ەلباسى نۇرسۇلتان نازارايەۆ «بولاشاق» باعدارلاماسىنىڭ ءبىر بولىگىن نازاربايەۆ ۋنيۆەرسيتەتىنە وقىتۋعا باعىتتاۋدى ۇسىندى، دەپ حابارلايدى قامشى اقپاراتتىق اگەنتتىگى.

 «بولاشاق» باعدارلاماسى قارجىسىنىڭ ءبىر بولىگىن اتالعان ۋنيۆەرسيتەتتە ءبىلىم بەرۋگە باعىتتاۋدىڭ ۋاقىتى جەتتى. وسىندا سەرىكتەستىك يننوۆاسيانىڭ پارمەندى ەكوجۇيەسىن قالىپتاستىرۋ ماڭىزدى. الەمگە وزدەرىنىڭ يدەياسىن ۇسىناتىن جاس عالىمدار كونسۋلتاسيالار، باستاپقى كاپيتال، زاڭگەرلىك قىزمەت تۇرىندەگى جۇيەلى قولداۋدى الۋى ءتيىس»، - دەدى مەملەكەت باسشىسى.

پرەزيدەنتتىڭ پايىمىنشا، ۋنيۆەرسيتەتتە باسقارۋشىلار مەن مۇعالىمدەر ءبىلىم الۋى ءتيىس، سودان كەيىن وسىندا جيناقتالعان ۇزدىك تاجىريبەنى ەلىمىزدەگى بارشا جوو-لارىنا ەنگىزۋ كەرەك.

 «بۇل وقۋ ورنى تاۋەلسىزدىك جىلدارىندا تابىستى جۇزەگە اسىرىلعان جوبالاردىڭ ءبىرى. بىرتىندەپ وسىندا بىلىكتى وتاندىق كادرلارمەن جەكە عىلىمي مەكتەپ قالىپتاسادى. كەشەكتە تۇلەكتەر بۇل وقۋ ورنىندا عالىم اتانادى جانە ولاردىڭ جوبالارى ەلىمىزدە جانە شەتەلدە مويىندالادى دەپ سەنەمىن»،-دەدى نۇرسۇلتان نازاربايەۆ.

ايتا كەتەيىك، ەلباسى بيىل نازاربايەۆ ۋنيۆەرسيتەتىن ءتامامداعان تۇلەكتەردى قۇتتىقتاپ، دوكتورانتۋرا باعدارلاماسىنىڭ العاشقى توعىز تۇلەگىنە ديپلومدارىن تابىستادى. بيىل وقۋ بىتىرگەن ستۋدەنتتەر سانى 737 ادام، ونىڭ ىشىندە باكالاۆريات باعدارلاماسى بويىنشا 499 تۇلەك، ماگيستراتۋرا باعدارلاماسى بويىنشا 229 ستۋدەنت جانە PhD دارەجەسىنە يە بولعان دوكتورانتۋرا باعدارلاماسىنىڭ ەڭ العاشقى 9 تۇلەگى بار. ەرەكشە ۇلگىدەگى ديپلومعا 75 تۇلەك يە بولدى.

سالتاناتتى راسىمگە ستۋدەنت جاستار، ولاردىڭ اتا-انالارى، ۋنيۆەرسيتەتتىڭ قامقورشىلىق كەڭەسىنىڭ وكىلدەرى مەن وقىتۋشىلار قاتىستى.

مەملەكەت باسشىسى نازاربايەۆ ۋنيۆەرسيتەتىنىڭ تۇلەكتەرىن وسى ايتۋلى كۇنمەن قۇتتىقتاپ، ولاردىڭ بۇگىنگى تابىسىنا ستۋدەنتتەر مەن ۇستازداردىڭ، ۋنيۆەرسيتەتتىڭ قامقورشىلىق كەڭەسى مەن بارلىق قىزمەتكەرلەرىنىڭ بىرلەسكەن كۇش-جىگەرىنىڭ ارقاسىندا قول جەتكىزىلىپ وتىرعانىن اتاپ ءوتتى. 

– كوكتەمنىڭ وسى شۋاقتى كۇنى قۋانىشتى ساتپەن – ديپلوم العان جاس مامانداردىڭ كاسىبي ەڭبەك جولىن باستاۋىمەن تۇسپا-تۇس كەلىپ وتىر. بۇگىن  ۋنيۆەرسيتەتتىڭ 737 تۇلەگى وقۋدى اياقتادى. وقۋ ورنىنىڭ تاريحىندا ءبىز تۇڭعىش رەت 9 عىلىم دوكتورىن دايارلاپ شىعاردىق، – دەدى قازاقستان پرەزيدەنتى.      

نۇرسۇلتان نازاربايەۆ ۋنيۆەرسيتەت ديپلومىنا يە بولعانداردىڭ ەڭبەك نارىعىندا باسەكەگە قابىلەتتىلىگى جوعارى ەكەنىنە نازار اۋداردى.

– الدىڭعى جىلدارى بۇل ۋنيۆەرسيتەتتى مىڭنان استام ستۋدەنت ءبىتىرىپ شىقتى. ولاردىڭ جارتىسى الەمدەگى بەدەلدى وقۋ ورىندارىندا ءبىلىمىن ودان ءارى جالعاستىردى. ەڭبەك نارىعىنا قوسىلعان تۇلەكتەر وزدەرىنىڭ باسەكەگە قابىلەتتىلىگىن جانە سۇرانىسقا ساي ەكەندەرىن دالەلدەي الدى. ولار ەلىمىزدىڭ ءىرى كومپانيالارىندا، عىلىم، مەديسينا جانە مەملەكەتتىك قىزمەت سالاسىندا جۇمىس ىستەپ جاتىر، – دەدى مەملەكەت باسشىسى.    

قازاقستان پرەزيدەنتى بۇل جەتىستىكتەرگە مەريتوكراتيا مەن باسەكەلەستىك نەگىزىندەگى ىرىكتەۋ جۇيەسىن دامىتۋعا باعىتتالعان ءتيىمدى ءبىلىم بەرۋ مودەلىنىڭ ارقاسىندا قول جەتكىزىلگەنىن ايتتى.

نۇرسۇلتان نازاربايەۆ ءبىلىم مەكەمەلەرىنە قابىلداۋ ءۇشىن وتكىزىلەتىن ىرىكتەۋدىڭ ادىلدىك پەن اشىقتىق قاعيداتتارىنا نەگىزدەلەتىنىن اتاپ ءوتتى.   

– ۋنيۆەرسيتەت پەن زياتكەرلىك مەكتەپتەردىڭ ەسىگى دارىندى، ەڭبەكقور جانە بىلىمگە قۇشتار جاستار ءۇشىن ءارقاشان اشىق. وقۋ ورنىنا ءتۇسۋ، ءبىلىم سالاسىندا جەتىستىككە جەتۋ جولىندا ادىلەتتىلىك ساقتالادى جانە ول ەشقانداي سۋبەكتيۆتى فاكتورلارعا تاۋەلدى ەمەس، – دەدى مەملەكەت باسشىسى.      

قازاقستان پرەزيدەنتى ستۋدەنتتەر سانىنىڭ كوبەيۋىنە بايلانىستى  كەلەشەكتە وقۋ ورنىنىڭ ينستيتۋسيونالدىق الەۋەتىن ارتتىرۋ قاجەتتىگىنە نازار اۋداردى.

