اسىلى وسمانوۆا، شولپان احمەت قىزى، ايمان بايسالوۆا. شىمكەنت. 1992 ج.

«احمەت بايتۇرسىن ۇلى – قازاق حالقىنىڭ ار-وجدانى»

نۇرسۇلتان نازاربايەۆ.

3 اي بۇرىن Qamshy.kz «مەملەكەت قاراۋىنسىز قالعان مەملەكەتتىڭ كورنەكتى قايراتكەرىنىڭ ءۇيى» اتتى ماقالا جاريالاعانى وقىرماننىڭ ويىندا بولار. ماقالادا الماتىداعى بايتۇرسىن ۇلى مۋزەي-ۇيىنىڭ مەملەكەت قاراۋىنسىز «جەتىمنىڭ كۇيىن كەشكەن» احۋالى جازىلعان بولاتىن. ءوز كەزەگىندە ماقالا يمانعالي نۇرعالي ۇلىنىڭ نازارىن اۋدارعان-دى. سول ۋاقىتتا ۇكىمەت باسشىلىعىندا قىزمەت ەتكەن ي.ن.تاسماعامبەتوۆ ارنايى ات باسىن بۇرىپ، بۇل وزەكتى تاقىرىپ جونىندە: «...بۇل ماسەلە راسىندا دا وتە ۇلكەن ماسەلە، بۇل مۇراجايعا مەملەكەتتىك ستاتۋس بەرمەي ماسەلە شەشىلمەيدى. ماسەلەنىڭ ءبارىن دۇرىس كوتەرىپ وتىرسىزدار، مەملەكەتتىك ستاتۋس بولاتىن بولسا شارۋالار ارى قاراي ءجۇرىپ كەتەدى. كەرەك بولاتىن بولسا رەسەيگە ەكسپەديسيا جىبەرۋگە دە ىقپال ەتەدى» دەگەن ەدى.

اراعا 3 كۇن سالىپ ۇكىمەت اپپاراتى مەن مادەنيەت جانە سپورت مينيسترلىگى احمەت بايتۇرسىن ۇلى مۇراسىمەن تىكەلەي اينالىسۋشىلاردى، ءارى تۋىس ۇرپاقتارىن استاناعا شاقىرىپ ۇكىمەتتىك جيىن وتكىزگەن بولاتىن. وندا: «الاشتىڭ 100 جىلدىعىنا دۇرىستاپ دايىندالۋىمىز كەرەك. ءقازىر ەڭ باستىسى، جاقسى جوسپار قۇرۋىمىز قاجەت. وعان بىر-ەكى اپتاداي ۋاقىت الىپ، دۇرىس جوسپار قۇرىپ، ونى ەلباسىمەن كەلىسىپ، ۋاقىتىن بەلگىلەگەن ءجون. الاشتىڭ 100 جىلدىعى سول زامانمەن قالىپ قويماي، بۇگىنگى تاۋەلسىز مەملەكەتپەن بايلانىستىرۋ ورىندى بولادى. الاش زيالىلارىنىڭ ارمانى، ونىڭ ورىندالعانى، تاۋەلسىز ەل بولعانىمىز، وسىنىڭ بارلىعى ۇلتتىق، تاريحي سانانى كوتەرەتىن جاقسى دۇنيە بولۋى كەرەك»  دەگەن ەدى سول كەزدەگى ۆيسە-پرەمەر يمانعالي تاسماعامبەتوۆ.

