ەڭ اۋەلى، «ءبىزدىڭ پورتالدىڭ ينتەرنەت-كونفەرەنسياسىنا قاتىسساڭىز قالاي بولادى؟» دەپ شاقىرعان qamshy.kz سايتىنىڭ ۇجىمىنا العىسىمدى بىلدىرە كەتكىم كەپ وتىر. 3-4 كۇندەي جۇرگەن ينتەرنەت-كونفەرەنسيادا سۇراق قويىپ، بەلسەندىلىك تانىتقان «قامشىنىڭ» بارشا وقىرماندارىنا راحمەت ايتامىن!
ال، ەندى سۇراقتارعا كوشەيىك.
"تاۋەلدىمىز، ءبىز سورلىمىز" دەيتىندەردى سۋحانىم سۇيمەيدى
دينارا: مەن ءسىزدى “بۇگىنگى قازاق جىگىتى قانداي بولۋ كەرەك دەسە مىناۋ دەپ” كورسەتۋگە ءتيىس ازاماتىمىز دەپ باعالايمىن. سىزگە شىعارماشىلىق تابىس تىلەيمىن. قوياتىن سۇراعىم: ەلىمىز ءسىزدىڭ قاتارىڭىزداعى جاستارعا قانشالىقتى كوڭىل بولۋدە؟ نەمەسە ءبىزدىڭ جىگىتتەر وزدەرىن وسى ەلدىڭ تولىققاندى قوجاسى رەتىندە سەزىنە الا ما؟
جاۋاپ: نيەتىڭە، تىلەگىڭە كوپ راحمەت، اينالايىن! مەنەن 3-4 جاس ۇلكەن، مەنىمەن قۇرالپاس ازاماتتار مەن ازاماتشالاردىڭ بالالىق شاعى كەڭەس وداعى ىدىراپ، حالىقتىڭ توز-توزى شىققان الماعايىپ زامانعا تۇسپا-تۇس كەلدى. بوزبالالىق شاق تا اسا جىرعاعان جوق. ەسەسىنە، ءبىزدىڭ بۋىن كەڭەستىك يدەولوگيانىڭ تەمىر تىرناعىنا كوپ ىلىنە قويعان جوق. ءبىز ەلمەن بىرگە اشقۇرساق بولساق تا، ەركىن وستىك. سول زاماندا قايتا ويانىپ، سەرپىلگەن قازاقي سانا-سەزىمنىڭ اۋراسىندا ەرجەتتىك. تاۋەلسىز ەلدە ەركەلەپ جەتىلدىك. بولىپ جاتقان جاعدايعا تۇسىنىستىكپەن قارادىق. «مەملەكەت نەگە بۇيتپەيدى، بيلىك نەگە سويتپەيدى، بىزگە نەگە ءۇي بەرمەيدى، ءبىزدى نەگە جارىلقامايدى؟» دەگەن جوقپىز، قىسقاشا ايتقاندا مەملەكەتكە ماسىل بولماي، وزىمىزگە عانا سەندىك. سوعان ۇيرەندىك تە. باردى بار، جوقتى جوق دەۋ كەرەك. مۇمكىندىگىنشە ءادىل بولۋىمىز قاجەت. ول كەزدە مەملەكەتتىڭ ءوزى بىزدەي جاس بولدى. قالت-قۇلت باسقان ءار قادامىن جان-جاقتان الپاۋىت مەملەكەتتەر قاي جەردە سۇرىنەدى ەكەن دەپ ءجىتى باقىلاپ وتىردى. شەكارامىزدى بۇتىندەۋ كەرەك بولدى، ىشكى جانە سىرتقى ساياساتىمىزدى ءبىر قالىپقا ءتۇسىرىپ الۋىمىز كەرەك ەدى. ول كەزدە بيلىك باسىندا كىم بولسا دا، حالىقتىڭ امان قالۋى ءۇشىن وسى جولمەن جۇرەتىنى اقيقات.
