«نۇر وتان» پارتياسى ءتوراعاسىنىڭ ءبىرىنشى ورىنباسارى ماڭىزدى مەملەكەتتىك باعدارلامالاردىڭ ىسكە اسىرىلۋى بارىسىن تەكسەرۋ، سونداي-اق، ەلباسى جولداۋىنىڭ نەگىزگى ەرەجەلەرىن ءتۇسىندىرۋ ءۇشىن جامبىل وبلىسىنا كەلدى.

مۇحتار قۇل-مۇحاممەد بولعان كاسىپورىنداردىڭ قاتارىندا ءوڭىردىڭ ءىرى ءسۇت ءوندىرىسى – مەركە ىرىمشىك زاۋىتى دا بار. ونىڭ باستى ەرەكشەلىگى زاۋىت بىردەن 40 شارۋا قوجالىعىن بىرىكتىرەدى.  مۇنداي كووپەراسيانىڭ ناتيجەسى كوزگە كورىنىپ تە تۇر. ونىمدەرىن وتكىزۋگە بايلانىستى ولاردا ماسەلە تۋىنداعان ەمەس. زاۋىت كۇنىنە 70 توننا ءسۇتتى قايتا وڭدەي وتىرىپ، ءتۇرلى ءسۇت ونىمدەرىنىڭ 70-تەن استام ءتۇرىن شىعارادى.

«مەملەكەت باسشىسىنىڭ تاپسىرماسى بويىنشا جىل سايىن اگرارلىق سالانى دامىتۋ ءۇشىن ميللياردتاعان اقشا بولىنەدى. ول قاراجاتتى ءتيىمدى يگەرۋ ءۇشىن شاعىن شارۋا قوجالىقتارى ءىرى اۋىل شارۋاشىلىعى كووپەراتيۆتەرىنە بىرىگۋى ءتيىس.  مەركە ىرىمشىك زاۋىتى 40-تان استام اۋىل شارۋاشىلىعى كاسىپورىندارىن بىرىكتىرەدى. بۇل پرەزيدەنت تاپسىرماسىن ورىنداۋدىڭ جارقىن مىسالى»، - دەپ اتاپ ءوتتى «نۇر وتان» پارتياسى ءتوراعاسىنىڭ ءبىرىنشى ورىنباسارى فەرمەرلەرمەن بولعان كەزدەسۋىندە.

مۇحتار قۇل-مۇحاممەد سونىمەن بىرگە قورداي اۋدانىندا ورنالاسقان ەلىمىزدەگى ءىرى جەل ەلەكتر ستانسياسىنىڭ جۇمىسىمەن تانىستى. بۇل جوبانى ىسكە اسىرۋعا مەملەكەت ايتارلىقتاي كومەك كورسەتتى – قارجىنىڭ ءبىر بولىگىن  «بيزنەستىڭ جول كارتاسى – 2020» باعدارلاماسىنىڭ ارقاسىندا تارتۋدىڭ مۇمكىندىگى تۋدى.