البەتتە، ۇكىمەتتىڭ وسىنداي قامقورلىعىنان كەيىن ۇلت ماقتانىشىنا اينالعان احمەت بايتۇرسىن ۇلى مۋزەي-ۇيىنىڭ «باتپانداي اۋىرلىعى جەڭىلدەپ، شارۋاسى دوڭگەلەنىپ» كەتۋگە ءتيىس-اق ەدى. وكىنىشتىسى، ولاي بولماي تۇر... وسىدان بىرنەشە جىل بۇرىن مۋزەيدى قاراماعىنا العان  احمەت بايتۇرسىن ۇلى اتىنداعى قوعامدىق قورعا يەلىك ەتىپ وتىرعان سەرىك سامىرات ۇلى بايتۇرسىنوۆ «مۋزەيدى مەملەكەتكە وتكىزۋگە (سىيعا تارتۋعا) نەمەسە جارتىلاي قۇق بەرۋگە (ۇزاق مەرزىمدى تەگىن جالعا بەرۋ)، جالپى العاندا مۋزەيدىڭ مەملەكەتتەن قامقورلىق كورىپ، ۇرپاق قاجەتىنە جاراتۋعا اسا ىقىلاستى بولماي وتىرعاندىعى» كوپشىلىككە ءمالىم بولعان. بۇل تۋرالى «قامشى» پورتالىنىڭ تىلشىسىنە مۋزەيدىڭ ديرەكتورى رايحان يماحانبەت ءوز سۇحباتىندا ايتقان ەدى. سەرىك بايتۇرسىنوۆ مەملەكەتتىك مەكەمەلەرمەن ارادا قۇجاتتاردىڭ رەسەمدەلۋىنە قاجەتتى «مەكەمە ءمورى مەن ءوز تاراپىنان بەرىلەتىن سەنىمحات» سياقتى رەسمي قۇجاتتاردى «مۋزەيدىڭ شىراقشىسىنا» اينالعان، شيرەك عاسىرىن احاڭ مۇراسىن زەرتتەپ-زەردەلەۋگە ارناعان رايحان يماحانبەتكە بەرمەي وتىر. ال، سەرىك سامىرات ۇلى مۋزەيدىڭ وزەكتى ماسەلەسىن كوتەرگەن ءارى ونى شەشۋگە ناقتى ۇسىنىستار جاساپ وتىرعان ۇكىمەتتىك ۇيىمدارمەن مامىلە جاساۋ تۇگىلى، مۋزەيگە ءتىپتى باس سۇقپاي قويعانىنا ەكى ايدان اسىپتى. ي.تاسماعامبەتوۆتىڭ رەسمي ساپارىنىڭ الدىندا «ءبىر قۇجاتتارعا كەرەك بولىپ تۇر» دەپ العان قوردىڭ ءمورىن ءالى قايتارماپتى دا.

ۇكىمەت كومەك كورسەتۋگە پەيىلدى بولىپ وتىرعاندا، الاش ارىسى احمەت بايتۇرسىن ۇلىنىڭ 145 جىلدىق مەرەيتويىن ەل قاتارلى ۇلىقتاۋدىڭ يگى شارالارىن رەسپۋبليكالىق دەڭگەيدى اتقارۋدى ءوز مىندەتى سانايتىن مۋزەي ديرەكتورى رايحان ساحىبەك قىزى سەرىك سامىرات ۇلىنىڭ بۇل ىسىنە  ءتىپتى تۇسىنە الماي دال بولىپ وتىر. احمەت بايتۇرسىن ۇلىنىڭ تۋعان جيەنى ايمان بايسالوۆا دا رەنجۋلى ەكەنىن جاسىرا المادى..، جىلدار بويى اتا مۇراسىنىڭ ۇكىمەتتىڭ نازارىنان تىس قالۋعا سەبەپشى بولىپ وتىرعان ءوز تۋىسىنا «وكپەسى قارا قازانداي».

يا، 1998 جىلدان مۇراجايدى قوعامدىق قورعا قاراتىپ العان بايتۇرسىنوۆ سەرىك سامىرات ۇلى «ءتوراعالىق ەتىپ وتىر» دەۋ اتى عانا، تەك قۇجاتتى قۇشاقتاعىنا بولماسا... احمەت بايتۇرسىنۇلىنا قاتىستى جاسالىپ جاتقان مۋزەيدىڭ ءبىر دە ءبىر شارالارىنا قولعابىس ەتۋ بىلاي تۇرسىن، كەشەگى الاش ارىستارىنا ارنالىپ بەرگەن اسقا دا كەلمەگەنىن كوزىمىز كوردى. وعان وسى جولداردى جازىپ وتىرعان مەن جانە ءوزىم قىزمەت وتىرعان قامشى سايتىنىڭ ۇجىمى كۋا!

