قازاق كينوسىنىڭ سوڭعى ۋاقىتتاعى اياق الىسى جامان ەمەس. «وسكاردى» ويىپ الا الماسا دا، وتاندىق كينو نارىعىنا شىعۋدا. كورەرمەن تاراپىنان قىزۋ پىكىرتالاسقا ءتۇسىپ، وڭ نە تەرىس باعاسىن الىپ جاتقان فيلمدەر بارشىلىق. ال، مەرەكەنىڭ الدىندا عانا بەلگىلى پروديۋسەر بايان ەسەنتايەۆانىڭ «ابايلاڭىز سيىر» اتتى كومەدياسى تۇساۋى كەسىلىپ، قالىڭ كوپشىلىككە جول تارتقان ەدى. باستى رولدەردى پروديۋسەر بايان ەسەنتايەۆانىڭ ءوزى جانە ايگۋل يمانبايەۆا، ازامات ساتىبالدى سىندى بەلگىلى اكتەرلەرلەر سومدايدى. ءفيلمنىڭ ۇزىن-ىرعاسى مىناداي: 90- جىلدارى ايگۇل مارات قىزى اتتى تولىق قىز اۋىلداعى مازاققا توزە الماي، قالادا ءبىلىم الىپ، بويىن رەتكە كەلتىرىپ، جىپتىكتەي ازاماتشا، بيزنەس حانىم بولىپ اۋىلىنا ورالادى. ءسويتىپ، اۋىل اكىمىنىڭ سايلاۋىنا تۇسەدى... فيلم ءوزىن «سۇرىقسىز» سەزىنەتىن قىزدىڭ اققۋداي سۇلۋعا اينالاتىنىن جانە ەشكىمنەن كەم قالمايتىنىن ايتقىسى كەلگەندەي. جارىققا شىققانىنا اپتا وتپەسە دە، كينوسۇيەر قاۋىم ءفيلمنىڭ «جىلىكتەپ» تاستاعان سىڭايلى. بۇگىندە الەۋمەتتىك جەلىلەردىڭ «ترەندىنە» اينالىپ وتىر. قىزىق، كاسسالى بولسىن دەپ ويلاعان فيلم جاساۋشىلارى ماقساتتارىنا جەتە الدى ما ەكەن؟ كوپشىلىكتىڭ پىكىرىنە جۇگىنەيىك...
ايگەرىم كەۋلىمجاي ەسىمدى قىز فيلم تۋرالى اسەرىن بىلاي جەتكىزەدى: «ابايلاڭىز، سيىر» دى كورىپ شىقتىق. ءبىر كورۋگە بولاتىن تۋىندى. اراسىندا كۇلىپ قويىپ، كوتەرىڭكى كوڭىل كۇيمەن قارادىم. كوپ نارسە ەتەنە تانىس بولعاسىن (اجەلەردىڭ ەتتى قولمەن جەگەندەگى كورىنىس، مىسالى) جاقىن تارتپاي قويمادى. اكتەرلەردەن باياننىڭ ويىنى ۇنادى. ءپوزيتيفتى، كورۋگە شاقىرامىن»، -دەگەن ەكەن.
ال، فب قولدانۋشىسى ماحاببات ەسەن فيلمگە وڭ باعا بەرەدى: "ءفيلمدى كورگەندە مەندە ءارتۇرلى كوڭىل-كۇي بولدى. ءبىر كۇلىپ الىپ، «مەن بۇل جەردە نە ىستەپ وتىرمىن؟» دەگەن تۇسىنىكسىز ساتتەر دە ءوتتى. اۋىلدى جەردە بولعان ادامعا فيلمدە نارسە كوپ تانىس: اۋىل قالجىڭى، اكىم، مەكتەپ ديرەكتورى، ايەلدەر. مەنىڭ ويىمشا، وتە تاماشا تۋىندى. قازاقستان دەگەندە تەك استانا مەن الماتى دەپ ويلايتىندار ءۇشىن، اۋىلدى مەنسىنبەيتىن قالاشىلدارعا اۋىل ادامدارىنىڭ ىشىندە دە ينتەللەنتتىلەردىڭ بار ەكەنىن، ولاردىڭ دا تابىسقا جەتە الاتىنىن دالەلدەدى. جولى بولعىش قىز – ءبىزدىڭ زامانىمىزدىڭ ناعىز «فانتاستيكالىق» كەيىپكەرى. شىنايى كورىنىستەر...كينو «وسكاردىڭ» دەڭگەيىندە بولماسا دا، ءسىز بەن ءبىزدىڭ قاراپايىم ءومىرىمىزدىڭ ءبىر كورىنىسى. بۇل ءفيلمدى ءبىز كورۋىمىز كەرەك! سەبەبى، وتاندىق كينو سالاسىن قولداۋ- پارىزىمىز!»- دەپ بارشا كورەرمەنگە ءوزىنىڭ جاقسى اسەرلەرىن ايتا وتىرىپ، ءفيلدى كورۋگە شاقىرادى.
