«28 پانفيلوۆشىلار» تۋرالى اڭىزدى جوققا شىعارعان رەسەي مەملەكەتتىك مۇراعاتىنىڭ باسشىسى سەرگەي ميرونەنكو لاۋازىمىنان بوساعانىن اقپارات قۇرالدارى جارىسا جازۋدا.

مۇراعات باسشىلىعىنان بوساعان س. ميرونەنكو بۇدان بىلاي سول مەكەمەدە عىلىمي قىزمەتشى رەتىندە جۇمىسىن جالعاستىراتىن بولادى.

ازاتتىقتىڭ ورىس رەداكسياسىنا بەرگەن سۇحباتىندا ول لاۋازىمدى قىزمەتتەن كەتكەنمەن، بىلتىرعى ايتقاندارىنان اينىمايتىنىن، ءالى دە وتىرىك تاريح جاساعىسى كەلمەيتىنىن مالىمدەگەن. ياعني، قانشا قىزمەتتەن قۋ، قانشا جەردەن تەرىستەسە دە، تاريحتا بولماعان، ويدان قۇراستىرىلعان «28 پانفيلوۆشىلار» ەرلىگى دەگەن اڭىزدى مويىندامايتىنىن، حالىقتى بۇدان ءارى الداۋعا ارى شىدامايتىنىن ايتقان.

ءبارى دۇرىس. مۇراعات باسشىسى ءوز ويىن ايتتى جانە ول ويى جالاڭ پىكىر نە ۇران ەمەس، كسرو باس پروكۋراتۋراسى باستاعان رەسمي مەكەمەلەردىڭ مۇراعات دەرەكتەرىمەن قۋاتتالادى.  

ولاي بولسا، وسى وقيعا تۋرالى اقپاراتتارعا يمانداي سەنىپ جۇرگەن بىزگە نە جوق؟! كسرو حالقى ۇلى وتان سوعىسى اتاعان ەكىنشى دۇنيەجۇزىلىك سوعىسقا 1 196 164 ادام اتتاندىرعان (بۇل سول كەزدەگى قازاقكسر حالقىنىڭ (6،5 ملن) 20 پايىزىنا تەڭ)، ولاردىڭ 601 939-ى مايدان دالاسىندا كوز جۇمدى) قازاقستاندا ۇلىقتايتىن باسقا باتىر جوق پا؟ ۇلگى ەتەر تۇلعا تاپپادىق پا؟ قاسىم قايسەنوۆ، راقىمجان قوشقاربايەۆ، باۋىرجان مومىش ۇلى، تولەگەن توقتاروۆ، ءاليا مولداعۇلوۆا، مانشۇك مامەتوۆا باستاعان قازاق باتىرلارىنىڭ ەسىمدەرى وداقتاس ەلدەردىڭ بارلىعىنا ايان ەمەس پە؟ مايداننان تىس تىلداعى توگىلگەن تەر مەن بەسىكتەن بەلى شىقپاي جاتىپ اۋىر ەڭبەككە ارالاسقان جاس تاعدىرلار شە؟

ولاي بولسا، الماتى ورتالىعىنداعى 28 پانفيلوۆشىلار اتىن يەلەنگەن ساياباقتى باسقاشا اتايتىن ۋاقىت كەلدى ەمەس پە؟ تەك الماتىداعى عانا ەمەس، تۇتاستاي رەسپۋبليكا اۋماعىنداعى اسەم دە ۇلكەن ساياباقتىڭ ءبىرىن تاريحى كۇماندى وقيعاعا تەلۋىمىز تەك تاريحقا عانا ەمەس، ۇلتتىق سانا مەن جاڭا زامانداعى ءتول يدەولوگيامىزعا قيانات ەمەس پە؟

بيىلعى جىلى ەل اۋماعىندا اتاۋلى داتالار بىرىنەن سوڭ ءبىرى كەلىپ وتىر. ۇلت-ازاتتىق كوتەرىلىستىڭ 100 جىلدىعى، جەلتوقسان كوتەرىلىسىنىڭ 30 جىلدىعى، تاۋەلسىزدىكتىڭ 25 جىلدىعى، الاش كوسەمى ءاليحان بوكەيحان ۇلىنىڭ 150 جىلدىعى مەملەكەتتىك، الدى حالىقارالىق دەڭگەيدە اتالىپ وتۋدە. ارۋ قالامىز الماتى 1000 جىلدىق تاريحىن رەسمي مەرەكەلەۋ ۇستىندە. كەلەر جىلى الاش اۆتونومياسىنىڭ 100 جىلدىعى كەلە جاتىر دەگەندەي.

وسى ايتۋلى وقيعالاردىڭ ءمان-ماڭىزىن قوعام ساناسىنا ءسىڭىرۋ، ۇلتتىق قۇندىلىقتار مەن تاريحي تۇلعالارىمىزدىڭ ەسىمدەرىن ۇلىقتاۋ ماقساتىندا قالا باسشىلىعى كەڭەستىك يدەولوگيا سىرقاتىنان ادا، ەگەمەن ەلدىڭ تاۋەلسىز قۇندىلىقتارىنا قىزمەت ەتەتىن ناقتى شەشىم شىعارادى دەپ سەنەمىز. وتارلاۋشى ەلدى قورعاۋعا شاقىراتىن (ۆەليكا روسسيا، ا وتستۋپات نەكۋدا  - پوزادي موسكۆا!) جالعان ۇراننىڭ ەندىگى جەردە باس قالامىزدىڭ تورىندە تۇراتىن رەتى جوق.

جومارت ابدوللا ۇلى