سامىرات بايتۇرسىنوۆ – بايتۇرسىن شوشاق ۇلىنىڭ كەنجە بالاسى ماشەن قاجىدان تۋعان. ماشەن – شولپان احمەت قىزىنىڭ تۋعان اكەسى. ياعني، شولپان مەن سامىرات ءبىر اكەنىڭ بالالارى. وسى شولپاننان تۋعان ايمان بايسالوۆا – احمەت بايتۇرسىن ۇلىنىڭ جيەنى. احمەت پەن بادريسافا باۋىرىنا سالىپ وسىرگەن شولپان اپانىڭ ءتورت بالاسىنان بىرەۋى.

احاڭنىڭ جارى  بادريسافا ءوزى قالاپ شولپاندى 3 جاسىنان باۋىرىنا سالىپ اسىراعان. شولپان احمەت قىزى 10-12 جاستار شاماسىندا اناسى بادريسافامەن بىرگە تومسكىدە ايداۋدا بولعان. ايداۋعا جىبەرىلگەندەردىڭ كامەلەتكە تولماعان بالالارىنا كەشىرىم بەرىلىپ، شولپان ورىس جەرىنەن ەلگە قايتادى.  وسى تۇستا ول ءوزىن 3 جاسقا ۇلكەيتىپ، جاستايىنان ەڭبەككە ارالاسىپ ءومىرباقي ەسەپشىلىك قىزمەت اتقارعان. شولپان احمەت قىزى سول زاماننىڭ سۇرقيا ساياساتىنىڭ سالدارىنان كۇنكورىس قامىمەن 16 جاسىندا تۇرمىس قۇرۋعا ءماجبۇر بولعان. كۇيەۋى قابيدەن ەكەۋىنىڭ اراسىندا 2 ۇل، 2 قىز بالا دۇنيەگە كەلگەن. ەكى بالا ەرتە شەتىنەپ، ال ايمان بايسالوۆا مەن 1981 جىلى قايتىس بولىپ كەتكەن ءىنىسى بولات ەكەۋى الماتىدا ەرجەتكەن. ايمان اپا ءبىر اپتا بۇرىن عانا 81 جاسقا كەلدى.

1936 جىلى تۋعان ايمان بايسالوۆا قازىرگى احمەت بايتۇرسىن ۇلى مۋزەي-ۇيىندە 1 جىل 7 ايىنا دەيىن ناعاشىسى اتاسى احمەت پەن اجەسى بادريسافا، ءوزىنىڭ اكە-شەشەسىمەن بىرگە تۇرعان. احاڭنىڭ جيەنى ءوزىن اتاسى موينىنا مىنگىزىپ، تالاي ەركەلەتىپ ويناتقانىن ايتادى. ول تۋرالى اناسى شولپان اپامىز ايتىپ بەرگەن ەكەن. كەيىندەۋ، شامامەن 1940 جىلى شەشەسى شولپاننىڭ جۇمىسىنا بايلانىستى باقاناسقا كوشكەن. 

