماسىن بىلايعى جۇرت قۋانا قابىلداعان. ءتىپتى بۇل رەسەيدەن قورعانۋدىڭ العاشقى سيگنالى دەپ تە ۇعىنعاندار بولدى. سولاي-اق بولسىن دەپ تىلەيىك. دەگەنمەن قازاقستاننىڭ رەسەي مەملەكەتىمەن تىعىز، قويان-قولتىق ارالاستىعىن ەسكەرسەك، الداعى كۇندە بولۋى مۇمكىن رەسەي-ۋكراينا سوعىسىندا ءبىزدىڭ ەل ورىستاردىڭ سويىلىن سوعىپ جۇرمەسە بولعانى. بۇل ءتىپتى ابدەن مۇمكىن.
مۇنداي قادامنىڭ قۇداي بەتىن ارى قىلسىن. ويتكەنى ۋكراينادا ءبىزدىڭ باۋىرلاستارىمىز تاتارلار بار. ولاردىڭ نيەتى دە رەسەيدەن ىرگەسىن اۋلاققا سالۋ. ءتىپتى ونى ايتپاعاندا سوۆەت وداعىنىڭ قاندى شەڭگەلىنەن بوساعان تاۋەلسىز ەلدەر بىر-بىرىنە وق اتىپ جاتسا، بۇل – رەسەيدىڭ قۇشاعىنا قايتا قۇلاۋمەن بىردەي.
بولاشاققا باعىتتالعان، مەملەكەتتىڭ تاۋەلسىزدىگىنە تىكەلەي قاتىستى كەز كەلگەن كەلىسىمگە حالقىمەن اقىلداسپاي باراتىن ءبىر بيلىك بولسا، ول – ءبىزدىڭ قازاق بيلىگى. ەۋرازيالىق ەكونوميكالىق وداق – سونىڭ ءبىر عانا دالەلى. قازاق بيلىگى وسى ادەتىمەن بۇكىل الەم نازارىن وزىنە اۋدارىپ وتىرعان رەسەي-ۋكراينا قاقتىعىسىنا دا قازاق جۇرتىمەن اقىلداسپاي، اسكەرلەرىمىزدى رەسەيدىڭ ىقپالىنا جىعىپ بەرمەسە بولعانى.
