ىشكى ىستەر ءمينيسترى قالمۇحانبەت قاسىموۆتىڭ ايتۋىنا قاراعاندا، ساۋساق تاڭباسى پاسپورت، ءتولقۇجات راسىمدەۋ كەزىندە الىنادى. 12-16 جاس ارالىعىنداعى بالالار قۇجات الاتىن كەزدە داكتيلوسكوپيالىق تىركەۋدەن اتا-اناسىنىڭ رۇقساتىمەن عانا وتەدى. قاسىموۆ داكتيلوسكوپيالىق تىركەۋدەن قازاقستانعا كىرۋگە ۆيزا الاتىن شەتەلدىكتەر، ونىڭ ىشىندە زاڭ بۇزىپ، ەلدەن شىعارىلاتىندار دا وتەتىنىن ايتتى. ساۋساق تاڭباسى سونىمەن قاتار بوسقىنداردان، ەڭبەك ميگرانتتارى مەن قازاقستاندا تۇرۋعا رۇقساتى بار شەتەلدىكتەن دە الىنادى. مينيستر داكتيلوسكوپيالىق جانە گەنومدىق مالىمەتتەر ىشكى ىستەر مينيسترلىگىنىڭ مالىمەتتەر بازاسىندا ەلەكتروندىق تۇردە ساقتالادى.
بۇعان دەيىن ىشكى ىستەر ءمينيسترىنىڭ ورىنباسارى راشيد جاقىپوۆ زاڭ جوباسىندا ازاماتتار داكتيلوسكوپيالىق تىركەۋدەن وتۋدەن باس تارتقان جاعدايدا ايىپپۇل سالۋ قاراستىرىلعانىن ايتقان. ال داكتيلوسكوپيادان باس تارتقان شەتەلدىكتەر دەپورتاسيالانباق. داكتيلوسكوپيادان باس تارتقان قازاقستاندىقتار جەكە باسىن كۋالاندىراتىن قۇجات الا المايدى.
زاڭ جوباسىن 2018 جىلدان باستاپ ىسكە اسىرۋ ءۇشىن 36،8 ميلليارد تەڭگە (100 ميلليون دوللاردان استام) قاجەت ەكەن.