ايمان اپامىز احمەت بايتۇرسىن ۇلىنىڭ جيەنى ەكەنىن، تەك 1991 جىلى بىلگەنىن بىلايشا ەسىنە الدى: «اباي داڭعىلى مەن ماسانچي كوشەسىنىڭ قيلىسىنداعى تەمىرجول اۋرۋحاناسىندا جۇمىس ىستەۋشى ەدىم. انام شولپان كەلىپ، جۇمىستان سۇراپ الىپ، تورعايعا ۇشىپ كەتتىك. سول كەزدە امانقوس، عاريفولالار جاس ەدى (مەكتەپتەگى مەن انەستى ايتىپ وتىر. – رەد.). ۇشاقتا تۇرسىنبەك كاكىشيەۆ تە بولدى. مەن ول كەزدە ولاردىڭ ءبىرىن دە تانىمايتىن ەدىم. سولاي تەكتى تۇلعانىڭ ۇرپاعى ەكەنىمىزدى بىلدىك»، - دەپ كۇرسىندى اپامىز.

سودان كەيىن شولپان احمەت قىزى مەن گۇلنار ءمىرجاقىپ قىزى دۋلاتوۆا وسى ءۇيدى احمەت بايتۇرسىن ۇلى مۋزەي ەتىپ جاساۋعا بار كۇشتەرىن سالعان. «ولار وتە جاقىن قۇربىلار ەدى، ورىنبور-قىزىلوردا قالالارىندا بىرگە وسكەن» دەپ ەسكە الادى ايمان بايسالوۆا. قازىرگى احمەت بايتۇرسىن ۇلى كوشەسىنە احاڭنىڭ اتى بەرىلۋىندە دە ەكى اپانىڭ ەڭبەگى زور بولعان. وسىلاي ەستەلىكتەرىن ايتا وتىرىپ، ايمان اپا مۋزەيدىڭ قازىرگى مەنشىك يەسىنە دە توقتالدى: «سەروجكا (سەرىك سامىراتۇلىن ايتادى. – رەد.) الماتىدا 1949 جىلى سامىراتتىڭ بەلارۋس ايەلى ليديادان تۋعان. ناعاشى اعام مەن جەڭگەمنىڭ سەرگەيدەن باسقا سۆەتلانا، يرينا دەگەن قىزدارى بولدى. سۆەتا قايتىس بولدى، يرا رەسەي جاعىندا تۇرادى، وتباسى بار. ءبىراق، اعام مەن جەڭگەم كەيىن بىرگە تۇرمادى... سامىرات ەكىنشى رەت تاعى ۇيلەندى. سەروجكا1998 جىلدان انام شولپان مەن ونىڭ قۇربىلارى، سونداي-اق  الاش تاقىرىبىنا دەن قويعان جاس عالىمداردىڭ زەرتتەۋى نەگىزىندە دالەلدەنگەن احمەت اتامنىڭ تاعىلىم ءۇيىن اكەسى سامىرات قۇرعان قورعا قاراتىپ الدى. قانداي جولمەن، ول جاعى ونىڭ وزىنە عانا ايان.

اتامنىڭ 125 جىلدىق مەرەيتويىنا وسى اتا تۇرعان ءۇي – مۋزەي بولىپ سالتاناتتى تۇردە اشىلدى. ازىپ-توزىپ تۇرعان ءۇيدى ۇكىمەت قارجى ءبولىپ جوندەدى. ءبىراق جوندەۋ جۇمىستارىنىڭ باسىندا شىن جاناشىر ادام جۇرمەگەندىكتەن، مۋزەيگە سۋ مەن جىلۋ جۇيەسى كىرگىزىلمەي قالدى... اتامنىڭ اياۋلى اتى اقتالعاننان كەيىن سول كەزدەگى قالا اكىمى زامانبەك ءنۇرقادىلوۆ شولپان احمەتقىزىنا قالادان ءبىر بولمەلى پاتەر بەرگىزدى. شولپان سول پاتەردە قايتىس بولدى. ول پاتەر شولپاننىڭ وسيەتى بويىنشا مەنىڭ قىزىم گۇلنارعا قالدى»، - دەيدى ايمان بايسالوۆا. احمەت بايتۇرسىن ۇلىنىڭ جيەنى ايمان اپايدىڭ قولىنداعى رەسمي قۇجاتتاردا شولپان اپانىڭ زاڭدى مۇراگەرى ايمان بايسالوۆا ەكەندىگى كورسەتىلگەن. ءارى بۇل قۇجاتتار مەملەكەتتىك مەكەمە مورىمەن راستالعان.

