توقتار تولەشوۆ ءوزىنىڭ ماقساتىنا جەتۋ ءۇشىن ەلدەگى بيلىكتى كۇشپەن باسىپ الماق بولعان. بۇل تۋرالى ۇلتتىق قاۋىپسىزدىك كوميتەتى جانە باس پروكۋراتۋرا باسشىلىعى وكىلدەرى وتكىزگەن بۇگىنگى باسپا ءسوز ءماسليحاتىندا ءمالىم بولدى. «قىلمىستىق ءىستى تەرگەۋ ناتيجەسىندە ت. تولەشوۆتىڭ ەلدەگى بيلىكتى زورلىقپەن باسىپ الۋعا ۇزاق ۋاقىت دايىندالعانى جونىندە بۇلتارتپاس دالەلدەر تابىلدى» دەپ مالىمدەدى ۇقك-نىڭ باسپا ءسوز قىزمەتىنىڭ وكىلى رۋسلان كاراسيەۆ. قىلمىستىق قىزمەتىنىڭ بەلگىلى ءبىر كەزەڭىندە ءوزىنىڭ قولىندا بار رەسۋرستارىن پايدالانىپ، بيلىك قۇرىلىمدارىنا كىرۋ تۋرالى ويعا كەلگەن. سايىپ كەلگەندە، ول ويى ەلدەگى بيلىكتى كۇشپەن باسىپ الۋعا جەتەلەيدى. وسى ماقساتقا شەتەلدىك PR-كومپانيالاردى جالداپ، جوعارى لاۋازىمدى شەنەۋنىكتەردى جانە ايماقتارداعى بەيرەسمي جەتەكشىلەردى پارا بەرىپ، ساتىپ الادى. بۇعان الماتىدا تاركىلەنگەن قارۋ-جاراق، اقشا سۋرەتتەرى، الەۋمەتتىك جەلىلەردەگى سكرينشوتتار دالەل بولىپ وتىر.

سونىمەن قاتار، ت. تولەشوۆ ۋاقىتشا تەرگەۋ اباقتىسىندا وتىرىپ، اينالاسىنداعى ادامدار ارقىلى ءوزى تۋىپ-وسكەن سارىعاشتاعى جاپپاي قارسىلىق اكسياسىن ۇيىمداستىرۋعا ۇمتىلعان. الايدا ۇقك ونىڭ بۇل ارەكەتىنە دەر كەزىندە توسقاۋىل قويا ءبىلدى. ۇقك-نىڭ وكىلدەرى مالىمدەگەندەي، حالىقارالىق قىلمىستىق توپتاردىڭ وكىلى قازاقستاننىڭ بارلىق اۋماعىندا تۇراقسىزدىق وشاقتارىن قۇرۋدى ويلاستىرعان. سول ارقىلى بيلىككە ۋلتيماتۋم قويۋدى جانە ۆيسە-پرەزيدەنت لاۋازىمىن ەنگىزۋدى جوسپارلايدى. وسى ماقساتتا 2015 جىلدىڭ جەلتوقسان ايىندا ت. تولەشوۆ ت. ايانوۆقا اتىراۋداعى «جەر ميتينگىلەرىن» ۇيىمداستىرۋ ءۇشىن 100 000 اقش دوللارىن بەرەدى. ءوز كەزەگىندە ت. ايانوۆ پەن م. بوقايەۆ تولەشوۆتەن العان اقشانى پايدالانا وتىرىپ، اتىراۋ، اقتوبە، قىزىلوردا جانە الماتى قالالارىنداعى قارسىلىق اكسيالارىن ۇيىمداستىرادى.