ءبىز اياعىنا تىك تۇرىپ العان، ىشكى شارۋاسى تۇگەندەلىپ، ەندى سىرتقى ساياساتپەن عانا اينالىساتىن دامىعان، الەۋەتتى ەل ەمەس ەدىك. ال، ەندى وسى ۋاقىت ارالىعىندا ءبىزدىڭ بۋىن دا ەرجەتتى، ەتەك-جەڭىن قىمتادى. ويلانا باستادى، پىكىرىن تۇيىندەي باستادى. ءقازىر بىزدەن جاسى ۇلكەن، ءبىزدىڭ بۋىننىڭ ازاماتتارى ءوز ەلىنە ءتىل تيگىزگەنگە ورە تۇرەگەلەتىن بولدى. ەلدىڭ ەرتەڭىنە الاڭدايتىن بولدى. حالىقتىڭ جاعدايىن قايتسەك جاقسارتامىز دەپ تولعاناتىن بولدى. ەركىندىكتىڭ ءتاتتى ءدامىن سەزگەن سوڭ، ۇلتتىڭ وتكەن جولىن بىلگەن سوڭ، تاۋەلسىزدىكتى جوعالتىپ الۋ – ولىمنەن دە كۇشتى ەكەنىنە كوزى جەتتى. مۇندايدى ەلدىڭ قوجاسى ويلاماعاندا، كىم ويلايدى، ىستەمەگەندە كىم ىستەيدى؟ مەن ءوز باسىم، ءبىز بۇل ەلدىڭ قوجاسى ەمەسپىز، ءبىز تاۋەلدىمىز، ءبىز سورلىمىز، ءولىپ بارامىز، قۇرىپ بارامىز دەگەن جاماندىقتى شاقىراتىن، كەرتارتپا سوزدەردى ايتاتىن ىنجىق جىگىتتەردى سۋحانىم سۇيمەيدى. بۇل جەردى بىزگە قۇداي بەردى، وسى جەرگە ءبىزدى قونىستاندىردى. بىزگە اتا-بابامىز بۇل جەردى امانات ەتىپ تاستاپ كەتتى. سوندا وسى ۇلان-عايىر اتامەكەنىمىزدىڭ قوجاسى ءبىز ەمەي، كىم ەكەن؟ كەرەك بولسا، قورعايمىز، امان بولساق وركەندەيمىز!
ەرجان: - مەن ءسىزدى اقىن رەتىندە عانا ەمەس ازاماتتىعىڭىزدى كوبىرەك سىيلايمىن. سوندىقتان، بۇگىنگى قازاق ەلىندە قالىپتاسىپ وتىرعان ساياسي جاعدايعا قالاي قارايسىز؟ ءوزىڭىزدى بولاشاق پرەزيدەنت، مينيستر، اكىم رەتىندە ەلەستەتە الاسىز با؟ ياعني قازاقستاندا ءمانساپ ارقىلى حالىققا جۇمىس جاساۋعا بولا ما وسى…
ء-بىرىنشى سۇراققا بىلاي جاۋاپ بەرەيىن. بۇل جالعاندا قازاق - ۇلت رەتىندە كورمەگەنى جوق حالىق. بىزگە كوپ دۇنيە وڭاي كەلگەن جوق. ءالى دە، وكىنىشكە وراي، ءبىزدىڭ ەلدە قازاقتان باسقاسىنىڭ جاعدايى جاقسى. كوشپەندى حالىققا ءتان مىنەزىمىز بار، «بەس كۇن جالعان» دەي سالاتىن بولمىسىمىز دا بار. وسى بولمىستىڭ ارقاسىندا كوپ جاعدايدان قالىس قالىپ جاتاتىنىمىز تاعى راس. الايدا، مەملەكەت قازاقتىكى. سول سەبەپتەن، مەملەكەت ەڭ الدىمەن جەردىڭ يەسىنىڭ جاعدايىن جاساۋ كەرەك. قوعامنىڭ دا، مەملەكەتتىڭ دە مىندەتتەرى بار. مەملەكەت جاعداي جاساۋ كەرەك، قوعام سول جاعدايدى ءتيىمدى پايدالانۋ كەرەك.
ەكىنشى سۇراققا، كەلەسىدەي جاۋاپ بەرەمىن. مەنى ءتاڭىر اۋەلى ادام، سودان كەيىن اقىن قىپ جاراتتى. اقىننىڭ پارىزى – جاننىڭ تۇكپىرىندە بولاتىن قۇبىلىستاردى قاعاز بەتىنە ءتۇسىرۋ. قوعامداعى مىندەتىم – حالىقتىڭ ءسوزىن سويلەۋ. قازاقتا باسشى بولاتىن مەنەن ءبىلىمدى، مەنەن ايلالى، مەنەن ىقپالدى جىگىتتەر جەتىپ ارتىلادى.