ال، مۋزەي ماڭىنداعى 16 تەلىم جەر – مەملەكەت تاراپىنان احمەت بايتۇرسىن ۇلى مۇراسىن دامىتۋعا جانە ناسيحاتتاۋعا دەپ، اتا اتىنداعى قوعامدىق قورعا ۇلكەن سەنىممەن تەگىن بەرىلىپتى. ويتكەنى، سول قوردى قۇرعان سامىرات ماشەن ۇلى قور جارعىسىندا «احمەت بايتۇرسىن ۇلىنىڭ ارتىندا قالعان مۇراسىن ەل يىگىلىگى، كەلەشەك ۇرپاق كادەسىنە جاراتاتىنىن، ءارى ءار جىل سايىن عالىمنىڭ قازاق ءتىلى ءبىلىمى مەن ادەبي مۇراسىن قايتا جارىققا شىعارۋ، قاسىنداعى جەر تەلىمىنە «احمەت بايتۇرسىن ۇلى اتىنداعى مادەنيەت ءۇيىن» سالۋ جوسپارىندا بار» ەكەنىن جالپاق جۇرتقا ءمالىم ەتكەن. قۇجات بويىنشا احمەت بايتۇرسىن ۇلى مەن بادريسافا انامىزدىڭ زاڭدى مۇراگەرى – شولپان. شولپان ءوزىنىڭ ءىنىسى سامىراتپەن ارالارىنداعى ءتۇرلى كيكىلجىڭگە بايلانىستى جاقسى قارىم-قاتىناستا بولماعان. وعان ءتۇرلى پەندەشىلىكتەر دە سەبەپ بولعان سىقىلدى. دەسە دە شولپاننىڭ ءىنىسى سامىراتتان تۋعان سەرگەيدىڭ قۇزىرىنا وتكەن مۋزەيدىڭ تالاي جىلعى مۇشكىل حالىنە ايمان اپاي كۋا بولىپ جۇرگەنىن، ءوزىنىڭ تۋعان ءىنىسى بولات تا قايتىس بولىپ كەتكەننەن سوڭ، «باس كوتەرەر ەر ادام عوي» دەپ تۋىسى سەروجاعا ءوزى دە سەنىم ارتقانىن ايتادى. ەڭ سوراقىسى، سەرگەي-سەرىكتىڭ اناسى شولپاننىڭ دا، ءوز اكەسى سامىراتتىڭ دا جاساعان جۇمىستارىنىڭ شيرەگىن دە ىستەي الماي وتىرعانىنا وكىنەدى. يا، ول تەك جەر سالىعىن تولەگەنى بولماسا، مۋزەي-ۇيدىڭ كوممۋنالدىق تولەمدەرىنە اسا باس قاتىرماعان. رايحاننىڭ قاعىلەزدىگى مەن احمەت مۇراسىنا شىن بەرىلگەنىنىڭ ارقاسىندا جىلدار بويى مۋزەي جۇمىستاردىڭ جىگىن ۇقساتىپ كەلەدى ەكەن.        

