فۋتبولدان پورتۋگاليا قۇراماسى تۇڭعىش رەت ەۋروپا چەمپيونى اتاندى، - دەپ حابارلايدى Qamshy.kz Tengrinews.kz -كە سىلتەمە جاساپ. فينالدا پورتۋگالدار تۋرنير قوجايىندارى فرانسيا قۇراماسىن جەڭدى.

ويىننىڭ العاشقى بەس مينۋتىندا ناني ءقاۋىپتى سوققى جاساپ، ءمۇلت كەتتى. دوپ قاقپادان بيىك كەتتى. ال ونىنشى مينۋتتا پورتۋليالىق ويىنشى رۋي پاتريسيۋ سەيۆ جاساپ، انتۋانن گريزماننىڭ تەپكەن دوبىن قايتارا ءبىلدى.  

كەيىن كريشتيانۋ رونالدۋ جاراقات الىپ قالدى. 17ء-شى مينۋتتا دميتري پايەمەن دوپقا تالاستا ول بۇكتەتىلىپ جاتىپ قالدى. الايدا دارىگەرلەردىڭ كومەگىنەن كەيىن ول ويىنعا قايتا ورالدى.  

كەيىن فرانسۋزدار شابۋىل جاسادى. مۋسسا سيسسوكو دوپتى قاقپا باعاناسىنان بيىك تەپتى. وسىدان كەيىن رونالدۋ ويىندى جالعاستىرا المايتىنىن ايتىپ، وتىرا قالدى. كوز جاسىنا ەرىك بەرگەن كوماندا كاپيتانىن دارىگەرلەر الىپ كەتتى. ونىڭ ورنىنا ريكاردۋ كۋارەجمۋ شىقتى.

وسىدان كەيىن ويىندا دوپقا تالاس-تارتىس قىزا ءتۇستى. 34ء-شى مينۋتتا عانا رۋي پاتريسيۋ سيسسوكونىڭ تەپكەن دوبىن قايتارىپ، كومانداسىن ءبىر گولدان قۇتقارىپ قالدى. ويىننىڭ ءبىرىنشى تايمىنىڭ سوڭىندا ەۆرا مەن كۋارەجما قاقتىعىسىپ قالدى، ابىروي بولعاندا ەكەۋى دە ويىندى جالعاستىرا الدى. كوماندالار ۇزىلىسكە 0:0 ەسەبىمەن شىقتى. 

ال ەكىنشى تايم مۇلدەم قىزىقسىز بولدى. ءبىرىنشى جيىرما مينۋتىندا دميتري پايەنىڭ كينگسلي كومانمەن اۋىسۋى عانا كوزگە ءتۇستى. ءقاۋىپتى ساتتەر كوپ بولمادى. 66-شى مينۋتتا گريزمانن ءساتتى پوزيسيادان تەپسە دە، قاقپادان قيسىق كەتتى. ال كەيىن وليۆە جيرۋ ءقاۋىپتى ءسات جاساي ءبىلدى، الايدا ونىڭ دوبىن رۋي پاتريسيۋ قايتارا ءبىلدى. 

ال پورتۋگالداردىڭ گولكيپەرىن ماچتىڭ ۇزدىك ويىنشىسى اتاۋعا دا بولاتىن سياقتى - ول ءوز كومانداسىن بىرنەشە رەت قۇتقارىپ قالدى. ال شابۋىل وتىندە ناني مەن كۋارەجما كوزگە ءتۇستى. ويىننىڭ 80ء-شى مينۋتىندا ەكەۋى دە ءقاۋىپتى ءسات جاساي ءبىلدى. الايدا ريكاردۋدىڭ دوبى دا قاقپاعا ءدال بارمادى. 

وسىدان كەيىن فرانسۋزداردان سيسسوكو قاقپاعا ءدال سوققى جاساعان، ءبىراق پاتريسيۋ تاعى دا ءوز كومانداسىنا كومەككە كەلدى. ال 92ء-شى مينۋتتا اندرە-پەر جينياكتىڭ سوققىسى ءتىپتى شتانگاعا ءتيىپ، كەرى قايتتى. قورىتىندىسىندا نەگىزگى ۋاقىت 0:0 ەسەبىمەن اياقتالدى. 

ءبىرىنشى قوسىمشا تايمدا ەكى كوماندا دا ءقاۋىپتى ءسات جاساي ءبىلدى. ال ەكىنشى شابۋىلىندا پورتۋگالدار فرانسۋزداردان باسىم ەكەندىگىن دالەلدەگەندەي بولدى - رافاەل گەررەيرۋ ايىپ الاڭىنان تەۋىپ، قاقپا باعاناسىنا ءدال تيگىزدى، ال ءبىر مينۋت وتكەندە الاڭعا جاڭا كىرگەن ەدەر ەسەپتى 1:0-گە جەتكىزدى.   

بۇدان كەيىن فرانسۋزدار پورتۋگالداردىڭ قاقپاسىنا اعىلادى-اۋ دەگەن وي جۇزەگە اسا قويمادى. 1:0. پورتۋگاليا قۇراماسى جەتى كەزدەسۋدە دە تەڭ ويناپ، ەۋروپا چەمپيوناتىندا جەڭىسكە جەتتى.