اسىل : - اقبەرەن اعا! كونفەرەنسياعا كەلۋىڭىزدى قۇپتايمىز! سىزگە سۇراقتارىمىز جەتەرلىك. سەبەبى، سايتىڭىز ارقىلى ءبىراز تۇيتكىلدى ماسەلەگە قانىقسىز. ايتىڭىزشى، قازاقستان قايدا بارا جاتىر؟ رەسەيدىڭ قولتىعىنا كەلىپ تىعىلامىز، ال ولار توقىراۋدىڭ ءسال-اق الدىندا تۇرمىز. رەسەيگە تىعىلامىز دەپ باسقا ەلدەرگە جەكسۇرىن بولىپ وتىرمىز، مۇنىڭ سوڭى قايدا اپارادى؟
- بۇگىنگى پۋتيندىك رەسەيدىڭ مىنەز-قۇلقى قاتتى بۇزىلىپ تۇر. بۇل وزىنە دە، كورشىلەس جاتقان ەلدەر ءۇشىن دە جاقسى نىشان ەمەس ەكەنى بەلگىلى. مۇنداي پيعىلداعى مەملەكەتتىڭ ارەكەتتەرى جاقسىلىققا اپارمايدى. قاي زاماندا بولسىن، باسقىنشىلىقپەن كەلگەن بايلىق، جورىقپەن كەلگەن تابىستىڭ قايىرى بولعان ەمەس. دەمەك، رەسەي ءوزىن مەملەكەت رەتىندە كورگە تىعۋعا بارىن سالىپ جاتىر. مۇنداي ەلمەن بىزگە ەشقانداي وداققا كىرۋگە بولمايدى. امان تۇرعانىمىزدا ىرگەمىزدى اۋلاق سالىپ، الىستان سالەمدەسىپ وتىرعانىمىز ءجون بولماق. كەيبىرەۋلەر رەسەي قىرىمعا باسىپ كىرگەندەي، قازاقستاننىڭ سولتۇستىك ايماقتارىنا اسكەر كىرگىزۋى مۇمكىن دەپ ءجۇر. ەشتەڭەنى جوققا شىعارۋعا بولمايدى. الايدا، ءبىز ەۋروپادا وتىرعان جوقپىز. قۇداي بەتىن ارمەن قىلسىن، بىزگە ءقاۋىپ تونسە، ول كۇللى ورتالىق ازياعا تونگەن ءقاۋىپ بولىپ قابىلدانادى. ال، مىنا جاعىمىز جۇڭگو، مىنا جاعىمىزدا يران، ورتاازيالىق مەملەكەتتەر مۇنى وتە اۋىر قابىلدايتىنى انىق. مۇنى پۋتين جاقسى تۇسىنەدى. الەم رەسەيگە قاباق شىتىپ وتىرعان كەزەڭدى پايدالانىپ، بىزگە سولتۇستىك كورشىمىزدەگى قارىم-قاتىناستى ءوز ەسەبىمىزگە ءتيىمدى ەتىپ رەتتەپ العانىمىز ابزال.
ەلباسىنىڭ ەڭبەگىن جوققا شىعارۋ تىم ادىلەتسىز بولار ەدى
سامات : - اقبەرەن ءىنىم، ەڭبەكتەرىڭ بۇداندا ءارى جەمىستى بولا بەرسىن! مەنىڭ سۇراعىم، كەلىسسىزدەۋ بولسا دا سۇرايىن، ەڭبەگىڭە قاراي سىي-سىياپاتتى بەرگەن ۇكىمەتكە جانە ەلباسىنا قانداي كوز قاراستاسىز؟ بۇكىل ءبىر مەمىلەكەتتى جەكەگە اينالدىرىپ العان ادامدى، قالاي تۇسىنۋگە بولادى؟!
