استانا قالاسىنىڭ اتۋىن وزگەرتۋ تۋرالى داۋ ءالى توقتامادى. ءماجىلىس دەپۋتاتى قۋانىش سۇلتانوۆ استانا اتاۋىن وزگەرتۋگە قاتىستى الەۋمەتتىك جەلىدە ايتىلىپ جاتقان سىني پىكىرلەر كوڭىلىنە تيەتىنىن ايتىپ، جۋرناليستەرگە سۇحبات بەردى. «پرەزيدەنت قالاي قابىلداۋى كەرەك ەدى؟ مەن وسىلاي بولۋى مۇمكىن ەكەندىگىن ءبىلدىم... وتە بايسالدى، دۇرىس قابىلدادى»، - دەدى قۋانىش سۇلتانوۆ جۋرناليستەردىڭ سۇراعىنا جاۋاپ بەرە وتىرىپ.

دەپۋتات وسى كۇندەرى الەۋمەتتىك جەلى ايتىلىپ جاتقان سىننىڭ كوڭىلىنە تيەتىنىن جاسىرمادى. «بۇل اركىمنىڭ قۇقىعى. ءبىراق ساياسي مادەنيەت بولۋى كەرەك. پىكىردى سىناۋعا بولادى، ءبىراق جەكە باسقا تيىسۋگە بولمايدى. قانداي دا ءبىر يدەيا، ۇسىنىس ءۇشىن ادامدارعا ءتىل تيگىزگەن ءجون ەمەس. ونىڭ پىكىرىمەن كەلىسپەي-اق قويىڭىز، ءبىراق ادامدى بىلمەي تۇرىپ، ول تۋرالى نەشە ءتۇرلى ايتۋعا بولمايدى. بۇل بىزدە ساياسي مادەنيەت جەتكىلىكسىز ەكەنىن كورسەتەدى»، - دەيدى ول.

سۇلتانوۆ بۇعان دەيىن استاناعا ەلباسىنىڭ ەسىمىن بەرۋدى ۇسىنىپ، قوعام نارازىلىعىنا قالعان بولاتىن. ونى ءوزىنىڭ كەيبىر ارىپتەستەرى قولداعانىمەن، قالا اتىن اۋىستىرۋ قاجەت بولسا پەتروپاۆل مەن پاۆلودار سياقتى قالالاردىڭ اتى بار ەكەنىن ايتقان ەدى بىلايعى جۇرت.

ايتا كەتەتىن بولساق، ەلباسى ەشكىمگە استانانى اتاۋىن اۋىستىرايىق دەپ باستاما كوتەرۋگە تاپسىرما بەرمەگەنىن ايتىپ، «قاي نارسە بولسا سوعان «نۇر» دەگەن ءسوزدى قوسادى. ول مەنىڭ تۇلعاممەن بايلانىستى بولىپ شىعادى. ونى مەن تالاي ايتقانمىن. اناعان دا، مىناعان دا الىپ كەلەدى دە پارلامەنت استانانى مەنىڭ اتىممەن اتاۋ تۋرالى بولجام ايتىپتى. مەن ەشكىمگە ونداي ۇسىنىس ايتقان جوقپىن»، - دەگەن ەدى. ەلباسى تاۋەلسىزدىك جىلدارىنداعى ەل جەتىستىكتەرى جالعىز ءوزىنىڭ ەڭبەگى ەمەس ەكەندىگىن، سەنىمدى سەرىكتەرىنىڭ كۇش بىرىكتىرۋى ناتيجەسىندە قول جەتكىزىلگەنىن اتاپ وتكەن بولاتىن.

ەستەرىڭىزگە سالساق، ەلباسى ەل استاناسىنىڭ اتاۋىن وزگەرتۋ تۋرالى پىكىرگە «روسسيا 24» ارناسىنا بەرگەن سۇحباتىندا نۇكتە قويعان بولاتىن.  «استانا - بۇل برەند. استانانىڭ اتاۋىن وزگەرتۋدىڭ ەش قاجەتى جوق»، - دەگەن ەدى پرەزيدەنت سۇحبات بارىسىندا.