قازاقستاننىڭ «لوتەرەيا تۋرالى» زاڭنىڭ ارقاسىندا وتاندىق سپورتتى دامىتىپ قانا قويماي، ءباس تىگۋ بيزنەسىن دە اشىق جۇيەگە كەلتىرۋگە دە بولادى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

ق ر مادەنيەت جانە سپورت ءمينيسترى ارىستانبەك مۇxامەدي ۇلىنىڭ ايتۋىنشا، لوتەرەيادان تۇسەتىن تابىستىڭ 15 پايىزى سپورتتى دامىتۋعا جۇمسالادى.

«شىنى كەرەك، بۇعان دەيىن ونداي زاڭ بولماعان. «لوتەرەيا تۋرالى» زاڭ وتە قيىن قۇجات بولدى. دەگەنمەن، ءبىز ونى قابىلدادىق. لوتەرەيادان تۇسەتىن اقشانىڭ از ەمەس ەكەنىن ءبارىمىز جاقسى بىلەمىز. ءبىراق قانداي سالىق تولەنەدى؟ كىمگە پايدا ءتۇسىپ جاتىر؟ وعان قاراپ وتىرعان ەشكىم جوق. ءبىز وسى سالانى اشىق قىلدىق، ءبىر جۇيەگە كەلتىردىك. ەڭ باستىسى، تۇسەتىن اقشانىڭ 15 پايىزى سپورتتى دامىتۋعا باعىتتالاتىن بولادى. سوسىن وسى سالاداعى الەمنىڭ ۇزدىك كومپانيالارىن تارتىپ جاتىرمىز. «نەگە؟» دەسەڭىز، ەگەر لوتەرەيا سالاسى جاقسى دامىسا، وندا بۋكمەكەرلىك كەڭسەلەر مەن توتاليزاتورلاردا وتىرعان جاستاردىڭ بارلىعىن لوتەرەياعا شىعارۋعا بولادى. بۇل - الەمدىك تاجىريبە. ول ءۇشىن لوتەرەيانى اشىق سالاعا اينالدىرعان ماڭىزدى»، - دەپ اتاپ كورسەتتى ارىستانبەك مۇxامەدي ۇلى.

ايتا كەتەيىك، بۇگىن مينيستر قوعامدىق كەڭەس مۇشەلەرى الدىندا ەسەپ بەردى. ارىستانبەك مۇxامەدي ۇلىنىڭ ايتۋىنشا، سپورتقا ارنالعان جاڭا زاڭناما بويىنشا ءاربىر وبلىس وزىنە ءتان سپورت ءتۇرىن دامىتاتىن بولادى.