اقتوبەدە، 5 ماۋسىم كۇنگى تەراكت وقيعاسى كەزىندە ەرەكشە جۇمىسىمەن كوزگە تۇسكەن پوليسيا قىزمەتكەرلەرى ماراپاتتالدى. قاندى وقيعانىڭ باسىندا ءجۇرىپ، بىرنەشە لاڭكەستى قۇرىقتاۋعا قاتىسقان ەلەك پوليسيا بولىمشەسىنىڭ قىزمەتكەرى ارىپتەستەرىنىڭ اراسىندا ۇزدىك قىزمەتكەر اتاندى. بۇل تۋرالى aktobenews.kz جازدى. مىندەتىن ۇزدىك اتقارعان اسلان ەسەنتايەۆ  «التىن ادام» اتاعىن يەلەندى.

«سول كەزدە ەلەك بولىمشەسىندە كەزەكتە بولدىق. تۇسكى ۋاقىتتا «پاللادا» دۇكەنىنە قارۋلى شابۋىل جاسالعانى حابارلاندى. سول كەزدە قالا بويىنشا جۇرگەن بارلىق پوليسيا قىزمەتكەرلەرى شاقىرىلعان بولاتىن. ءبىز «پاللادا» دۇكەنىنە بارعان كەزىمىزدە «پانتەرا» قارۋ جاراق دۇكەنىنە كومەك سۇرادى. ول جەرگە بارعانىمىزدا ارىپتەستەرىمىزدىڭ قىزمەتتىك كولىگىنىڭ اشىق تۇرعانىن كوردىك. سول جەردە ءبىز ويلانباستان اتىسقا قاتىسىپ كەتتىك. جەردە جاتقان قىلمىسكەردىڭ قارۋىن الىپ، وعان كىسەن سالىپ، ءارى قاراي اتىستىق. قاسىمدا جاقسىبايەۆ پەن نۇعالييەۆ ەسىمدى ەكى سەرجانت بولدى. نۇرعالييەۆ جاراقاتتانىپ قالعاننان كەيىن جاقسىبايەۆ ەكەۋمىز اتىستى جالعاستىردىق. سول كۇنى كەشكە كىرپىشتى اۋدانىندا دا شابۋىل بولدى. ولار  «نيۆا» اۆتوكولىگىن الىپ كەتتى. سول جەردەن قارۋ ۇستاپ جاتقان قىلمىسكەردى كوردىك. اتۋىما  تۋرا كەلدى،- دەيدى اسلان ەسەنتايەۆ.

ايتا كەتەر بولساق، بيىل 5 ماۋسىمدا اقتوبەدە تەراكت بولعان ەدى، ونىڭ سالدارىنان ونداعان ادام قازا تاپتى. قازاقستاندا تەررورلىق ءقاۋىپتىڭ سارى دەڭگەيى، ال اقتوبەدە قىزىل دەڭگەيى ەنگىزىلدى.

«ءبىز مۇنىڭ سالافيزم ءداستۇرلى ەمەس ءدىني اعىمىنىڭ زۇلىمدىق ارەكەتى ەكەنىن بىلەمىز. رەسپۋبليكاداعى ءدىني سەنىم بوستاندىعىن قامتاماسىز ەتە وتىرىپ، ءبىز سونىمەن قاتار ءدىني ۇراندارمەن بۇركەنىپ، ەلدەگى جاعدايدى شايقالتقىسى كەلەتىندەردىڭ بارلىعىنا تاباندى تويتارىس بەرۋىمىز كەرەك»، - دەگەن ەدى مەملەكەت باسشىسى اتالعان جاعدايعا بايلانىستى قاۋىپسىزدىك كەڭەسىنىڭ بارىسىندا.