بۇگىن 28 قاراشا، اتىراۋداعى 2 سوتتا سوت پروسەستەرى اياقتالعان ماكس بوقايەۆ پەن تالعات ايانوۆقا سوت ۇكىمى وقىلدى. سوت ۇكىمىن ازاتتىق راديوسى تىكەلەي ەفيردە كورسەتتى.

وبلىستىق سوتتىڭ باسپا ءسوز حاتشىسى بورانباي عالييەۆ سوت زالىنىڭ تارلىعىنا بايلانىستى ب ا ق وكىلدەرى سىيماي قالعانىن ايتىپ، سوتقا قاتىسۋشىلاردىڭ كەيبىرىن باسقا بولمەدەن ارناۋلى مونيتورلاردان باقىلاۋدى سۇرادى. بۇعان دەيىن سوتقا قاتىسا الماعان جۋرناليستەر ۇكىم وقىلاتىن بولعان سوڭ سوت زالىنا كىرگىزىلدى. سوتقا جينالعان ادامدار وتە كوپ بولدى. 

سۋديا گۇلنار داۋلەشوۆا ولاردى "زاڭسىز ميتينگتەر ۇيىمداستىردى"، "جالعان اقپاراتتار تاراتتى"، "ۇلتارازدىق تۋدىردى" دەپ ايىپتاپ، 5 جىلعا سوتتادى. سۋديا وسىنداي ايىپتار تاعىلعان تالعات ايانعا دا 5 جىل تۇرمە جازاسىن كەستى. سوت سونىمەن بىرگە ولارعا ءۇش جىل قوعامدىق جۇمىسپەن اينالىسۋعا شەكتەۋ قويۋ جانە 250 مىڭ تەڭگە ايلىق كورسەتكىش ەسەبىندە (ءبىر اەك - 2121 تەڭگە) ايىپپۇل سالۋ تۋرالى ۇكىم كەستى. ۇكىم بويىنشا، بوقايەۆ پەن ايان جازالارىن جالپى رەجيمدەگى كولونيادا وتەۋى ءتيىس.

ايتا كەتەتىن بولساق، 21 قاراشا كۇنى جارىسسوزدە پروكۋرورلار قاسىم سادىقوۆ پەن مارات حابيبۋللين بوقايەۆ پەن ايانعا تاعىلعان "زاڭسىز ميتينگتەر ۇيىمداستىردى"، "جالعان اقپاراتتار تاراتتى"، "ۇلتارازدىق تۋدىردى" دەپ ايىپتاپ، "ولاردىڭ كىنالارى تولىق دالەلدەنگەنىن" ايتتى.

پروكۋرور ماكس بوقايەۆقا سەگىز جىل باس بوستاندىعىنان ايىرۋدى، ءۇش جىل قوعامدىق جۇمىسپەن اينالىسۋعا شەكتەۋ قويۋ جانە 250 مىڭ تەڭگە ايلىق كورسەتكىش ەسەبىندە ايىپپۇل سالۋدى سۇرادى. مەملەكەتتىك ايىپتاۋشىلار اياندى دا سەگىز جىلعا سوتتاۋدى، ءۇش جىل قوعامدىق جۇمىسپەن اينالىسۋعا شەكتەۋ قويۋدى جانە 250 تەڭگە ايلىق كورسەتكىش ەسەبىندە ايىپپۇل بەلگىلەۋدى سۇراعان بولاتىن.

ماكس بوقايەۆ پەن تالعات ايان 24 ءساۋىر كۇنى اتىراۋ قالاسىندا جەر رەفورماسىنا قارسىلىق رەتىندە وتكەن جاپپاي ميتينگتەن سوڭ قاماۋعا الىنعان. ماكس بوقايەۆ پەن تالعات ايانعا ءبىرقاتار قىلمىستىق باپتار (سونىڭ ىشىندە "ارازدىق تۋدىرۋ"، "زاڭسىز ميتينگ ۇيىمداستىرۋ") بويىنشا ايىپتارى تاعىلعان. ازاماتتىق بەلسەندىلەر بۇل ايىپتاردىڭ ەشقايسىسىمەن كەلىسپەيدى.