ەڭ باستىسى، ت. تولەشوۆتىڭ قىلمىستىق ارەكەتتەرىن قۇزىرلى ورگاندار ءاۋ باستان-اق باقىلاۋعا ۇستاعان. ۇقك وكىلىنىڭ ايتۋىنشا، شىمكەنتتىك كاسىپكەر ءوز قىزمەتىن ەسىرتكى، قارۋ-جاراق ساۋداسىنان، رەيدەرلىك جانە ت.ب. قىلمىستاردان تۇسكەن قاراجاتپەن جۇزەگە اسىرعان. ت. تولەشوۆ «براتسكيي كرۋگ» ترانسۇلتتىق قىلمىستىق قاۋىمداستىعىنىڭ قىزمەتىنە بەلسەنە ارالاسىپ، وسى ۇيىم وكىلىنىڭ جۇمىسىن قارجىلاندىرعان. بۇعان ايىپتالۋشىنىڭ «براتسكيي كرۋگ» قاۋىمداستىعىنىڭ كوشباسشىلارىمەن بىرگە تۇسكەن فوتوسۋرەتتەرى دالەل بولا الادى. تەرگەۋدەن ءمالىم بولعانى، ت. تولەشوۆتىڭ كاسىپورىندارىنىڭ كۇزەت قىزمەتىنىڭ بازاسىندا باقايشاعىنا دەيىن قارۋلانعان ۇيىمداسقان قىلمىستىق توپ قۇرىلعان. قۇرامىندا 90-نان استام اسكەري دايىندىقتان وتكەن ساربازى بولعان وسى توپ ت. تولەشوۆتىڭ تىكەلەي بۇيرىعىمەن ادامداردى ۇرلاۋ، ۇرىپ-سوعۋ، ءولتىرۋ، قاراقشىلىق، بىرەۋدىڭ مۇلكىن قاساقانا جويۋ سياقتى اۋىر جانە اسا اۋىر قىلمىستاردى جۇزەگە اسىرادى. بۇعان دالەل رەتىندە باسپا ءسوز ءماسليحاتىندا فوتوسۋرەتتەر كورسەتىلدى.

وسى كەزگە دەيىن كەيبىر باق-تار ت. تولەشوۆتىڭ وتاندىق ءبىر ءىرى بانككە ۇلكەن كولەمدە اقشا قارىز ەكەنى تۋرالى اقپارات جاريالادى. باسپا ءسوز ءماسليحاتىندا: «وسى فاكتىنىڭ تولەشوۆتى ايىپتاۋعا ىقپالى بولعان جوق پا؟» دەگەن ساۋال قويىلدى. ۇقك-نىڭ وكىلدەرى ەسىرتكى ساۋداسى كوشباسشىسىنىڭ قارجى ينستيتۋتتارىنا ءىرى كولەمدە اقشا قارىز بولعانىن راستادى. اتاپ ايتقاندا، ول «اتف بانككە» - 201 ملن. دوللار، «قازكوممەرسبانككە» - 1،5 ملرد. تەڭگە قارىز ەكەن. بۇل از بولعانداي، قىلمىسكەر تەك بانكتەرگە عانا ەمەس، قىلمىستىق قۇرىلىمدارعا دا بەلشەسىنەن قارىزعا باتىپتى. مىسالى، ول ءبايمالىم قىلمىس جەتەكشىسى گ. راحيموۆقا 15 ملن. اقش دوللارى كولەمىندەگى قارىزىن قايتارماعان. تەرگەۋ بارىسىندا بۇعان ناقتى دالەلدەر انىقتالدى.

ت. تولەشوۆتىڭ ەلدەگى بيلىكتى باسىپ الۋعا ۇمتىلۋىنا موينىنداعى قارىزدارى دا سەبەپ بولعانعا ۇقسايدى. مۇنىڭ دالەلى قىرعىزستان مەن تاجىكستانداعى وتىمدىلىگى تومەن اكتيۆتەرگە قىرۋار اقشاسىن سالعاننان كەيىن «سىرا كورولى» كوپ كەدەرگىلەرگە تاپ بولادى. سايىپ كەلگەندە، رەسەيلىك شوۋ-بيزنەستىڭ جۇلدىزدارىن وتباسىلىق مەرەكەلەرىنە شاقىرىپ، شالقىپ-تاسىپ ءومىر سۇرگەن ت. تولەشوۆتىڭ دە ساۋىق-سايرانى ءتامامدالدى. ارنايى قىزمەتتەردىڭ قىراعىلىعىنىڭ ارقاسىندا ءقاۋىپتى قىلمىسكەردىڭ ارام نيەتى ىسكە اسپادى. جۇرتتىڭ كوپشىلىگىن ت. تولەشوۆتىڭ تاعىلعان ايىپ بويىنشا قانداي جازاعا تارتىلاتىنى قىزىقتىراتىنى ءسوزسىز. مۇنداي ساۋالعا باس پروكۋراتۋرا وكىلى تۇپكىلىكتى شەشىمدى سوت شىعاراتىنىن حابارلادى.

ءامىرلان ءالىمجان