شانحاي ىنتىماقتاستىق ۇيىمىنىڭ بەيجىڭدەگى شتاب-پاتەرىندە ەكسپو-2017 مامانداندىرىلعان حالىقارالىق كورمەسىندەگى شىۇ پاۆيلونىنىڭ رەسمي تانىستىرىلىمى ءوتتى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.
سالتاناتتى شاراعا شىۇ باس حاتشىسى راشيد اليموۆ قاتىستى. ول شتاب-پاتەردىڭ قوناقتارىنا پاۆيلوننىڭ قىزمەتى تۋرالى تولىعىراق اقپارات بەرىپ، شىۇ ءوز تاريحىندا العاش رەت حالىقارالىق كورمەنىڭ جۇمىسىنا قاتىسىپ جاتقاندىعىن اتاپ ءوتتى.
«شىۇ-نىڭ ەكسپو-2017 كورمەسىندە ءوز پاۆيلونىن ورنالاستىراتىن جالعىز وڭىرلىك ۇيىم ەكەندىگىن ەسەپكە الا وتىرىپ، بۇل ءبىز ءۇشىن ۇلكەن جاۋاپكەرشىلىك پەن قۇرمەت بولىپ تابىلادى»، - دەدى ءالىموۆ.
باس حاتشى كورمە جۇمىسىنىڭ باستالۋ مەرزىمى شىۇ مۇشە-ەلدەردىڭ باسشىلارى كەڭەسىنىڭ وتىرىسىمەن تۇسپا-تۇس كەلەتىندىگىن اتاپ ءوتتى.
«بولاشاق ەنەرگياسىنا ارنالعان ەكسپو-نىڭ تاقىرىبى شىۇ «شانحاي رۋحى» ەنەرگياسىمەن تۇتاسىپ تۇر»، - دەپ مالىمدەدى ول.
سونداي-اق، ديپلومات شىۇ پاۆيلونىنىڭ جۇمىسى بارىسىندا ۇيىم قىزمەتىنىڭ ءتۇرلى اسپەكتىلەرىنە ارنالعان ءىس-شارالار وتەتىندىگىن حابارلادى.
«ءبىز ەكسپو باسشىلىعىمەن كورمە اياسىندا 27 تامىز - «شىۇ كۇنى» رەتىندە اتالىپ وتەتىندىگى جونىندە كەلىسىم جاسادىق. ءدال وسى كۇنى استانادا شىۇ حالىقارالىق مارافونى وتەدى، وعان 5 مىڭنان استام ادام قاتىسادى دەپ كۇتىلۋدە. الدا وتە ماڭىزدى باعدارلاما تۇر، وسىعان وراي بارشاڭىزدى استاناداعى شىۇ پاۆيلونىنا شاقىرامىن»، - دەپ تۇيىندەدى ۇيىمنىڭ باس حاتشىسى.
