وڭتۇستىك قازاقستان وبلىسىندا بالالارى ەسەيىپ كەتكەن ەرلى-زايىپتى تاعى 5 بالا اسىراپ الماقشى. ارىس اۋدانىندا تۇراتىن ديقانبايەۆتار اۋلەتىنىڭ وتاعاسى ءقازىر بالالاردىڭ قۇجاتتارىن راسىمدەپ جاتىر. ولار وسىلايشا ەلىمىزدەگى جەتىمدەر سانىنىڭ ازايۋىنا ىقپال جاساماق، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

مۇحتاربەك پەن قارلىعاش ديقانبايەۆتاردىڭ ءۇش قىز، ءبىر ۇلى بار. قىزدارىن قۇتتى ورىندارىنا قوندىرىپ، ۇلى ەر جەتكەننەن كەيىن ولار 5 بىردەي بالانى باۋىرىنا باسۋعا نيەتتەنگەن. ءسويتىپ بولاشاق پەرزەنتتەرىن ارىس اۋدانىنداعى بالالار ۇيىنەن تاپقان. ويتكەنى قارلىعاش ديقانبايەۆا 15 جىلدان بەرى وسى بالالار ۇيىندە تاربيەشى بولىپ جۇمىس ىستەيدى. سوندىقتان بالالارمەن ءتىل تابىسۋدا قيىندىق بولمايدى دەپ سەنەدى. ءبىر قىزىعى، بالالاردىڭ ۇشەۋى اعايىندى، ورىس ۇلتىنان. ءدىنى مەن ءتىلى بولەك بولعانىنا قاراماستان اسىراپ الۋشى وتباسى بۇل بالالارعا ءوز تەگىن بەرمەكشى.

«بالالارىمنىڭ تەگى مۇراتبەك ۇلى بولادى. مىسالى، مۇراتبەك ۇلى ۆاسيليي دەگەندەي. ەكى ۇلكەنى قىز بولسا، قالعاندارى ۇل بالالار. ولارمەن تانىسىپ، ءبىراز ۋاقىتتان بەرۋ ۇيىمىزگە اكەلىپ ءجۇرمىز. ايەلىمىز ەكەۋمىز دە ۇيرەنىسىپ قالدىق. ەندىگى كەزەكتە ولاردى باعىپ-قاعىپ، ءۇمىتىن اقتايمىن دەپ سەنەمىن»،-دەيدى وتاعاسى مۇحتاربەك ديقانبايەۆ.

ءقازىر ەرلى-زايىپتىلار قۇجاتتاردى راسىمدەپ ءجۇر. ويتكەنى بالعىندار دا بولاشاق ءوز ۇيلەرىنە كوشىپ كەلۋگە اسىعۋدا. سەبەبى، جاڭا تۋىستارىن تاپقان گابريەل، ۆلاديمير، ءۆاسيلييدىڭ جانە ديانا مەن ايسۇلۋ ءوز وتباسى بولعانىن ارماندايدى.

«ماعان اناشىم، قاشان قۇجاتىمىز دايىن بولادى دەپ اسىعىپ ءجۇر بالالارىم. ءبىز دە سەندەرمەن بىرگە بولۋعا اسىعىپ ءجۇرمىز دەپ ايتتىم. ونىڭ ۇستىنە جاڭا جيھازدارعا تاپسىرىس بەرىپ قويدىم. بالالاردىڭ جاعدايىن جاساسام دەيمىن. وتباسى دەگەن نە، ونىڭ قۇندىلىقتارى دەگەن ۇعىمداردى بالالارىمنىڭ بويىنا سىڭىرسەم دەيمىن. ەرتەڭ وسكەندە اتا-انام بار دەپ كەلىپ تۇرادى»، - دەيدى قارلىعاش ديقانبايەۆا.

وسىلايشا  ارىس اۋدانىنداعى بالار ءۇيىنىڭ تاربيەلەنۋشىلەر سانى 5 بالاعا كەمىمەك. دەسە دە مۇندا ءالى  73 بالا بار.  ايتا كەتەرلىگى،  بۇل مەكەمەنىڭ باسقا بالالار ۇيىنە قاراعاندا وزگەشەلىكتەرى دە بار. ولاردىڭ ءارقايسىسى ءوز وتباسى دەپ ءبولىپ قويعان وتباسىلىق يكەمدىلىكتە تاربيەلەنەدى. ياعني ءار ون بالا ءبىر شاڭىراق بولىپ، تاربيەشىسىمەن بىرگە ءومىر سۇرەدى. مۇنداعى ماماندار بولسا  بالالاردى اسىراپ الۋعا نيەت بىلگەندەر سانى بۇگىندە كوبەيىپ كەلەدى دەپ وتىر.  ونداي جاندارعا  مەملەكەت تاراپىنان قارجىلىق قولداۋ دا كورسەتىلەدى ەكەن.