"ەكسپو-2017 كورمەسى ءاربىر قازاقستاندىقتىڭ ماقتانىشىنا اينالۋى ءتيىس، سوندىقتان دا كوپشىلىكتىڭ وسىناۋ الەمدىك ماڭىزى بار اۋقىمدى شارانىڭ وتكىزىلۋ قۇرمەتى ەلىمىزدىڭ ەنشىسىنە تيگەندىكتەن، وعان قاتىسۋ نيەتى، بيلەتتەردى ساتىپ الۋى – ءپاتريوتيزمنىڭ بەلگىسى"، دەپ جازدى ق ر ءبىلىم جانە عىلىم مينيسترلىگىنىڭ رەسمي سايتى.
ءبىلىم جانە عىلىم مينيسترلىگى مەن ەكسپو باسشىلىقتارى جەرگىلىكتى اتقارۋشى ورگانداردىڭ، باسقا دا ۇيىمداردىڭ باسشىلارىن مۇعالىمدەردى كورمە بيلەتتەرىن ساتىپ الۋعا ماجبۇرلەمەۋگە شاقىرادى، دەپ حابارلايدى قامشى اقپاراتتىق اگەنتتىگى مينيسترلىكتىڭ رەسمي سايتىنا سىلتەمە جاساپ.
ءوز تاراپىنان ق ر بعم كورمە بيلەتتەرىن ساتىپ الۋعا بايلانىستى قانداي دا ءبىر بۇيرىق جاساماعانىن، سونىمەن قاتار مۇنداي ارەكەتتەرگە قارسى ەكەندىگىن جەتكىزەدى.
مينيسترلىكتىڭ بۇل جايىنداعى پوزيسياسى ايقىن: حالىقارالىق كورمە باستالار الدىندا اۋقىمدى ءتۇسىندىرۋ جانە ناسيحاتتاۋ جۇمىستارى جۇرگىزىلىپ، شارانىڭ ءمانى مەن ماڭىزىن، ونىڭ زامانالىق ءھام الەمدىك دەڭگەيدەگى وقيعا ەكەندىگىن جەتكىزىپ، كوپشىلىكتىڭ شىنايى قىزىعۋشىلىعىن تۋدىرۋ قاجەت.
شىن مانىندە، قازاقستاندىقتار ءوز جەرىندە بۇرىن-سوڭدى بولماعان شاراعا قاتىسىپ، كورمە پاۆيلوندارىن كورىپ، وتاندىق قانا ەمەس، ەكسپو – 2017 كورمەسىنە قاتىسۋ نيەتىن ءبىلدىرىپ، دايىندالىپ جاتقان ەلدەردىڭ مادەنيەت، ەكونوميكا، عىلىم، جاڭا تەحنولوگيالار – قاي سالالارى بولماسىن، بۇگىنگى ەڭ ۇزدىك ۇلگىلەرىمەن تانىسۋدىڭ بىردەن-بىر مۇمكىندىگىنە يە بولىپ وتىر.
بۇگىن ەل ورداسى استانا وسىناۋ ءدۇبىرلى وقيعانىڭ باستالۋىن تاعاتسىزدانا كۇتىپ، عالامات دايىندىق جۇمىستارىن اياقتاپ جاتىر: ايتۋلى شاراعا قاجەتتى، حالىقارالىق ستاندارتتارعا ساي ينفراقۇرىلىمدى قۇرۋ جۇمىستارى دا اياقتالىپ كەلەدى – ەكسپو – 2017 كورمەسىنە قاتىسام دەگەن ءاربىر ادام ءۇشىن ەسىك كەڭىنەن اشىلماق!
