قازاقستاننىڭ كەيبىر ازاماتتارى ءتيىستى قىزمەتتەگى «جالقاۋلاردىڭ» كەسىرىنەن جازىقسىز جاپا شەگىپ ءجۇر. ماسەلەن، سوتتىڭ ورىنداۋ قۇجاتتارى نەمەسە اكىمشىلىك ايىپپۇل سالىنعاندار موينىنا تۇسكەن تولەمنەن تولىق قۇتىلسا دا ءتيىستى قىزمەتتەر بۇل تۋرالى دەرەكتەر بازاسىنا مالىمەت بەرمەگەندىكتەن، قارىز بولىپ قالا بەرەدى ەكەن. وسىنداي «جالقاۋلاردىڭ» قاتارىنا اسىرەسە، جەكەمەنشىك سوت ورىنداۋشىلارىن جاتقىزۋعا بولادى. وزىنە قاجەتتى وندىرۋگە ءتيىستىسىن السا دا وندايلار دەرەكتەر بازاسىنا مالىمەت بەرمەيدى ەكەن. ءتىپتى، مالىمەت بەرمەگەنى ءۇشىن ولار ەشقانداي جازا دا تارتپايتىن كورىنەدى. سونىڭ كەسىرىنەن ادامدار شەتەلگە شىعايىن دەسە شەكارادا «شىعارۋعا بولمايتىندار» قاتارىندا ۇستالىپ، مورالدىق جانە ماتەريالدىق جاپا شەگىپ، شات-شالەكەي بولىپ جاتاتىن كورىنەدى. سونداي-اق قۇجاتتارعا ەنگىزىلەتىن وزگەرىستەردى دە دەرەكتەر بازاسىنا ەنگىزبەيتىن مەملەكەتتىك قىزمەتشىلەر بار ەكەن. ماسەلەن، فاميلياڭىزدىڭ سوڭىنداعى «وۆ»، «ەۆ» دەگەن جات جۇرناقتاردى الدىرىپ تاستاساڭىز دا ولاردى ءتيىستى قىزمەت دەرەكتەر بازاسىنا ەنگىزۋگە «ەرىنىپ» قالاتىن كورىنەدى. سونىڭ كەسىرىنەن شەكارادا «ۇستالىپ»، ءوزىڭنىڭ بۇرىنعى «احمەتوۆتىڭ» ورنىنداعى «احمەت» ەكەندىگىڭىزدى دالەلدەي الماي، قاتتى قينالاتىن كورىنەسىز. كەيدە مۇندايدىڭ اقىرى «كوك قاعازبەن» شەشىلىپ، سىبايلاس جەمقورلىققا دا جول اشىپ جاتاتىن كورىنەدى.
مىنە، وسىندايلاردى بولدىرماس ءۇشىن ءماجىلىس دەپۋتاتى ايقىن قوڭىروۆ باستاعان كوممۋنيستەر توبى ادىلەت ءمينيسترى مارات بەكەتايەۆقا ساۋال جولداپ، جاسالعان تۇزەتۋلەردى دەرەكتەر بازاسىنا دەرەۋ ەنگىزبەگەن قىزمەتكەرلەردى قاتاڭ جازالاۋدى تالاپ ەتتى.
سەرىك ەلەۋ، ساراپشى