- راحمەت! مەن ءبىر سولكەبايدان عانا تۇراتىن «دارىن» سىيلىعى ءۇشىن ۇكىمەتتى جىرلاپ كەتكەن جەرىم جوق. الايدا، جازبالارىمدا دۇرىسىن دۇرىس، بۇرىسىن بۇرىس دەپ ايتقانىمنان تانبادىم، تانبايمىن دا. ۇكىمەتكە باعا بەرگىم جوق. ءبىزدىڭ ۇكىمەت سايلانبالى ەمەس، سوندىقتان ونىڭ شەشىمدەرى تاۋەلسىز شەشىمدەر ەمەس. ال، ەلباسىمىزعا كەلسەك، ول كىسىنىڭ ەڭبەگىن جوققا شىعارۋ تىم ادىلەتسىز بولار ەدى. ەلباسى قازاقتىڭ سىندارلى كەزەڭىندە ەلدىڭ ساياسي ساحناسىنا شىقتى، وزىنە ءتيىستى مىندەتتى اتقاردى، جۇرتتىڭ ىقىلاسىنا بولەندى، ەلى دە ەلباسىنا ريزا بولعان كەزدەرى دە جەتەرلىك. مەملەكەتتىك ينستيتۋتتار قانداي دا بولسىن قۇرىلدى، قاتەلىكتەر دە بولدى، مويىنداۋىمىز كەرەك، جەڭىستەرىمىز دە از ەمەس. ادام تابيعاتى شىدامسىز عوي، تەزىرەك بولسا ەكەن، بىردەن شارىقتاپ كەتسەك ەكەن دەپ تىلەيدى. ول دا زاڭدى. تىرىڭدە كورگىڭ كەلەدى ءبارىن. الايدا، ءبارى ەۆوليۋسيالىق جولمەن داميدى. ەلباسىنا باعانى مەن ەمەس، تاريح بەرەدى دەپ ويلايمىن.
ەرمۇرات : - پوەزياداعى ۇزەڭگىلەستەرىڭ تۋرالى نە ايتاسىڭ اكوش؟ كىم وزىپ، كىم توزىپ ءجۇر؟ شىن اقىن كىم؟ قۋاتىن كىم؟
- كوپتەگەن سۇحباتتاردا وسى تاقىلەتتەس سۇراقتار قويىلىپ جاتادى ماعان. مەن سىنشى ەمەسپىن جانە اناۋ توزدى، مىناۋ وزدى دەپ باعا بەرە المايمىن. بارىنە، ونىڭ ىشىندە ماعان دا تورەشى – ۋاقىت. قۋاتىن دا، تۋاتىن دا اقىندار جەتەرلىك. ونى ەندى وقىرمان ءوزى ەكشەپ، ۇناعانىن وقيدى، ۇناماعانىن ەلەمەيدى دە. ءبارى ءادىل.
اقجان: - قازىرگى قازنەتتىڭ اياق الىسى نا قانداي باعا بەرەر ەدىڭىز؟ ارينە، بۇل تەك مەنىڭ سۋبەكتيۆتى پىكىرىم، ءبىراق قازنەتتە تەرەڭ تالداۋ جوق سەكىلدى كورىنەدى ماعان. كوبىنە، كوپىرمە ءسوز، الاق-جۇلاق جازبالار، قىسقا ماقالالاردىڭ شەڭبەرىنەن شىعا الماي جاتىر. سىزدەردىڭ سايتىڭىزدا دا بۇل ماسەلە بار دەپ ويلايمىن. قازنەت مۇنداي ولقىلىقتى قايتسە جويادى؟
- قازاق ينتەرنەتى، ونىڭ ىشىندەگى قوعامدىق-ساياسي باعىتتاعى ينتەرنەت-رەسۋرستاردىڭ پايدا بولعانىنا اسا كوپ ۋاقىت بولعان جوق. ءوز باسىم بۇل باعىتتاعى جۇمىستى 2009 جىلدىڭ تامىز ايىندا ءوز قىزمەتىن باستاعان اباي.كز پورتالىنىڭ ىسكە قوسىلۋ كەزەڭىنەن بەرى تاراتامىن. اباي.