بۇگىننەن باستاپ ءماجىلىس كوميتەتتەرىندە ءاۋىس-تۇيىس بولىپ، جۇمىستارىنا كىرىسكەن دەپۋتاتتار زاڭدارعا تولىقتىرۋلار مەن وزگەرىستەر ەنگىزۋدى قولعا الا باستادى.

سونىڭ ىشىندە قوعامدا وزەكتى ماسەلەگە اينالعان ەكسترەميزم مەن تەرروريزمگە قارسى كۇرەسكە ارنالعان زاڭ جوباسىن ازىرلەۋگە كىرىسۋدە. وسىعان بايلانىستى 20-عا جۋىق زاڭعا وزگەرىستەر مەن تولىقتىرۋىلار ەنگىزۋ كوزدەلىپ وتىر. سونىڭ ىشىندە قىلمىستىق كودەكس، قىلمىستىق پروسەسسۋالدىق كودەكس، اكىمشىلىك قۇقىق بۇزۋشىلىقتار تۋرالى كودەكس، ەكسترەميزم مەن تەرروريزممەن كۇرەس زاڭناماسى جانە تاعىسىن تاعى دەگەندەي.

وسى ورايدا زاڭداردى قايتا قاراستىرىپ جاتقان دەپۋتاتتار پەدوفيلدەرگە دە قاتىستى ماسەلەنى قاراستىرسا دەگەن بالا تاربيەلەپ وتىرعان بارلىق انالاردىڭ تىلەگىن قوسقىمىز كەلەدى.

پەدوفيليا اۋرۋىنا (پسيحيكالىق بۇزىلۋ، كوپتەگەن جىنىستىق اۋىتقۋلاردىڭ ءبىرى) شالدىقسىن-شالدىقپاسىن بالالارعا «شابۋىل» جاسايتىندار كۇن سايىن ارتپاسا، ازايار ءتۇرى جوق.

دەنى ساۋ، اياق-قولى ءبۇتىن، ەڭگەزەردەي ەرلەر دە كوشەدە الاڭقايدا ويناپ جۇرگەن ويىن بالالارىنا «قۇمارتقانىن» قوياتىن ەمەس.

وعان ءتىپتى مىسال كەلتىرىپ جاتۋدىڭ دا قاجەتى جوق. كەشەگى اقتاۋدا زورلانىپ، حال ۇستىندە جاتقان التى جاسار قىزدىڭ تاعدىرى، شىمكەنتتە 4 جاسار قىزدى زورلاعان پەدوفيلدىڭ ازعىندىعى، سول سيقياتى جەر-جەردە ۇرلانىپ زورلانعان بالالاردىڭ تاعدىرىمەن ويناعان پەدوفيلدەرگە قاتىستى قاتاڭ ءبىر جازا قولدانىلسا بۇل دەرتتەن دە ايىعارمىز.

ق ر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتنىڭ ءتورايىمى ساۋلە ايتپايەۆانىڭ دەرەگىنشە، پەدوفيلدەردى نەمەسە كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستار جاساعان ادامداردىڭ دەرەكتەرى بازادا ساقتالادى.

ايتۋىنشا، پەدوفيلدەردىڭ قازاقستاندا تىركەلۋى 1991 جىلداردان باستالعان ەكەن. قازىرگى ۋاقىتتا بازادا 1 200-دەن استام ەسىم بار. بەلگىسىز، تىركەلمەگەن، انىقتالماعان پەدوفيلدەردىڭ سانى قانشا ەكەنى بەلگىسىز.

اسىرەسە سوڭعى ۋاقىتتا جيىلەپ كەتكەن بالا ۇرلاۋ مەن بالا زورلاۋ (ونىڭ ىشىندە كامەلەت جاسقا تولماعان جاسوسپىرىمدەر دە بار) ءىسى ءورشىپ كەتكەن. كۇندە جوعالعان بالا... زورلانعان بالا...

سول سەبەپتى دە ەلىمىزدىڭ ءبىرقاتار انالارى بۇگىن جۇمىمتارىنا كىرىسىپ، زاڭداردى قايتا قاراستىرىپ جاتقان پارلامەنتتەگى دەپۋتتاتتاردان پەدوفيلدەرگە قاتىستى زاڭ شىعارىپ، ولاردى قاتاڭ جازالاۋدى سۇرايدى.

ايتا كەتەيىك، بۇعان دەيىن كوپشىلىك تاراپىنان پەدوفيلدەردى «قايتا سۇندەتتەۋ كەرەك» دەگەن ۇسىنىستار بولعان.

«ءسابيقۇمارلار» ماسەلەسى ءبىزدىڭ ەلدە عانا ەمەس، كورشىلەس رەسەي، ۋكراينا، مولداۆا ەلدەرىمەن قاتار اقش سياقتى الپاۋىت مەملەكەتتەردىڭ دە باسى اۋىرتقان نەگىزى پروبلەماسىنا اينالىپ وتىرعانى بار. ءبىراق ءارقايسىسى ءارقالاي كۇرەسەدى. ماسەلەن، رەسەيدىڭ بۇرىنعى پرەزيدەنتى دميتريي مەدۆەديەۆ پەدوفيلدەرگە حيميالىق سۇندەتتەۋ جازاسىن ۇسىنىپ، ءتيىستى زاڭ جوباسىن دايىنداۋدى ايتقان بولاتىن.

ەستەرىڭىزگە سالا كەتەيىك، بۇعان دەيىن عالامتوردا «پەدوفيلدەرگە قانداي جازا قولدانىلۋى كەرەك؟» دەگەن ساۋالناما جۇرگەن بولاتىن. وندا ساۋالناماعا قاتىسۋشىلاردىڭ جارتىسىنان كوبى، ياعني 52،61 پايىزى قىلمىسكەرلەرگە ءولىم جازاسى قولدانىلۋى ءتيىس دەسە، 26،87 پايىزى قوعامدا كەڭىنەن تالقىلانعان «حيميالىق ادىسپەن» جازالاۋدى قولدايتىنىن ايتقان ەكەن.

ايتا كەتەيىك، حيميالىق جولمەن جازالاۋ ءادىسى اقش، كانادا، شۆەسيا، پولشا، مولداۆا سىندى ءبىرقاتار مەملەكەتتەردە الدەقاشان قولعا الىنعان.

ينديرا قۋات