وڭتۇستىكتەگى كورشىمىز وزبەكستان رەسپۋبليكاسىندا سوڭعى رەت 2015 جىلى 29 ناۋرىز كۇنى پرەزيدەنت سايلاۋى وتكەن ەدى. قارتاڭ تارتقانىنا قاراماستان يسلام كاريموۆ تاعى دا حالىقتىڭ داۋىسىن «جيناپ» كەلەسى پرەزيدەنتتىگىن قورعاپ قالعان بولاتىن.

كەشە، 4 جەلتوقسان وزبەكستان ازاماتتارى سوڭعى 27 جىل اۆتوريتارلىق تاسىلمەن ەل باسقارعان، قىركۇيەكتىڭ باسىندا 78 جاسىندا قايتىس بولعان يسلام كاريموۆتەن سوڭ بەس جىل مەرزىمگە پرەزيدەنت بولاتىن كەلەسى ادامنىڭ بيلىككە كەلۋىنە داۋىس بەردى.

وزبەكستان ورتالىق سايلاۋ كوميسسياسىنىڭ مالىمەتىنشە، داۋىس بەرۋگە قاتىسقاندار ەلەكتوراتتىڭ 88 پايىزىن قۇرادى. وزبەكستاندا ەل پرەزيدەنتى لاۋازىمىنا سايلاۋ اياقتالدى. داۋىس بەرۋ جەكسەنبى، 4 جەلتوقسان كۇنى ساعات 06.00-دە باستالىپ، 20.00-دە اياقتالدى. ءتۇس اۋا ورتالىق سايلاۋ كوميسسياسى سايلاۋدى ءوتتى دەپ تانىدى، سەبەبى كەلۋشىلەردىڭ سانى قاجەتتى 33 پايىزدان اسىپ جىعىلدى. وسك-نىڭ مالىمەتىنشە، سايلاۋدا 17 ملن. 941 مىڭ 955 ادام داۋىس بەردى، بۇل ەلەكتوراتتىڭ 87،83 پايىزى. بۇل تۋرالى 4 جەلتوقسان كۇنى  قورىتىندى بريفينگتە وسك ءتوراعاسى  ميرزا-ۋلۋگبەك ابدۋسالوموۆ ايتتى.

داۋىس بەرۋ ەل ىشىندەگى - 9383  جانە شەت ەلدەردەگى 44 سايلاۋ ۋچاسكەسىندە ءوتتى. وسك ءتوراعاسى داۋىس بەرۋدىڭ ناتيجەسى بويىنشا بولاشاق پرەزيدەنت تۋرالى الدىن الا مالىمەتتەردى اتاماي، العاشقى ناتيجەلەر 5 جەلتوقسان كۇنى تۇستەن كەيىن ايتىلاتىنىن جەتكىزدى. بۇعان دەيىن حابارلانعانداي، سايلاۋعا ءتورت ۇمىتكەر قاتىسۋدا - پرەزيدەنت مىندەتىن اتقارۋشى شاۆكات ميرزيەيەۆ وزبەكستاننىڭ ليبەرالدىق-دەموكراتيالىق پارتياسى اتىنان تۇسۋدە،  حاتامجون كەتمونوۆ حالىق-دەموكراتيالىق پارتياسىنان، ناريمان وماروۆ سوسيال-دەموكراتتاردان جانە پارلامەنتتىڭ تومەنگى پالاتاسىنىڭ ۆيسە-سپيكەرى سارۆار وتامۋراتوۆ دەموكراتيالىق پارتيادان سايلاۋعا قاتىستى.  

ايتا كەتەر بولساق، وزبەك بيلىگى سايلاۋ ناتيجەسى تۋرالى اقپاراتتى مەيلىنشە جابىق ۇستادى.