1993 جىلى ەلباسىمىز نۇرسۇلتان ءابىش ۇلىنىڭ  باستاماسىمەن قۇرىلعان «بولاشاق» باعدارلاماسى  عىلىمنىڭ سىرىنا ۇڭىلگەن جاستارعا قولداۋ ءبىلدىرىپ، ەل مۇددەسى ءۇشىن ەلەۋلى ەڭبەك ەتىپ كەلە جاتقانىنا بيىل 21 جىل تولىپتى. ەلباسىمىز  «بولاشاق» باعدارلاماسىن ۇلكەن ماقساتپەن، ۇمىتپەن قۇردى. ەڭ العاشقى حالىقارالىق ستيپەنديا يەگەرلەرى دە اتان ارقاسىنا ارتسا بەلى مايىساتىن جۇك كوتەرىپ كەتكەنى انىق. سول كەزدەگى تالاي جۇرتتى تامساندىرعان تۇلەكتەر عاسىرلار قويناۋىندا قان كەشىپ، ولمەستىڭ ءابىلحايات سۋىن ءىشىپ ءومىر ءسۇرىپ كەلە جاتقان قازاق كوشىنىڭ قازىرگى تىزگىنىن ۇستاپ  ءجۇر. «بولاشاقتىڭ»  ءۇمىتىن ارقالاپ شەتەل اسقانداردىڭ كەيبىرى مەملەكەت اقشاسىمەن وقىپ الىپ، سىرت ەلدە جۇمىس جاساۋعا قالىپتى، كەي قاراكوزدەر وقۋ قۋىپ بارىپ، «كەلىن بولىپ قالىپتى» دەيتىن ءىشىڭ قيمايتىن اقپاراتتار بولسا دا، «بولاشاق» قازاق ءۇشىن جاسالعان دۇرىس شەشىم ەكەنىن الدەقاشان دالەلدەدى.  

     ءبىراق ءبىز «بولاشاقپەن» ماقتانۋدى ءبىلىپ، ساقتانۋدى ۇمىتىپپىز ... كەلەشەكتىڭ ولشەمى، ەلدىڭ ەرتەڭى دەپ باعالاعان، تالانتتاردان سارالاعان ابرويلى «بولاشاقتىڭ» تۇلەگى، ءوزىمىزدىڭ  قاراكوزىمىز شەتەلدەن ازعىندىقتى ۇيرەنىپ كەلەدى دەپ كىم ويلاعان؟ جاقىندا الماتى  قالاسىندا بولعان كوگىلدىرلەر شۋى دەيمىز بە، سوراقى جارناماسى دەيمىز بە بۇكىل قازاق قوعامىنىڭ توبە شاشىن تىك تۇرعىزعان جاعداي جانىمدى اۋىرتتى.  ءبىز بىلىققان باتىستاعى شايتاني ويدىڭ، جىن ويناق ءىستىڭ، ازعىندىقتىڭ  اقىرىنداپ قويدان قوڭىر قازاق ەلىنە دە اياق باسىپ، كىرىپ كەلە جاتقانىنا شاراسىز ەكەنبىز.  ول بىلاي تۇرسىن،  ويلاماعان   جەردەن   قاراكوز قازاقتىڭ قىزى كوگىلدىرلەردى قورعايتىندىعىن ايتىپ، كەۋدەسىن كەرە شىقتى. جاي جۇرگەن جەڭىلتەك قىز ەمەس، جوندى جۋرناليست، گۋميليەۆ اتىنداعى ۋنيۆەرسيتەتتىڭ تۇلەگى، «بولاشاقتىڭ» ءۇمىتى، ماگيسترانت جانار سەكەربايەۆا. ينتەرنەتتەگى جەكە پاراقشاسىنداعى مالىمەتتەرىنەن جاناردىڭ كوگىلدىرلەردى جاقتايتىن ادام ەكەنىن اڭعارۋ قيىن ەمەس، ءبىرجىنىستىلاردىڭ ەرسى فوتولارىن  ءبولىسىپ، ۇزدىكىز ناسيحاتتاپ كەلەدى ەكەن. قۇرمانعازى مەن پۋشكيندى  ءسۇيىستىرۋ دە جانار ءۇشىن وسىنداي قاراپايىم وقيعا بولسا كەرەك. ءوزى دە قىز بالانىڭ سالاۋاتىن ساقتاپ جۇرگەنى  شامالى كورىنەدى، تۇرىسى  ەركەك، ءجۇرىسى ەرەك، جىنىسى ايەل، اتتەگەن-اي جەرى ۇلتى قازاق.

