ءوتىپ بارا جاتقان 2016 جىل ەل ەسىندە الماتى مەن اقتوبەدە بولعان تەراكتىلەرمەن قالارى انىق. الايدا، تانىمال ساياساتتانۋشى مارات شيبۋتوۆ اقپاراتتىق-تالداۋ ورتالىعىنا بەرگەن سۇحباتىندا قازاقستاننىڭ كۇشتىك قۇرىلىمدارى بۇل قايعىلى وقيعالاردان ءتيىستى ساباق الماعانىن ايتادى.
ساياساتتانۋشى قوس بىردەي تەراكتىنى كەز-كەلگەن ەلدە، كەز-كەلگەن ۋاقىتتا بولۋى مۇمكىن قارۋلى قاقتىعىس دەپ باعالايدى.
«مىسالى، بەيبىت كۇن كەشىپ جاتقان نورۆەگيا مەن برەيۆيكتى الايىق. كۇلىكبايەۆ – جالعىز تەرروريست. ال، اقتوبەدەگى جاعداي ۇلتتىق قاۋىپسىزدىك كوميتەتىنىڭ جەرگىلىكتى بولىمدەرى جىبەرگەن اعاتتىقتان بولدى. بۇعان جانە دايش-تىقتاردىڭ ۇندەۋى دە اسەر ەتتى»، - دەگەن ول بۇل تەراكتىلەردەن قانداي دا ءبىر جۇيەلىلىك بايقامايتىنىن ايتادى.
«بۇل جەردەگى باستى جۇيەلىلىكتى تەك بىزدە ەشكىمنىڭ ناقتى تەرروريزممەن كۇرەسۋگە قۇلىقسىز ەكەندىگىنەن عانا كورەمىز. ءبىز جاناما، ەكىنشى كەزەكتەگى قۇبىلىستارمەن كۇرەسىپ جاتىرمىز. مىسالى، لاڭكەستىككە قارسى زاڭنامالاردا اڭشى مىلتىقتارىن ساتۋعا قاتىستى نورمالاردى كۇشەيتۋ كوزدەلۋدە. الايدا، لاڭكەستەر مەن اڭشىلاردى بىر-بىرىمەن بايلانىستىرۋ قيسىنسىز. ياعني، قۇقىققورعاۋ ورگاندارى لاڭكەستىك ءقاۋىپتىڭ قانداي دا ءبىر فورمالدى بەلگىلەرىمەن كۇرەسكىلەرى كەلەدى، ال، شىنايى تەرروريزممەن كۇرەسكىلەرى كەلمەيدى. ويتكەنى، نە ونى ءالى كۇنگە قاتەر دەپ سانايمايدى نەمەسە تەرروريستەردەن شىنىمەن قورقادى. ولاي دەيتىنىم، ەگەر تەرروريستەر كۇشتىك قۇرىلىمدار مەن سۋديالارعا قارسى ماقساتتى تۇردە بەلسەندى شابۋىل باستاسا وعان ءبىزدىڭ جۇيە ءالى دايىن ەمەس. مۇنداي شابۋىلداردىڭ نەگە الىپ كەلەتىنىن ءبىز ءۇش ميلليون حالقى بار داعىستان مىسالىنان بىلەمىز. وندا 2011 جىلى 211 كۇشتىك قۇرىلىم قىزمەتكەرى قازا تاپقان بولاتىن»، - دەيدى مارات شيبۋتوۆ.
ساراپشىنى لاڭكەستىكپەن كۇرەستە جايباراقاتتىق تانىتقان قۇقىققورعاۋ ورگاندارى ەلدە ۇلكەن ءبىر تەراكت بولۋىن كۇتىپ وتىرعانداي اسەردە قالدىرىپتى.
«مەنىڭ ويىمشا، تەرروريستىك شابۋىلدار الماتىداعىداي اۋداندىق ىشكى ىستەر باسقارماسىنا ەمەس، استانانىڭ وزىنە، مينيسترلىككە جاسالعاندا عانا كۇشتىك قۇرىلىمدار بار قاۋىپ-قاتەردى تولىق سەزىنەتىن سياقتى. ازىرگە ءىىم ورتالىق اپپاراتى قىزمەتكەرلەرىنە ەمەس، وڭىرلەردە اۋداندىق ىىب-لەرگە شابۋىل جاسالىپ جاتقاندا ەشكىم بۇعان ءمان بەرمەيدى»، - دەيدى ول.
سونداي-اق، ۇكىمەتتەگى اۋىس-تۇيىستەر مەن پرەمەر-مينيستر باقىتجان ساعىنتايەۆ كابينەتىنىڭ قىزمەتىنە قاتىستى پىكىر بىلدىرگەن، م. شيبۋتوۆ باقىتجان ءابدىر ۇلىنىڭ ەندىگى مىندەتى ءتۇرلى نارازىلىق شارالارى مەن ميتينگىلەردىڭ بولۋىنا جول بەرمەۋ دەيدى. ول ءۇشىن ۇكىمەت مۇشەلەرى بار جاۋاپكەرشىلىكتى موينىنا الىپ، داڭعازا شارالارمەن ەمەس، ماڭىزدى شەشىمدەر قابىلداۋمەن اينالىسۋى كەرەكتىگىن ايتىپتى.
جومارت ابدوللا ۇلى