كز ۇلتتىڭ مۇددەسىن قورعاۋ، قازاقتىڭ ءسوزىن باتىل ايتۋ مايدانىندا جالعىز ءوزى 2012 جىلعا دەيىن 3 جىل بويى ايقاسىپ كەلدى. سوڭعى ەكى جىلدا قازاق ينتەرنەت كەڭىستىگىندە ۇلتتىڭ ۇستانىمى مەن قاجەتتىلىگىن اشىق ايتا الاتىن بىرنەشە پورتال پايدا بولدى. قاراپ وتىرساڭىز، سوڭعى ەكى جىلدا جۇمىسىن جۇرگىزىپ كەلە جاتقان «جاقسى. kz»، «قامشى. kz»، «شىن. kz»، «نامىس. kz»، «ۇلت. kz» سەكىلدى سايتتاردىڭ كونتەنتى العاشىندا بىر-بىرىنە ۇقساس بولعانمەن، ءقازىر جاريالايتىن ماتەريالدارى ءارتۇرلى بولا باستادى. دەمەك، ساپاعا قاراي باعىتتالعان جۇمىس ءجۇرىپ جاتىر. ەڭ وڭاي شارۋا – سايت اشۋ. ونى جۇرگىزۋ، وقىرماندى تارتىپ قانا قويماي، سول ءقادىرلى وقىرماندى ۇستاپ تۇرۋ – قيىننىڭ قيىنى. ەگەر، ءبىز جانە ءبىزدىڭ ارىپتەستەر ناشار دۇنيە ۇسىنىپ جاتساق، بۇل سايتتارعا وقىرمان باسىن دا سۇقپاس ەدى. تەرەڭ تالداۋلار، ەكونوميكالىق ساراپتامالار جاساۋ ءۇشىن، قىزىقتى سۇحباتتار الۋ ءۇشىن ارينە ۇلكەن ۇجىم، بىلىكتى جۋرناليستەر كەرەك. ال، ولارعا الاڭسىز جۇمىس جاساۋ ءۇشىن قاجەتتى ەڭبەكاقىسىن، قالاماقىسىن تولەۋ كەرەك. ونداي مۇمكىندىك قازاق سايتتارىندا وكىنىشكە وراي ازىرگە جوق.
استانالىق اقىن ءىنىڭىز : - “الاڭ” باعدارلاماسىندا ۇلت پورتالىندا 2 ادام عانا جۇمىس ىستەيمىز دەدىڭىز. سول راس پا؟ راس بولسا، ءبىرى ءسىز، ەكىنشىسى جومارت ايتقازى. 2 ادام عانا بولساڭىزدار دا بىرنەشە ءتىلشى، بىرنەشە ديزاينەر، بىرنەشە مەنەدجەر ۇستايتىن بيلىكشىل، نۇروتانشىل سايتتاردان رەيتينگىلەرىڭىز دە، بەدەلدەرىڭىز دە جوعارى. «ۇلت» پورتالىنىڭ تانىمال بولۋىنىڭ سىرى نەدە؟ جانە استاناداعى باسقوسۋلاردا بايقاعانىم جومارت ايتقازى ۇنەمى ءسىزدىڭ قاسىڭىزدا جۇرەدى. سىزدەر سىرت كوزگە مافيوزدار سياقتى كورىنەسىزدەر. بولاشاقتا قازاقستانداعى كلانداردىڭ ءبىرى بولا الاسىزدار ما؟
- سۇراعىڭىز قىزىق ەكەن)). ءيا، شىنىمەن ءقازىر «ۇلت.kz» سايتىندا ەكى ادام جۇمىس ىستەيدى. ءبىزدىڭ نەگىزگى مىندەتىمىز – اۆتورلارمەن جۇمىستى ۇيلەستىرۋ، قازاقتىڭ جانە الەمنىڭ اقپاراتتىق كەڭىستىگىندە بولىپ جاتقان پروسەسستەردى ءجىتى قاداعالاپ وتىرۋ، دەر كەزىندە سول ۇدەرىستەرگە قاتىستى ماتەريال دايىنداۋ، سول ارقىلى قازاق وقىرمانىن حاباردار ەتىپ وتىرۋ. بۇگىنگى تاڭدا ۇلت.kz سايتىنىڭ تۇراقتى اۆتورلارى بار. ءبىز ولاردىڭ بەلسەندىلىگى ءۇشىن، باتىل قوعامدىق پوزيسيالارى ءۇشىن ءاردايىم ريزا بولىپ وتىرامىز. قۇدايعا شۇكىر، سايتتىڭ ەلەكتروندىق پوشتاسىندا جاريالانۋعا اسىق ماقالالار كۇنبە-كۇن كەلىپ تۇرادى. بۇل ارينە، بىزگە ۇلكەن قۋانىش سىيلايدى. دەمەك، ءبىزدىڭ باستاعان شارۋامىز ەلگە كەرەك، جۇرت وقيدى، وقىعان سايىن قوعام داميدى دەگەن ءسوز. ال، سوڭعى قىزىق سۇراعىڭىزعا ايتارىم: ءبىزدىڭ ءجۇرىسىمىز كىمگە قالاي كورىنەتىنىن بىلمەيمىن، ءبىراق بىزدە ۇلتتىق مۇددەگە ادال ەڭبەك ەتۋدەن باسقا ماقسات جوق. قۇداي عۇمىر بەرسىن، جۇمىس ىستەيتىن دەنساۋلىق بەرسىن دەپ تىلەيمىن.
