ق ر پرەزيدەنتى نۇرسۇلتان نازاربايەۆ قىتايلىق ميللياردەردى قازاقستاندا جۇمىس ىستەۋگە شاقىردى. بۇل تۋرالى تاۋەلسىزدىك سارايىنداعى رەسپۋبليكالىق جاستار فورۋمىندا ەلباسى ءمالىم ەتتى، دەپ حابارلايدى قازاقپارات.

"جاقىندا قىتايداعى گۋانچجوۋدا G20 سامميتىندە بولدىم جانە وسى ساپار بارىسىندا تانىمال قىتايلىق ميللياردەر، Alibaba كومپانياسىنىڭ باسشىسى دجەك مامەن كەزدەستىم. سوڭعى كەزدەسۋ كەزىندە ونىڭ اينالىسىپ جاتقان ءىسى جايىندا تىڭعىلىقتى سۇراستىردىم. ول ءوز كەزەگىندە 2 ملرد. تۇتىنۋشىعا قىزمەت كورسەتە الاتىن مەگاكومپانيا قۇرۋعا نيەتتى ەكەنىن ايتتى. سونىمەن قاتار 100 ملن. جۇمىس ورىندارىن قۇرىپ، تابىستى كاسىپورىندارعا قولداۋ جاساماق"، - دەپ توقتالدى پرەزيدەنت. وسى ورايدا ن. نازاربايەۆ 17  جىلدىڭ ىشىندە دجەك ما جوقتان بار جاساپ، ميللياردتاعان تابىسى بار كومپانيا قۇرۋعا قاۋقارلى بولعانىن اتاپ ءوتتى. "ياعني بارشا الەمدە ەلەكتروندى ساۋدا تاراعان. سونىمەن بىرگە سول ورىنداردا بالا كەزىنەن كومپيۋتەرمەن اينالىسقان 20-دان 30 جاس ارالىعىنداعى جاستار وتىر. الەمنىڭ كەز كەلگەن نۇكتەسىنەن قالاعان تاۋاردى جەتكىزۋ مۇمكىندىگى بار. وسى باعىتتاعى تابىستى جوبالار قازاقستاندا ەنۋى ءۇشىن جانە ميلليونداعان ءبىزدىڭ جاستار وسى جۇيەدە جۇمىس ىستەۋدى، تابىس جاساۋدى ۇيرەنۋى تۇرعىسىندا ونى ەلىمىزگە شاقىردىم. مەنىڭ ويىمشا، بولاشاقتا بۇل جوسپار جۇزەگە اساتىن بولادى"، - دەدى مەملەكەت باسشىسى.