قازاننىڭ 21 كۇنى ءال-فارابي اتىنداعى قازاق ۇلتتىق ۋنيۆەرسيتەتى،  فيلوسوفيا جانە ساياساتتانۋ فاكۋلتەتىندە «قازىرگى قازاقستانداعى ءدىني جاعداي جانە ونىڭ  ب ا ق بەتتەرىندە اقپاراتتاندىرۋى» ماسەلەلەرى تاقىرىبىندا عىلىمي-پراكتيكالىق سەمينار ءوتتى. سەمينار جۋرناليستەر، ءدىنتانۋشى جانە ساياساتتانۋشى عالىمدار اراسىندا پىكىر الماسۋ فورماتىندا جۇرگىزىلدى. ءدىنتانۋشىلار مەن سياساتتانۋشىلار قازىرگى ەل ءىشى جانە شەت ەلدەردەگى بولىپ جاتقان ءدىني ءھام ساياسي وزگەرىستەردى كەڭىنەن بايانداپ بەردى. سونىمەن بىرگە ءدىني اقپارات تاراتۋدىڭ ماڭىزدىلىعىنا توقتالعان ولار، باسپا ءسوز بەتتەرىندە اسىرەسە، دىنگە قاتىستى اقپاراتتار لەگىندە ولقىلىقتار كەزدەسىپ قالاتىنىن جاسىرمادى.

دىن-يدەولوگيالىق قارۋ سپەتتى، ونى سول سالادا ماماندانعان جۋرناليستەر جازۋى كەرەك دەستى جينالعاندار. ولاردىڭ ايتۋىنشا قالام ۇستاعان قاۋىم يەلەرى جازعان ماتەريالدار ءدىنتانۋلىق سارپاتامادان كورى كوبىنە-كوپ ناسيحاتتىلىعى باسىم ۋاعىزعا اينالىپ كەتەتىن كورىنەدى. فيلوسوفيا جانە ساياساتتانۋ فاكۋلتەتى دەكانىنىڭ ورىنباسارى، فيلوس.ع.ك.، دوسەنت بەكجان مەيىربايەۆ سالالىق جۋرناليستيكا بويىنشا ءدىنتانۋلىق جۋرناليستيكانىڭ دا اشىلىپ قالۋ مۇمكىندىگى بار ەكەندىگىن، بولاشاقتا بۇل قادام مىندەتتى تۇردە كۇنتىزبەلىك جوسپارعا كىرەتىنىن ايتىپ وتىر. ءدىنتانۋ جانە مادەنيەتتانۋ كافەدراسىنىڭ مەڭگەرۋشىسى،  فيلوس.ع.د.، پروفەسسور اينۇر قۇرمانالييەۆا.، فيلوس.ع.د.، پروفەسسور ناعيما بايتەنوۆالار اتالمىش تاقىرىپ بويىنشا باياندامالار جاسادى. تاقىرىپ جان-جاقتى تالقىلانىپ، جۋرناليستەر تاراپىنان ءدىن سالاسىنا قاتىستى بۇگىنگى كۇننىڭ  وزەكتى سۇراقتارى قويىلىپ، ۇسىنىستار ايتىلدى.