تولەگەن : - “ماما” تۋرالى ولەڭىڭىز جايىندا كوپ جازىلدى، كوپ ايتىلدى. ايتىلعانى جاقسى. دەگەنمەن، مەنى سول ولەڭىنىڭ ءبىر تارماعى عانا ويلاندىرادى. ” سەن ءبارىبىر ماعان ۇنايسىڭ، ماما”. بۇل قازاق پوەزياسىندا بۇرىن ايتىلماعان اڭگىمە. وسى “ۇنايسىڭ” ءسوزى كەيىنگى جاداعاي ءتىلدى جاستاردىڭ ءسوزى ەمەس پە؟ قالاي قارايسىڭ؟ الدە ەندىگى جاس بۋىن وسىلاي جازۋ كەرەك پە؟
-تولەگەن، مەن وسى ولەڭىمە قاتىستى سۇراقتارعا (ينتەرنەتتە بار) بىرنەشە سۇحباتتاردا تولىعىمەن جاۋاپ بەرىپ كەتكەن. قايتالاپ وتىرعىم كەلمەي وتىر. دەگەنمەن، سۇراق قويعانىڭىزعا راحمەت ايتامىن.
ماقسات ەربولات : - اقبەرەن اعا، قازاق سايتتارىن اشىپ،ۇلەس قوسىپ جۇرگەنىڭىزگە راحمەت! قازاق سايتتارىن دامىتۋ ءۇشىن ، ءسىزدىڭ ويىڭىزشا قانداي جۇمىستار جاساۋ كەرەك. قازاق بيلىگىنىڭ قازاق سايتتارىنا دەگەن كوزقاراسى كانداي؟!
- قازاق سايتتارىنىڭ دامۋىنا قاراجاتتىڭ ازدىعىنان بولەك، تاعى ءبىر جاعداي كەدەرگى كەلتىرىپ وتىر، ول - قوعامنىڭ ەكى تىلدىلىگىندە. كوپ جاعدايدا وقىرمان ينتەرنەت سايتتارعا جاڭالىق وقۋ ءۇشىن جۇگىنەدى. ال، ول اقپاراتتى ءبىزدىڭ وقىرمان ورىس تىلىندە دە وقي بەرەدى. ءبىز سەكىلدى پورتالداردىڭ ءورىستىلدى سايتتاردان باستى ەرەكشەلىگى – ەشقايدا جاريالانبايتىن وتكىر ۇلتتىق ماسەلەلەردى كوتەرۋىندە. سونداي اقپاراتتى ىزدەگەن جۇرت تەك جوعارىدا اتاپ وتكەن سايتتاردان عانا تابادى.
ەندى بيلىكتىڭ قازاق سايتتارىنا كوزقاراسىنا كەلەيىك. سوڭعى جىلدارى بەلسەندى بوپ جۇمىس ىستەپ كەلە جاتقان سايتتار ءبارىبىر دە قوعامعا قانداي دا بولسا ىقپالى پايدا بولدى. قازاق قوعامى تەلەارنالار مەن رەسمي باق-نان كورە المايتىن دۇنيەنى بىزدەن كورىپ، وقيدى. ال، وقىرمانعا تۇساۋ سالا المايسىڭ. سوندىقتان مەنىڭ ويىمشا بيلىك قازاق سايتتارىنىڭ جۇمىسىن مىندەتتى تۇردە ساراپتاپ، زەردەلەپ وتىرادى. كەرەگىن الار، كەرەك ەمەسىن قالدىرار. ءبىر سوزبەن ايتقاندا، بيلىك قازاق ينتەرنەتىندەگى پروسەسسپەن ساناسا باستادى.
(جالعاسى ءىى جاۋاپتا)