قازاق  حالقى قىزىن يبالى دا ىزەتتى ەتىپ وسىرگەن ەمەس پە ەدى؟! جانار قاتارداعى بىرەۋ ەمەس جوعارى ءبىلىمدى ادام، الايدا ۇلتتىق نامىستان جۇرداي. وسى جەردەن  «ءبىزدىڭ تۇلەكتەر شەتەلدەن نەنى ۇيرەنىپ كەلەدى؟» دەگەن سۇراق تۋادى. مەنى تولعاندىراتىنى، شەتەلگە كەتىپ قازاقتىڭ قازىناسىمەن ءبىلىم الىپ جاتقان جاستار قانشالىقتى قازاق ءتىلىن، قازاقتىڭ ءسالت-داستۇرىن مەڭگەرگەن؟ ءتىپتى ميتينگىلەردە كورىنىپ قالعان جاناردىڭ قازاق ءۇشىن دەگەن داڭعوي ۇرانىنان  ءبىر اۋىز قازاق ءتىلىن ەستىمەدىم. شەتەلگە قازاقستاننان باراتىن تۇلەكتەردىڭ شارتىندا ءسوزسىز تۇردە اعىلشىن ءتىلىن ءبىلۋى مىندەتتەلەدى، ال، نە ءۇشىن قازاق ءتىلىن، قازاق مادەنيەتىن، قازاق تاريحىن ساۋاتتى ءبىلۋىن تالاپ ەتپەيمىز.  قازاقتىڭ تۇرمىسىن، ءتىلىن تۇسىنبەگەن بىرەۋ ەرتەڭ قازاقتىڭ كوسەگەسىن كوگەرتە مە؟   شەتەلدەگى جاستارعا قازاق ۇكىمەتى قانشالىقتى ۇلتتىق سانانى سىڭىرۋگە جۇمىس جاسايدى؟ بۇدان بىلاي حالىقارالىق ستيپەنديانى يەلەنۋ ءۇشىن قازاق ءتىلى مەن ءسالت-داستۇرى ءبىر سىناق رەتىندە ەنگىزسە قانداي جاقسى بولار ەدى؟! مەن بارلىق «بولاشاقپەن» وقيتىن تۇلەكتەرگە توپىراق شاشقىم كەلمەيدى. جۇرەگى قازاق دەپ سوقپاعان جان قانشالىقتى ءبىلىمدى بولىپ كەلگەنمەن، ەرتەڭ الدا-جالدا ەل باسىنا كۇن تۋسا تايقىپ كەتەرى انىق. سەبەبى جۇرەگىندە تۇراق جوق.

اشتىق پەن ازاپتىڭ سان سوقپاعىنان وتكەن، قىناداي قىرىلىپ، مىڭ ءولىپ، مىڭ تىرىلگەن قازاقتىڭ ءۇمىت ارتىپ، ۇكىلەگەن  ۇل-قىزدارى، بولاشاقتىق  ءقادىرلى اعا-اپكەلەر! شەتەلدىڭ ازعىندىعىن ەمەس وزىق ۇلگىسىن ەلگە اكەلىپ، قازاقستاندى گۇلدەندىرسەڭىزدەر ەكەن!

بىرلەسبەك ساياگۇل، ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى.