وڭتۇستىك قازاقستان وبلىستىق پروكۋراتۋراسىنىڭ الدىندا ءوزىن ورتەگەن كاسىپكەر سوتتالدى. شىمكەنت قالاسىنا قاراستى ءال-فارابي اۋداندىق سوتى 47 جاستاعى نۇركەن اينابەككوۆتى كىنالى دەپ تاۋىپ، ءۇش جىلعا شارتتى جازا تاعايىندادى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

سوت وتىرىسى بارىسىندا نۇركەن اينابەكوۆكە قىلمىستىق كودەكستىڭ  4- بابى بويىنشا ايىپ تاعىلدى. ءىستى قاراعان سۋديا ەركەبۇلان تولەشوۆ كاسىپكەردى قىلمىستىق كودەكستىڭ  190-بابى («الاياقتىق»)، 411-بابى («سۋدياعا، القابيگە، پروكۋرورعا، سوتقا دەيىنگى تەرگەپ-تەكسەرۋدى جۇزەگە اسىراتىن ادامعا، ساراپشىعا، سوت پريستاۆىنا، سوت ورىنداۋشىسىنا جالا جابۋ)، 385-بابى («جالعان قۇجاتتاردى قولدان جاساۋ، دايىنداۋ نەمەسە وتكىزۋ») بويىنشا ايىپتى دەپ تانىدى.

ايتا كەتەيىك، نۇركەن اينابەكوۆكە قاتىستى سوت وتىرىسى وتكەن  جىلدىڭ جەلتوقسان ايىندا باستالعان بولاتىن. الايدا، كاسىپكەر ءوزىن ايىپتاۋشىلارعا اشۋلانىپ، ءوزىن ولتىرمەك بولعان. ول سوت وتىرىسىنا بارۋدىڭ ورنىنا وبلىستىق پروكۋراتۋرا عيماراتىنىڭ الدىنا كەلىپ، ءوزىن ورتەپ جىبەرگەن ەدى. ابىروي بولعاندا سول جەردەگى قىزمەتكەرلەر جالىندى ءسوندىرىپ، جەدەل جاردەم شاقىرتقان. مۇنداي قادامعا كاسىپكەر قاتتى اشۋلانعان سوڭ بارعانىن ايتقان. ياعني، ول بىرنەشە جىل بۇرىن اكىمدىك تاپسىرىسى بويىنشا امبۋلاتوريا سالىپ، نىسانداردى تاپسىرعانىمەن اقشاسىن الا الماي، سان سيپاپ قالعان. سودان بەرى پوليسيا، پروكۋراتۋرا مەن مەملەكەتتىك كىرىس دەپارتامەنتىنىڭ قىزمەتكەرلەرىنە تالاي شاعىم جازعانىمەن، مويىن بۇرعان ەشكىم بولماپتى. كەرىسىنشە كاسىپكەرگە 4-باپ بويىنشا قىلمىستىق  ءىس قوزعاعان. ادىلدىك ىزدەپ تاپپادىم دەپ اشىنعان ول  اقىرى وسىلاي ءوز ومىرىمەن قوشتاسپاق بولدى.

دەنەسىنىڭ 60 پايىزىن كۇيىك شالعان سوڭ، ءوڭىردىڭ ىشكى ىستەر قىزمەتكەرلەرى «سۋيسيدكە يتەرمەلەۋ» بابى بويىنشا قىلمىستىق ءىس قوزعاعان ەدى. ول اۋرۋحانادان شىققان سوڭ سوت وتىرىسى قايتا جالعاسىپ، كاسىپكەرگە قاتىستى سوت ۇكىمى شىقتى.