ءتىپتى، ءبىر كەزدەرى ايمان بايسالوۆا احاڭنىڭ جيەنى عانا ەمەس، سول مۋزەيدىڭ باس ديرەكتورى بولىپ تا جۇمىستى ءۇش ايداي اتقارعان. جالپى، قورعا قاراعان مۋزەيگە بىرنەشە ديرەكتور تاعايىندالعانىن (تاكەن تىنىبەكوۆ، ماكس بايعوزينوۆ، الما شامشاروۆنا، زەينەپ ەستەمەسوۆا)، ولاردىڭ بارلىعى دا قارجى بولماعان سوڭ جۇمىس ىستەمەي كەتكەندەرىن، تەك 2005 جىلدان ديرەكتور بولعان رايحان عانا ءالى كۇنگە وسى جۇمىستى قوعامدىق نەگىزدە ىستەپ جۇرگەنىن ءسوز ەتتى. رايحان ەكەۋىنىڭ مۋزەي 1998 جىلى اشىلعاننان كەيىن... اياقتالماي قالعان جۇمىستاردى سەرگەيگە بىرنەشە رەت ەسكەرتكەندەرىن، ءبىراق ونىڭ قىزمەتى استاناعا اۋىسقاندىقتان «مۋزەيمەن شارۋاسى بولمادى» دەيدى. قالاي بولعانىن ناقتى بىلمەيمىن، ءبىراق سول جاعدايى جوق مۇراجايدا ءۇش جىل بويى رايحان مەن ءلايلا ەكەۋى كەزەكتەسىپ جۇمىس ىستەپ ءجۇردى. التى اي قىس مۇزداي جەردە جۇمىس ىستەۋ مۇمكىن ەمەس قوي... 2001 جىلى «مۋزەيدىڭ ءبىر ۋىس كىلتىن» سەرگەيگە مەن، مەرۋەرت (احاڭنىڭ قارىنداسى زيلياشتىڭ ۇرپاعى. – رەد.)، رايحان ساحىبەك قىزى جانە اراي كەڭەسبايەۆا تورتەۋمىز اپارىپ تاپسىرماقشى بولدىق. ول كەزدە سەرگەي ورتالىق ستاديوندا سپورت سالاسىنداعى ءبىر مەكەمەنىڭ باسشىسى بولاتىن، ورنىندا بولمادى، قاراماعىنداعىلارعا قالدىردىق. وسىلاي مۋزەيدىڭ ەسىگى جىلداپ جابىلىپ قالدى دەيدى.

قاشاندا تاريحي تۇلعالاردىڭ جوعىن ىزدەۋشى، ونى ماسەلە ەتىپ كوتەرەتىن ب ا ق وكىلدەرى ەمەس پە؟! مۋزەي قاتتى توزىپ كەتكەندىگى تۋرالى «ازىپ-توزعان احاڭنىڭ مۇراجايى» اتتى ماقالا «انا ءتىلى» گازەتىندە 2002 جىلى جارىق كورىپتى. ىلە-شالا بىرنەشە رەت ماقالا جاريالانعانىن جانە تەلەديداردان احاڭ مۋزەيىنىڭ مۇشكىل ءحالى كورسەتىلگەنىن، ءوزىنىڭ سول تۇستا قالا اكىمى بولىپ تۇرعان يمانعالي تاسماعامبەتوۆكە ارنايى حات جازىپ «مۋزەيدى قالانىڭ بالانسىنا الۋىن نەمەسە رەسپۋبليكالىق بيۋدجەتكە قاراتۋىن» سۇراعانىن ايتتى. باق-قا العىسىم شەكسىز، ەل نازارى، قالا باسشىسىنىڭ نازارى احاڭ مۋزەيىنە اۋدى.