– ءبىلىم الىپ جاتقان ستۋدەنتتەر سانى بۇگىندە 4 مىڭعا جەتتى، بولاشاقتا ولاردىڭ سانى ەكى ەسە ارتادى. بۇگىن مۇندا الەمنىڭ 55 ەلىنەن كەلگەن عالىمدار جۇمىس ىستەيدى. ولار ءدارىس وقىپ قانا قويماي، عىلىمي  جۇمىستارمەن دە بەلسەنە اينالىسۋدا. ءبىلىم بەرۋ مەن زەرتتەۋ ءىسى اعىلشىن تىلىندە جۇرگىزىلەدى. ءقازىردىڭ وزىندە مىڭنان استام زەرتتەۋ ەڭبەگى جاريالاندى. ولاردىڭ اراسىندا ەڭ كوپ سىلتەمە جاسالاتىن الەمدىك عىلىمي باسىلىمداردا جارىق كورگەندەرى بار، – دەدى نۇرسۇلتان نازاربايەۆ.          

مەملەكەت باسشىسى ءبىلىم بەرۋ نارىعىندا جاھاندىق باسەكەنىڭ كۇشەيىپ كەلە جاتقانىن ايتىپ، تاياۋ جانە الىس شەتەلدەردەن ستۋدەنتتەر مەن جاس عالىمداردى كوبىرەك تارتۋ قاجەتتىگىن اتاپ ءوتتى.

قازاقستان پرەزيدەنتى زەرتتەۋلەر ساپاسىن ارتتىرۋعا جانە جاستارعا عىلىمي بايلانىستارىن كەڭەيتۋگە مۇمكىندىك بەرەتىن ءتيىستى گرانتتار ءبولۋدىڭ ماڭىزدىلىعىنا نازار اۋداردى.

سونىمەن قاتار، نۇرسۇلتان نازاربايەۆ ۋنيۆەرسيتەتتىڭ حالىقارالىق بايلانىستار اياسىن كەڭەيتۋ جانە ونى جاھاندىق اكادەميالىق ورتامەن ينتەگراسيالاۋ تۋرالى ايتتى.

– الەمنىڭ جۇزدەن استام ءبىلىم بەرۋ جانە عىلىمي ورتالىقتارىمەن سەرىكتەستىك ورناتىلدى. نازاربايەۆ ۋنيۆەرسيتەتى ازيا ۋنيۆەرسيتەتتەرى اليانسىنىڭ تەڭ قۇرىلتايشىسى بولدى. اليانسقا قىتايدىڭ، گونكونگتىڭ، ءۇندىستاننىڭ، يندونەزيانىڭ، جاپونيانىڭ، وڭتۇستىك كورەيانىڭ، مالايزيانىڭ، سينگاپۋردىڭ جانە تاعى باسقا ەلدەردىڭ جەتەكشى جوعارى وقۋ ورىندارى كىرگەن. سونىمەن بىرگە، حالىقارالىق بايلانىستار اياسىن ودان ءارى كەڭەيتىپ، ارىپتەستەردىڭ وزىق تاجىريبەسىن ۇيرەنە وتىرىپ، ءوزىڭنىڭ بىرەگەيلىگىڭدى دە ساقتاۋ كەرەك، – دەدى مەملەكەت باسشىسى.       

سونداي-اق، قازاقستان پرەزيدەنتى وسى ۋنيۆەرسيتەت تاجىريبەسىن ەلىمىزدەگى بۇكىل جوعارى ءبىلىم بەرۋ جۇيەسى كولەمىندە قولدانۋدىڭ ماڭىزدىلىعىن اتاپ ءوتتى.

– وتاندىق جوعارى وقۋ ورىندارىنىڭ باسقارۋشىلارى مەن وقىتۋشىلارى وسىندا ءبىلىمىن جەتىلدىرىپ، العان ۇزدىك تاجىريبە مەن مەڭگەرگەن ماشىعىن ءوز وقۋ ورىندارىنا ەنگىزۋلەرى كەرەك. نازاربايەۆ ۋنيۆەرسيتەتى – جاڭا جاھاندىق جاعدايداعى سىن-قاتەرلەرگە دەگەن ءبىزدىڭ ستراتەگيالىق جاۋابىمىز. «بولاشاق» باعدارلاماسىنا بولىنەتىن قارجىنىڭ ءبىر بولىگىن وسى ۋنيۆەرسيتەتتە وقىتۋعا جۇمسايتىن كەز كەلدى. نارىققا ءوز يدەيالارى مەن تەحنولوگيالارىن ۇسىناتىن جاس عالىمدارعا اقىل-كەڭەس، باستاپقى كاپيتال، كەڭسە، ماركەتينگتىك جانە زاڭگەرلىك كومەك تۇرىندەگى كەشەندى قولداۋ جاسالۋعا ءتيىس، – دەدى نۇرسۇلتان نازاربايەۆ.  