«ابايلاڭىز، سيىر!» فيلمىندە ەپيزودتاعى رولدە ويناعان التىن ماقسات قىزى (اتى وزگەرتىلدى) فيلمگە كىرمەي، قىسقارتىلىپ كەتكەن تۇستاردىڭ كوپ ەكەنىن ايتادى. ول: «ءتۇسىرىلىم الاڭىندا بولدىق. كەلىندەر سايىسى سەكىلدى ادەمى كورىنىستەر كىرمەي قالىپتى. اۋىل كەلىندەرىنىڭ ايگۇل ماراتقىزىنان ۇلگى الاتىنى، كيىم كيىنۋدى ۇيرەنۋى ت.ب. ال، فيلمدە ول كەلىندەردى تەك كۇيەۋلەرىنە قارسى قوياتىنى تۋرالى كورسەتىلگەن. باس كەيىپكەردىڭ باتىلدىعىنا ريزا بولدىم. ءوزىن دالەلدەيمىن دەپ العا قاراي ۇمتىلادى. موتيۆاسيا باسىم! سايلاۋدان ۇتىلىپ قالىپ، اۋىلدان قۋىلىپ، اكىم رەتىندە باسقا ادامدى سايلانعاندا ول مويىمايدى. قانشا مىقتى بولسا دا، ءوزىنىڭ السىزدىگىن كورسەتىپ، ەر ادامعا باسىن يەدى. تاربيەگە ۇيرەتەدى. فيلمدە كادرلار كەلتە الىنعان. ءفيلمنىڭ اۋراسىنا كىرە المايسىڭ.. ءبىر ەپيزودتا ميكروفوننىڭ توعى كورىنىپ قالعان... ءبىراق، مۇنداي فيلم دە كەرەك. ەڭ باستىسى، فيلم ەسەنتايەۆانىڭ تانىمالدىعى ءۇشىن تۇسىرىلگەن. ياعني ونىڭ ءيميدجى ءۇشىن. ول ءوزىن باسقا قىرىنان كورسەتكىسى كەلگەن.
ال، قازاقتاندىق فيلمدەردى مۇلدە كورمەيتىن، ءتىپتى كورگىسى كەلمەيتىن اسقار ۇزابايەۆ ەسىمدى كورەرمەن بۇل فيلمدە ادامدى كەمسىتۋ، جىككە، توپقا ءبولۋ وتە باسىم جانە بۇل ەلىمىزدىڭ مادەنيەتسىزدىگىن كورسەتەدى دەپ اشىنادى: «قازاقستان قاشان مادەنيەتتى، ادامدى ونىڭ تەك ادام بولعانى ءۇشىن عانا سىيلاي الاتىن دەڭگەيگە جەتەدى. فيلدەگىدەي سەمىز بولعانى ءۇشىن مازاقتايتىن «ورتاعاسىرلىق» سانادان ادامزات الدەقاشان الىستاپ كەتكەن. ءفيلمنىڭ 1،5 مينۋتتىق ترەيلەرىن كورىپ-اق، تولىق ادامدارعا دەگەن جەركەنىشتى كوزقاراستى قالىپتاستىراتىنىن بايقادىم. ايتاتىن نەسى بار، ەسەنتايەۆا كەرەمەت شەبەرلىكپەن سەمىزدىڭ ءرولىن سومداپ شىققان، ءتىپتى ۇساق-تۇيەك نارسەلەردىڭ ءوزى مادەنيەتسىزدىكتى كورسەتىپ تۇر. ولاردىڭ تۇسىنىكتەرىندە، سەمىز ادامداردىڭ ىشىندە تاربيەلى، ءوزىن كۇتە الاتىندار جوق. ال، ارىقتاعان بويدا وعان مادەنيەتتىلىك قايدان كەلە قالادى؟ سوندا، سەمىزدەر «سيىر ما؟». اقش-تا تولىق ادامدارعا دەگەن تەرىس كوزقاراستى جويۋ ءۇشىن ءتۇرلى شارالار جاسالادى. ال، بىزدە وسىنداي ادامدى ونىڭ دەنەسىنە قاراپ، جىككە بولەتىن فيلم تۇسىرەدى. قازاقستان ءۇشىن ۇيالامىن! ۇيات-اي!».
كورەرمەننىڭ ويى وسى. كەز-كەلگەن فيلم ءوزىنىڭ ايتار ويىمەن قۇندى، سونىسىمەن ەستە قالادى. ارينە، ادامدى ونىڭ دەنە بىتىمىنە قاراي كەمسىتۋ ۇيات نارسە! الايدا، مۇنداي «ابايلاڭىز، سيىر» سەكىلدى فيلمدەر سوڭى اۋرۋعا اكەلەتىن سەمىزدىكتىڭ الدىن-الۋعا كومەكتەسەتىن بولار دەپ سەنەيىك.