2005 جىلى يمانعالي نۇرعالي ۇلى مۇراجايعا ۇلكەن كۇردەلى جوندەۋ جۇمىستارىن جۇرگىزدىرىپ بەرىپتى. 1998ء-شى جىلعىداي ەمەس، بۇل جوندەۋدىڭ باسىنا بىلەك سىبانىپ كىرىسكەن رايحاننىڭ ءجىتى قاداعالاۋىنىڭ ارقاسىندا جىلۋ، سۋ، كارىس قۇبىرى تارتىلسا، كابەلدىك سىمدارى ابدەن شىرىگەن ەلەكتر جەلىسى جاڭارتىلىپ، جىلدار بويى سۋ مەن جىلۋ كورمەگەن مۋزەيگە جان ءبىتىپتى. سونداي-اق مۋزەيدىڭ اينالاسى تۇگەل قورشالىپ، قاڭعىعان يت پەن قۇستىڭ مەكەنىنە اينالعان شىرشالارعا سۋ قۇيىلىپ، ەسكەرتكىش ماڭىنا گۇلزار پايدا بولعانىن، ونىڭ بارىنە باس-كوز بولىپ جۇرگەن رايحانعا ريزاشىلىعىن ءبىلدىردى. رايحان ساحىبەك قىزى ەكەۋىنىڭ اراسىنا «سىنا قاققىسى كەلگەن» بازبىرەۋلەردىڭ «ءوزى مەن مەرۋەرتتىڭ» اتىنان پروكۋراتۋراعا «دومالاق ارىز» تۇسىرگەندەرىن، ءبىراق ونداي حاتتى وزدەرىنىڭ جازباعانىن، ورتاعا دانەكەرلىككە يۋليا سەرىك قىزىنىڭ ءتۇسىپ، بىر-بىرمەن قايتادان تۇسىنىسكەندەرىنە قۋانىپ جۇرگەنىن دە جايىپ سالدى. 5-ناۋرىز كۇنگى وتكىزىلگەن «الاش ارىستارىنا ارنالعان اس» ءۇشىن بىزگە دە العىسىن جاۋدىردى.

احمەت بايتۇرسىن ۇلىنىڭ جيەنى ايمان بايسالوۆا ەشبىر دۇنيەگە قىزىعىپ وتىرماعانىن، قازاق جۇرتى عانا ەمەس، كۇللى تۇركى الەمى ۇلت ۇستازى دەپ ۇلىقتايتىن بايتۇرسىن ۇلى احمەت اتاسىنىڭ مۇراسى «نە ءوزىنىڭ، نە سەرگەي-سەرىكتىڭ جەكەمەنشىگى بولا المايتىنىن، بۇل تاعىلىم ءۇيى – حالىقتىڭ قازىناسى، اسىل مۇراسى» ەكەنىن ۇكىمەت باسىنداعىلار بىلسە عوي شىركىن، دەپ ارماندايدى. وسى سەكسەننەن اسقان جاسىندا اتاسىنان قالعان «رۋحاني جادىگەر مۋزەيدى مەملەكەت قامقورلىعىنا العانىن، ال اتا مۇراسىنىڭ ۇرپاق يگىلىگىنە جاراعانىن» كوزى تىرىسىندە كورگىسى كەلەتىنىن اعىنان جارىلا ايتتى ايمان قابيدەن قىزى.

كەيۋانا تىلەگىنىڭ ورىندالۋىنان ۇلكەن ءۇمىت ەتىپ ۇكىمەت باسشىسى ب.ءا.ساعىنتايەۆقا ارنايى حات جولداپ، حات كوشىرمەسىن مادەنيەت جانە سپورت ءمينيسترى جانە الماتى قالاسى اكىمىنە ۇسىنىپتى. ويتكەنى، جىل باسىندا «الاش ارداقتىلارىن ۇلىقتاۋعا ارنالعان يمەكەڭ باستاعان يگى باستاما اياقسىز قالادى ما» دەگەن قورقىنىشى باسىم ەكەنىن ءجۇزىن تومەن سالىپ، كۇبىرلەي وتىرىپ جەتكىزدى اپامىز ايمان بايسالوۆا.

ەندى ۇكىمەتكە جولداعان رەسمي حات ءماتىنىن ۇسىنا وتىرىپ، احمەت بايتۇرسىن ۇلى مۋزەي-ۇيى – «مەنشىك تالاسىنىڭ نىساناسى ەمەس، مەملەكەتىمىزدىڭ ۇلتتىق اسىل قازىناسىنا اينالسا ەكەن» دەپ، ءتورتىنشى بيلىك وكىلى رەتىندە ەل نازارىنا ۇسىنۋدى ءبىز دە پەرزەنتتىك بورىشىمىز سانادىق!

نۇرعالي نۇرتاي