مەملەكەت باسشىسى ۋنيۆەرسيتەتتىڭ ءبىرقاتار عىلىمي جوبالارى مەن ستارتاپتارىن ىسكە اسىرۋىنا كومەكتەسۋ قاجەتتىگىن اتاپ ءوتتى.

قازاقستان پرەزيدەنتى ءوزىنىڭ «بولاشاققا باعدار: رۋحاني جاڭعىرۋ» اتتى ماقالاسىندا ايتىلعان تابىسقا جەتۋدىڭ باستى تالاپتارى تۋرالى ويلارىن تۇلەكتەردىڭ ەسىنە سالدى. 

– قازىرگى زامان – ەرتەرەكتە وقىعان-توقىعانىن كوڭىلىنە توق سانامايتىن، جاڭا ءبىلىم الۋعا قابىلەتتى، جاڭا وزگەرىستەرگە بەيىم، زەرتتەۋشىلەر مەن ينۆەستورلاردىڭ تىلىندە سويلەي الاتىن ادامنىڭ زامانى. مىنە، وسىنداي جاننىڭ ۇپايى تۇگەل بولادى. مەن ومىرلىك تاجىريبەمە سۇيەنىپ،  ازاماتتارىمىزدىڭ جاڭا داۋىردە ناقتى قاسيەتتەرگە يە بولۋى قاجەت ەكەندىگىنە كوزىمدى جەتكىزدىم. ەڭ الدىمەن، باسەكەگە قابىلەتتى بولۋ قاجەت. بۇل تەك ەكونوميكامىزعا عانا ەمەس، ءاربىر ناقتى ادامعا قاتىستى. پراگماتيك ءارى پاتريوت بولۋ كەرەك. ءبىلىمدى دارىپتەۋدەن قاشپاۋ كەرەك. ادام نەعۇرلىم كوپ بىلگەن سايىن ونىڭ مۇمكىندىگى دە سوعۇرلىم ارتا تۇسەدى. نازاربايەۆ ۋنيۆەرسيتەتىنىڭ ستۋدەنتتەرى مۇنى بارىنەن دە جاقسى تۇسىنەدى دەپ سەنەمىن، – دەدى مەملەكەت باسشىسى.           

نۇرسۇلتان نازاربايەۆ قوعامنىڭ ەۆوليۋسيالىق دامۋ باعىتىن ساقتاپ، ۇعىمتال بولۋ، الەم تىلدەرىن ءبىلۋ جانە جاھاندا بولىپ جاتقان جاڭا ۇردىستەردى تۇسىنە ءبىلۋ تۇلعا رەتىندە جەتىلە ءتۇسۋ ءۇشىن اسا ماڭىزدى ەكەنىن اتاپ ءوتتى. 

– سىزدەردى تاۋەلسىز قازاقستاننىڭ دامۋى مەن وركەندەۋىنە لايىقتى ۇلەس قوسادى دەپ سەنەمىن. قول جەتكىزگەن جەتىستىكتەرىڭىز وزدەرىڭىز ءبىلىم العان ۋنيۆەرسيتەتتىڭ دە بەدەلى مەن تانىمالدىعىنىڭ ارتۋىنا سەپتىگىن تيگىزەدى. ول ءۇشىن سىزدەر ەرىنبەي ەڭبەك ەتىپ، العا قويعان ماقسات جولىندا تاباندى تۇردە ىلگەرىلەي بەرۋلەرىڭىز كەرەك، – دەدى قازاقستان پرەزيدەنتى.