ءقازىر قانشا دابىرلاساق تا ءسوز ەركىندىگى بار. ەرىنبەگەن ۇيىندە وتىرىپ تا، باسپا ءسوز ارقىلى دا ۇكىمەتتى سىناي الادى. پرەزيدەنتتى دە جەردەن الىپ، جەرگە سالىپ جاتقاندار بار. دەپۋتاتتار دا سىننان تىس قالىپ جاتقان جوق. مەنىڭ قولىما قالام العىزىپ وتىرعانى دا – وسى دەپۋتاتتارعا جاسالىپ جاتقان شابۋىلدار.
قازاق دەسەڭ وزىڭە تيەدى. ءبىز وزىمىزگە كەلگەندە عانا باتىرمىز. ولاي دەپ وتىرعانىم سوڭعى بىرنەشە كۇن بويى دەپۋتاتتاردى، ونىڭ ىشىندە پارلامەنتكە وتكەن ساناۋلى عانا ۇلتجاندى جىگىتتەردى جەكسۇرىن ەتىپ كورسەتۋگە تىرىسۋشىلىقتى بايقاپ وتىرمىن. كەشە ءبىرقاتار تەلەارنادان سونداي حابارلار كوردىم. ونىڭ ارتىندا كىم تۇر، مۇنداي اڭگىمە كىمپگە كەرەكتىگى بولەك اڭگىمە. الايدا، مىناعان نازار اۋدارتقىم كەلەدى.
جەر ساتۋ تۋرالى اڭگىمە ءبىر بۇگىن شىققان جوق. 2000 جىلداردىڭ باسىندا يمانعالي تاسماعامبەتوۆ باستاعان ۇكىمەت العاش رەت جەر ساتۋ تۋرالى اڭگىمەنى باستادى. ول دا ۇلكەن داۋعا ۇلاسىپ، مينيسترلەر كابينەتى مەن ءماجىلىس اراسىندا ۇلكەن كەلىسپەۋشىلىك بولدى. ول كەزدە دە جەر ساتۋعا قارسى شىققان باسقا ەمەس، وسى دەپۋتاتتار ەدى.
بۇل جولى كەيبىر اقپارات قۇرالدارى پارلامەنتتى تەك نۇرتاي سابيليانوۆ پەن بەكبولات تىلەۋحان ۇستاپ تۇرعانداي، سول ەكەۋىنە شۇيلىگۋدە. ەكەۋىنىڭ قاي دەڭگەيدەگى ساياساتكەر ەكەنىن، بيلىك باسپالداقتارىنداعى سالماعىن جاقسى بىلەمىز. زاڭ شىعارۋشى ورگاننىڭ شەشۋشى رولگە يە بولا الماي وتىرعانىن ەسكەرسەك، ول ەكەۋى نە تىندىرا الادى؟ سونى ويلادىق پا؟ جوق، الدە «جاپتىم جالا، جاقتىم كۇيە» دەپ سوققىلاي بەرەمىز بە؟
بىلە بىلسەك، بۇعان دەيىن دە بىرنەشە رەت ماجىلىسكە دەپۋتات بولعان نۇرتاي ەل مەن جەرگە قاتىستى كوپتەگەن ماسەلەلەردى كوتەردى. شىعىس قازاقستاننىڭ ۇلان، ءۇرجار سىندى اۋداندارىنىڭ حالقى ول كىسىگە ءدان ريزا. سابيليانوۆ سول باعىتىنان ءازىر تايىپ كەتتى دەپ ويلامايمىن.
بەكبولات تىلەۋحانعا كەلسەك، ول دا ۇلتجاندى، قازاقتى قالاي ەل ەتسەك، ابىرويىن كوتەرسەك دەپ جۇرگەن جىگىت. ءتىلدىڭ جايىن تەك تەلەديداردان عانا ەمەس، پارلامەنت تورىنەن دە شىرىلداپ تۇرىپ ايتتى. قازاق ءتىلىنىڭ احۋالى تۋرالى ماسىموۆكە قاراتا جاساعان ۇندەۋىن نەگە ۇمىتا قالدىق؟ بۇرىنعى دا، قازىرگى دە دەپۋتاتتاردىڭ ىشىندە كارىم ماسىموۆكە وسىلاي باتىل ساۋال جولداعان باسقا دەپۋتات بار ما؟ تاپپايسىز. مۇنى ءبىراق ەشكىم ويلاپ وتىرعان جوق. ايتەۋىر قارالاساق، كۇستانالاساق بولدى دەگەن ماقسات بارىنىكى.
وسى جولى شۋ بولىپ وتىرعان جەر ساتۋ ماسەلەسى پارلامەنتتىڭ وتكەن شاقىرىلىمىندا زاڭعا ەنىپ كەتكەنىن بارلىقتارىڭىز بىلەسىزدەر. ول كەزدە بەكبولات تىلەۋحان دەپۋتات ەمەس ەدى. بەكتىلىپ كەتكەن، ەلباسى قول قويىپ تاستاعان زاڭدى قايتا قاراتاتىن قۇدىرەت ولاردا جوق. ونداي بولماعان دا. ەڭ بولماعاندا وسىنى نەگە ەسكەرمەيمىز؟!
ول ەكەۋى دە ماعان ەشقانداي جاقىندىعى جوق ادامدار. ءبىرى شىعىستىڭ جىگىتى، ەكىنشىسى ارقانىڭ ازاماتى. سول ءوڭىر حالقى دا ازاماتتارىنا اراشا تۇسەدى دەپ ويلايمىن.
كەشە تەلەديداردان «كتك»، «31-كانال» كوممۋنيستىك پارتيانىڭ دەپۋتاتى ۆ. كوساريەۆتى قاھارمان ەتىپ كورسەتۋدە. قازاققا جانى اشيتىندار جەرىمىزدى اياۋسىز جىرتىپ، ەرروزياعا ۇشىراتقان سول كوممۋنيستىك بيلىك ەكەنىن نەگە ۇمىتادى؟ داۋلى ماسەلەنى، حالىقتىڭ جاندى جەرىن وزىنە ابىروي جيناۋ ءۇشىن پايدالانىپ وتىرعان كوساريەۆتى كوسەم كورگەنىمىز قالاي؟ مەنىڭ ويىمشا، جەر ماسەلەسىن ەندى ءبىر شەشسە، پرەزيدەنت شەشەدى. بىلتىر قابىلدانعان زاڭدى دا، بيىلعى ۇكىمەتتىڭ باستاماسىن دا تەك سول كىسى عانا ءبىر جاقتى ەتە الادى. سوندىقتان دا، قۇر دابىرا جاساماي، ءىستىڭ وڭ شەشىلەتىن جولدارىن ىزدەيىك. بارلىعىمىز بەكبولاتتى كۇستانالاپ جۇرگەندە، شىنىمەن دە جەرىمىز ساتىلىپ كەتپەسىن!
ءسارۋار اينابەكوۆ،
زەينەتكەر، «مۇرات» شارۋا قوجالىعىنىڭ باسشىسى
قوستاناي وبلىسى جانگەلدين اۋدانى
