مادەنيەت جانە سپورت ءمينيسترى ارىستانبەك مۇحامەديۇلىنا ءوزىن بوپسالادى دەپ شاعىم تۇسىرگەن جۇرگەنوۆ اتىنداعى ونەر اكادەمياسىنىڭ تۇلەگى ەڭلىك سىدىقوۆانىڭ ادۆوكاتى گۇلنار جۋاسپايەۆا بۇگىن ءوزىنىڭ تاراپىنا قىسىم جاسالىپ جاتقانى تۋرالى مالىمدەدى. بۇل تۋرالى ازاتتىق حابارلادى. الماتىدا وتكەن باسپا ءسوز كونفەرەنسياسىندا جۋاسپايەۆا وزىنە جاسالىپ جاتقان قىسىمدى ەڭلىك سىدىقوۆانىڭ مۇددەسىن قورعاپ جۇرۋىمەن بايلانىستىرادى. ارىستانبەك مۇحامەدي ۇلى بۇعان دەيىن سىدىقوۆانىڭ تاققان ايىپتارىن جوققا شىعارعان بولاتىن. سوت شاعىمدى ايعاقتار جەتكىلىكسىز بولعاندىقتان كەرى قايتارىپ جىبەرگەن.
جۋاسپايەۆانىڭ ايتۋىنا قاراعاندا، ول ادۆوكاتتار القاسىنىڭ كوشىرمەسىن العان. وندا جۋاسپايەۆانىڭ "ادۆوكاتتىق ەتيكانى بۇزعانى"، "الەۋمەتتىك جەلىلەردەگى جازبالارىندا ءوزىن دۇرىس ۇستامايتىنى" ايتىلعان. ادۆوكاتتىڭ ايتۋىنا قاراعاندا، بۇگىن ادۆوكاتتار القاسى پرەزيديۋمىنىڭ شۇعىل جينالىسى وتپەك. ول بۇل جيىندا ءوزىنىڭ ءىسىن قاراۋ جوسپارلانىپ وتىر دەيدى.
