ق ر پرەمەر-مينيسترى ب. ساعىنتايەۆ «زەينەتاقىمەن قامسىزداندىرۋ تۋرالى» ق ر زاڭىنا سايكەس، بجزق اكسيونەرلىك قوعامىنىڭ مەنشىك يەسى ۇكىمەت بولىپ تابىلاتىنىن، جانە مەملەكەتتىڭ الۋشىلارعا مىندەتتى زەينەتاقى جارنالارىن ساقتاۋعا كەپىلدىك بەرەتىنىن ايتىپ ءوتتى، دەپ حابارلايدى قامشى اقپاراتتىق اگەنتتىگى پرەمەر-مينيستردىڭ رەسمي سايتىنا سىلتەمە جاساپ. 

وسىعان وراي، ۇكىمەت قازاقستان ازاماتتارىنىڭ زەينەتاقى اكتيۆتەرىن ساقتاۋعا تىكەلەي مۇددەلى جانە وسى ماسەلەگە بايلانىستى ارنايى وكىلدەردى تاعايىندادى.

«مەن ءوز تاراپىمنان ازەربايجاندىق ارىپتەسىم، پرەمەر-مينيسترمەن پىكىرلەستىم، ول بانكتىڭ بارلىق كرەديتورلارىنا قارىزدى قايتارۋ ۇدەرىسىندە جان-جاقتى قولداۋ كورسەتەتىنىن ايتتى»، - دەدى ب. ساعىنتايەۆ.

ق ر قارجى ءمينيسترى باقىت سۇلتانوۆ 2014 جىلدىڭ قازان ايىندا بجزق اكتيۆتەرىنىڭ پورتفەلىنە اينالىم مەرزىمى 10 جىل جانە مولشەرلەمەسى 8،25% بولاتىن 250 ملن دوللار كولەمىندەگى ازەربايجان حالىقارالىق بانكىنىڭ قارىزدىق باعالى قاعازدارى الىنعانىن ايتتى. 2014 جىلدان باستاپ بۇگىنگە دەيىن بجزق احب-ىنەن سىياقى رەتىندە 15 ملرد تەڭگە كولەمىندەگى قاراجات الدى، بۇل ينۆەستيسيالانعان سومانىڭ ۇشتەن ءبىر بولىگىنە جۋىق.

«وسى ماسەلە بويىنشا وكىلەتتى ازەربايجاننىڭ قارجى ءمينيسترى ازەربايجاننىڭ ۇلتتىق ۆاليۋتاسىنىڭ ديەۆالۆاسياسىنا بايلانىستى حالىقارالىق بانك كرەديتورلار الدىنداعى ءوز مىندەتتەمەلەرىن ورىنداماعانىن ءتۇسىندىرىپ ءوتتى. بۇل ماسەلەنى ازەربايجان ۇكىمەتى ەرەكشە باقىلاۋىنا الدى جانە ارىپتەستەرىمىزدىڭ ايتۋىنشا، ازەربايجان بانكتىڭ بارلىق كرەديتورلارىنىڭ مۇددەلەرىن قامتۋ ءۇشىن بار مۇمكىندىگىن سالادى»، - دەدى ب. سۇلتانوۆ.

شولۋشى: گۇلىم جاقان