بايقوڭىردا ۇشۋعا ورناتىلعان "سويۋز-ۋ"زىمىران تاسىعىشى. 29 قاراشا 2016 جىل.

روسكوسموستىڭ مالىمەتىنشە، بايقوڭىردان حالىقارالىق عارىش ستانسياسىنا ۇشىرىلعان عارىشكەرى جوق "پروگرەسس مس-04" جۇك كەمەسى اۋادا جانىپ كەتتى. "پروگرەسس مس-04"-پەن جانە ونى تىركەپ ۇشقان "سويۋز-ۋ" زىمىران تاسىعىشىمەن بايلانىس كەمە 1 جەلتوقساندا ۇشىرىلعاننان سوڭ التى مينۋت 23 سەكۋندتان كەيىن جوعالعان. بايلانىس قوزعالتقىشتىڭ ءۇشىنشى ساتىسى قوسىلعاندا ءۇزىلىپ، كەمە وربيتاعا شىعا الماعان. بۇل تۋرالى «ازاتتىق» حابارلادى.

روسكوسموستىڭ مالىمدەۋىنشە، عارىش كەمەسى تۋۆاداعى حالىق از قونىستانعان تاۋلى ايماقتىڭ اۋە كەڭىستىگىندە جانعان. بولجام بويىنشا، كەمەنىڭ ەڭ ۇلكەن بولشەكتەرى اۋانىڭ تىعىز قاباتتارىندا جانىپ كەتكەن. "پروگرەسس مس-04" حالىقارالىق عارىش ستانسياسىنا 3 جەلتوقساندا جەتىپ، 2،4 توننا جانارماي، قۇرال-جابدىق پەن ازىق-تۇلىك جەتكىزۋى ءتيىس بولعان. France Press اگەنتتىگىنىڭ ماسكەۋدەگى ءتىلشىسى كەمە بورتىندا ستانسيادا روجدەستۆونى اتاپ وتۋگە ارنالعان سىيلىقتار مەن تاتتىلەر دە بولعانىن ايتادى.

تىۆا قارۋلى كۇشتەرىندەگى ريا «نوۆوستي»  دەرەككوزىنىڭ حابارلاۋىنشا، عارىش جۇك كەمەسىنىڭ سىنىقتارى ءدال وسى وڭىرگە قۇلاعان. ونىڭ ايتۋىنشا، «پروگرەسس» دەپ اتالاتىن كەمەنىڭ سىنىقتارى قۇلاۋى مۇمكىن ورىن  كۋاگەرلەردىڭ ءسوزى بويىنشا تەكسەرىلىپ جاتىر.

جۋرناليستەرگە كۋاگەرلەردىڭ تىۆاداعى يشتيا-حەم ەلدىمەكەنىنىڭ تۇسىنان وت جارىقشاقتارىن كورگەنى حابارلاندى.

تىۆا مەن حاكاسيا تۇرعىندارى الەۋمەتتىك جەلىلەردە وت جارىقشاقتارىن ءدال عارىش كەمەسى قۇلاعان ۋاقىتتا كورگەنىن جازىپ جاتىر.

ماسەلەن، سايانوگورسك (حاكاسيا) تۇرعىنى «ۆ كونتاكتە» جەلىسىندە جەرگىلىكتى ۋاقىتپەن ساعات 22:10-دا اسپاننان رومب ءتارىزدى ۇلكەن ءبىر وبەكت كورگەنىن ايتادى. ونى ولار مەتەوريت دەپ ويلاعان. سايانوگورسك تۇرعىندارىنىڭ ءبىرىنىڭ ايتۋىنشا، اسپانداعى بەلگىسىز نىساندار ءتۇرلى ءتۇستى بولعان. ينتەرنەتتە عارىش جۇك كەمەسى سىنىقتارىنىڭ قۇلاعانى بولۋى مۇمكىن ۆيدەو پايدا بولدى.

رەسەي 2015 جىلى ساۋىردە "پروگرەسس" كەمەسى اپاتقا ۇشىراعان سوڭ ۇشىرىلىمدى ءۇش ايعا توقتاتقان.

ايتا كەتەر بولساق، سوڭعى جىلدارى تۇران ويپاتىندا كيىك ءولىمى جيىلەدى. بەي رەسمي اقپارات بويىنشا بىرنەشە ءجۇز مىڭ كيىك جايىلىپ جۇرگەن جەرىندە قىرىلىپ قالعان. الاڭداعان جۇرت بۇنى بايقوڭىردان ۇشقان زىمىرانداردان كورەدى. ۋلى گەپتيلدەن تەك جانۋارلار عانا ەمەس ەكولوگيا دا اۋىر زارداپ شەگىپ جاتىر. الايدا، بيلىك بۇل ءىستىڭ سەبەبىن باسقاشا تۇسىندىرەدى.